കുന്നത്തുനാട് നിയോജക മണ്ഡലം ഹെൽത്തി കേരള കാമ്പയിൻ ഉദ്ഘാടനം ചെയ്തു.
ശാരീരികാരോഗ്യത്തോടൊപ്പം മാനസികാരോഗ്യവും സാമൂഹികാരോഗ്യവും ചേർന്നതാണ് ആരോഗ്യമെന്ന് പി വി ശ്രീനിജിൻ എം എൽ എ പറഞ്ഞു. വടവുകോട് – പുത്തൻകുരിശ് ഗ്രാമ പഞ്ചായത്തിൻ്റെ സഹകരണത്തോടെ കേരള സർക്കാർ ആയുഷ് വകുപ്പും നാഷണൽ ആയുഷ് മിഷൻ കേരളയും സംയുക്തമായി സംഘടിപ്പിച്ച ആരോഗ്യ സംഗമം ഹെൽത്തി കേരള കാമ്പയിൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ആരോഗ്യമേഖലയെ സംബന്ധിച്ചുള്ള ബോധവൽക്കരണ പരിപാടികൾ സാധാരണക്കാർക്കിടയിൽ ശക്തമാക്കണം. ആരോഗ്യരംഗത്തെ പ്രധാന്യം മനസിലാക്കി കോടി കണക്കിന് രൂപയുടെ പ്രൊജക്റ്റുകളാണ് ബജറ്റിൽ പ്രഖ്യാപിച്ചിരിക്കുന്നത് എന്നും എം എൽ എ പറഞ്ഞു. മാറുന്ന കാലഘട്ടത്തിൽ മൊബൈൽ ഫോണിൻ്റെ അമിതമായ ഉപയോഗം വരുത്തിവെക്കുന്ന പ്രത്യാഘാതങ്ങളെ പറ്റിയും അദ്ദേഹം സംസാരിച്ചു.
കാമ്പയിൻ്റെ ഭാഗമായി വിളംബര ജാഥ, ജീവിത ശൈലി രോഗ നിർണയം, ഫുഡ് എക്സ്പോ, ബോധവൽക്കരണ ക്ലാസുകൾ, ഹെൽത്തി ബ്രേക്ക്ഫാസ്റ്റ് പാചക മത്സരം , റീൽസ് മത്സരം, ഹോമിയോപ്പതി ക്വിസ് മത്സരം, യോഗ, ഡാൻസ് എന്നിവയും നടന്നു.
ചടങ്ങിൽ വടവുകോട് – പുത്തൻ കുരിശ് ഗ്രാമ പഞ്ചായത്ത് പ്രസിഡൻ്റ് റെജി തോമസ് അധ്യക്ഷനായി. ജില്ലാ പഞ്ചായത്തംഗം ജൂബിൾ ജോർജ്, കുന്നത്തുനാട് ഗ്രാമ പഞ്ചായത്ത് പ്രസിഡൻ്റ് എ.പി കുഞ്ഞുമുഹമ്മദ്, വടവുകോട് ബ്ലോക്ക് പഞ്ചായത്ത് വൈസ് പ്രസിഡൻ്റ് അഡ്വ. ബിജു കെ ജോർജ്, വടവുകോട് ഗ്രാമ പഞ്ചായത്ത് വൈസ് പ്രസിഡൻ്റ് ദീപാ ബിജു, പൂതൃക്ക ഗ്രാമ പഞ്ചായത്ത് വൈസ് പ്രസിഡൻ്റ് ജോൺ ജോസഫ്, വടവുകോട് ബ്ലോക്ക് പഞ്ചായത്ത് ആരോഗ്യ കാര്യ സ്ഥിരം സമിതി അധ്യക്ഷ പി. കെ ബിന്ദു, പൂതൃക്ക ഗ്രാമ പഞ്ചായത്ത് ആരോഗ്യ കാര്യ സ്ഥിരം സമിതി അധ്യക്ഷ അനു കൃഷ്ണൻ, കുന്നത്തുനാട് ഗ്രാമപഞ്ചായത്ത് ആരോഗ്യ കാര്യ സ്ഥിരം സമിതി അധ്യക്ഷ ബിന്ദു പൗലോസ്, വടവുകോട് ഗ്രാമ പഞ്ചായത്ത് ആരോഗ്യകാര്യ സ്ഥിരം സമിതി അധ്യക്ഷ ആര്യ സൂര്യപ്രകാശ്, വികസന കാര്യ സ്ഥിരം സമിതി അധ്യക്ഷൻ ജെയ്സൽ, വികസന കാര്യ സ്ഥിരം സമിതി അധ്യക്ഷ സുബി, മഴുവന്നൂർ ഗ്രാമപഞ്ചായത്ത് വികസന കാര്യ ഫിരം സമിതി അധ്യക്ഷ നിത അനിൽ, വിവിധ ഗ്രാമ പഞ്ചായത്തംഗങ്ങൾ, പൂതൃക്ക ഗവ. ആയൂർവേദ നഴ്സറി മെഡിക്കൽ ഓഫീസർ ഡോ. ബിനി വർഗീസ്, വടവുകോട് ഗവ. ഹോമിയോ ഡിസ്പെൻസറി ചീഫ് മെഡിക്കൽ ഓഫീസർ ഡോ. ജെസി ഉതുപ്പ് എന്നിവർ പങ്കെടുത്തു
