കേരളത്തിൽ സന്ദർശനത്തിനെത്തിയ ശ്രീലങ്കൻ പ്രതിനിധി സംഘവുമായി മുഖ്യമന്ത്രി പിണറായി വിജയൻ കൂടിക്കാഴ്ച നടത്തി. രണ്ട് എംപി മാരും ഉദ്യോഗസ്ഥരും അടങ്ങുന്ന ശ്രീലങ്കൻ സംഘവുമായി ചീഫ് സെക്രട്ടറി ഡോ. ജയതിലക്, മന്ത്രിമാരായ കെ എൻ ബാലഗോപാൽ, കെ കൃഷ്ണൻകുട്ടി, എ കെ ശശീന്ദ്രൻ എന്നിവരും എം എ ബേബിയും വിവിധ വിഷയങ്ങൾ പങ്കുവച്ചു.
ഇന്ത്യൻ കൗൺസിൽ ഫോർ കൾച്ചറൽ റിലേഷൻസിന്റെ നേതൃത്വത്തിലാണ് പ്രത്യേക അതിഥികളായി ആറംഗ സംഘം കേരളത്തിലെത്തിയത്. ശ്രീലങ്കയിലെ എം പിമാരായ കിറ്റ്നൻ സെൽവരാജ്, കരുണാനന്ദൻ ഇളങ്കുമരൻ, പീപ്പിൾസ് ലിബറേഷൻ ഫ്രണ്ട് ജനറൽ സെക്രട്ടറി എം ടിൽവിൻ സിൽവ, സെൻട്രൽ കമ്മിറ്റി അംഗവും ഇന്റർ കമ്പനീസ് എംപ്ലോയീസ് യൂണിയൻ ജനറൽ സെക്രട്ടറിയുമായ ജാനക അധികാരി, മീഡിയ യൂണിറ്റ് മേധാവി ഹേമതിലക ഗാമേജ്, അന്താരാഷ്ട്ര ബന്ധങ്ങൾക്കായുള്ള കമ്മിറ്റി അംഗം ബി.ആർ. കൽപ്പന മധുഭാഷിണി എന്നിവരാണ് സംഘാംഗങ്ങൾ.
ഫെബ്രുവരി 5 ന് ഡൽഹിയിലെത്തിയ സംഘം ഡൽഹിയിലും അഹമ്മദാബാദിലും സന്ദർശനം പൂർത്തിയാക്കിയാണ് കേരളത്തിലെത്തിയത്. വിവിധ ഔദ്യോഗിക പരിപാടികൾക്ക് ശേഷം ഫെബ്രുവരി 12 ന് സംഘം കൊളംബോയിലേക്ക് മടങ്ങും.
