വിദ്യാർഥികൾക്കിടയിൽ നിയമാവബോധവും സാമൂഹിക ഉത്തരവാദിത്വബോധവും വളർത്തുന്നതിനായി സംസ്ഥാന സർക്കാർ നടപ്പാക്കുന്ന പദ്ധതിയാണ് സ്റ്റുഡന്റ് പോലീസ് കേഡറ്റ്. അതോടൊപ്പം സ്റ്റുഡന്റ് പോലീസ് കാഡറ്റുകൾക്ക് യൂണിഫോം സർവീസുകളിൽ പ്രത്യേക പരിഗണന നൽകാനും സർക്കാർ തീരുമാനിച്ചിരിക്കുകയാണ്.
പി എസ് സി മുഖേന പോലീസ്, ഫോറസ്റ്റ്, എക്സൈസ്, ജയില്‍, ഫയര്‍ & റെസ്ക്യൂ, മോട്ടോര്‍ വെഹിക്കിള്‍ എന്നീ യൂണീഫോം സര്‍വ്വീസുകളിലേക്ക് നടത്തുന്ന നിയമനത്തില്‍ സ്റ്റുഡന്റ് പോലീസ് കേഡറ്റുകള്‍ക്ക് പരമാവധി 5 ശതമാനം വെയിറ്റേജ് നൽകും. ഹൈസ്കൂള്‍, ഹയര്‍ സെക്കണ്ടറി തലങ്ങളിലായി 4 വര്‍ഷം ട്രയിനിംഗ് പൂര്‍ത്തിയാക്കുകയും എ+ ഗ്രേഡ് കരസ്ഥമാക്കുന്നവരുമായ കേഡറ്റുകള്‍ക്കാണ് പരമാവധി നല്‍കാവുന്ന 5% വെയിറ്റേജ് ലഭിക്കുക.
സ്കൂൾ തലത്തിൽ നിന്നു തന്നെ കഴിവും സാമൂഹിക പ്രതിബദ്ധതയുമുള്ളവരെ സർവീസിലേയ്ക്ക് ആകർഷിക്കാനും വാർത്തെടുക്കാനും ഈ തീരുമാനം സഹായകമാകും. കൂടുതൽ ഗൗരവത്തോടെയും ആത്മാർത്ഥതയോടെയും സ്റ്റുഡന്റ് പോലീസ് കേഡറ്റ് പദ്ധതിയെ സമീപിക്കാൻ വിദ്യാർത്ഥികൾക്ക് ഈ തീരുമാനം പ്രചോദനം പകരട്ടെ. അച്ചടക്കവും സാമൂഹ്യപ്രതിബദ്ധതയുമുള്ള യുവതലമുറയെ വാർത്തെടുക്കാൻ സഹായകമായ പദ്ധതി എന്ന നിലയ്ക്ക് സ്റ്റുഡന്റ് പോലീസ് കേഡറ്റ് പദ്ധതിയെ വളർത്താൻ നമുക്ക് സാധിക്കണം. അതിനാവാശ്യമായ എല്ലാ പിന്തുണയും സർക്കാർ ഉറപ്പു വരുത്തും.
