നെവേഡ സെനറ്റ് സീറ്റില്‍ വിജയിച്ചു; യുഎസ് സെനറ്റിന്റെ നിയന്ത്രണം ഡമോക്രാറ്റിക് പാര്‍ട്ടിക്ക്

നെവേഡ: നവംബര്‍ 12 ശനിയാഴ്ച രാത്രി നെവേഡ സെനറ്റ് സീറ്റിന്റെ വിജയം ഉറപ്പിച്ചതോടെ യുഎസ് സെനറ്റിന്റെ നിയന്ത്രണം ഡമോക്രാറ്റിക്ക് പാര്‍ട്ടിക്കു ലഭിച്ചു. അരിസോണ സെനറ്റ് സീറ്റില്‍ ഡമോക്രാറ്റിക് പാര്‍ട്ടി വിജയിച്ചിരുന്നു. ഡമോക്രാറ്റിക് പാര്‍ട്ടി സ്ഥാനാര്‍ഥി കാതറിന്‍ കോര്‍ട്ടസ് മസ്റ്റൊ നേരിയ ഭൂരിപക്ഷത്തിനാണു റിപ്പബ്ലിക്കന്‍ സ്ഥാനാര്‍ഥി ആഡം ലക്‌സല്‍ട്ടിനെ പരാജയപ്പെടുത്തിയത്. 97% വോട്ടുകളും എണ്ണിക്കഴിഞ്ഞു.

ഇതോടെ ആറംഗ സെനറ്റില്‍ ഡമോക്രാറ്റിക്ക് പാര്‍ട്ടിക്ക് 50, റിപ്പബ്ലിക്കന്‍ പാര്‍ട്ടിക്ക് 49 സീറ്റുകളും ലഭിച്ചു. ജോര്‍ജിയ സെനറ്റ് സീറ്റില്‍ ഡിസംബര്‍ ആദ്യവാരം റണ്‍ഓഫ് തിരഞ്ഞെടുപ്പില്‍ ഡമോക്രാറ്റിക് പാര്‍ട്ടിക്കാണു ജയസാധ്യത. ഇരു സ്ഥാനാര്‍ഥികള്‍ക്കും പോള്‍ ചെയ്ത വോട്ടിന്റെ 50% ലഭിക്കാതിരുന്നതിനെ തുടര്‍ന്നാണു റണ്‍ ഓഫ് വേണ്ടി വന്നത്.

അതേസമയം, യുഎസ് കോണ്‍ഗ്രസിന്റെ നിയന്ത്രണം റിപ്പബ്ലിക്കന്‍ പാര്‍ട്ടിക്കു ലഭിക്കുമെന്നാണു ഇതുവരെയുള്ള തെരഞ്ഞെടുപ്പു ഫലങ്ങള്‍ സൂചിപ്പിക്കുന്നത്. ഡമോക്രാറ്റിക് പാര്‍ട്ടിക്ക് 203 സീറ്റു കള്‍ ലഭിച്ചപ്പോള്‍ റിപ്പബ്ലിക്കന്‍ പാര്‍ട്ടി 211 സീറ്റുകള്‍ നേടി. ഏഴു സീറ്റുകള്‍ കൂടി ലഭിച്ചാന്‍ റിപ്പബ്ലിക്കന്‍ പാര്‍ട്ടിക്ക് യുഎസ് ഹൗസില്‍ ഭൂരിപക്ഷം ലഭിക്കും.

Report : ജോയിച്ചൻപുതുക്കുളം

Leave Comment