കൊച്ചി: കമ്പനി രജിസ്‌ട്രേഷനും അനുബന്ധ സേവനങ്ങളും ഏകജാലക സംവിധാനത്തിലൂടെ ലഭ്യമാക്കുന്ന കേന്ദ്ര കോർപ്പറേറ്റ് കാര്യ മന്ത്രാലയത്തിന്റെ എംസിഎ സ്‌പൈസ് പ്ലസ് പോർട്ടലിൽ ഇനി ഫെഡറൽ ബാങ്കും. ഇതോടെ, കമ്പനി രജിസ്‌ട്രേഷൻ നടപടികളുടെ ഭാഗമായി തന്നെ സംരംഭകർക്ക് തങ്ങളുടെ ബാങ്കിങ് പങ്കാളിയായി ഫെഡറൽ ബാങ്കിനെ തിരഞ്ഞെടുക്കാം.
കമ്പനി രജിസ്‌ട്രേഷനു പുറമെ വിവിധ നിയമാനുസൃത രജിസ്‌ട്രേഷനുകളും ബാങ്ക് അക്കൗണ്ട് തുറക്കുന്നതിനുള്ള സൗകര്യവും ഒരൊറ്റ പ്ലാറ്റ്‌ഫോമിലൂടെ ലഭ്യമാക്കുന്ന സംയോജിത ഡിജിറ്റൽ സംവിധാനമാണ് എംസിഎ സ്‌പൈസ് പ്ലസ് പോർട്ടൽ.
“സംരംഭകത്വത്തിന്റെ തുടക്കം മുതൽ തന്നെ വിശ്വസനീയമായ ഒരു ബാങ്കിങ് പങ്കാളിയുടെ സേവനം ലഭ്യമാക്കുന്നതിലൂടെ ബിസിനസ് ആരംഭിക്കുന്നതിനുള്ള നടപടിക്രമങ്ങൾ കൂടുതൽ ലളിതമാക്കുകയാണ് ഈ സംയോജനത്തിലൂടെ ലക്ഷ്യമിടുന്നത്,” ഫെഡറൽ ബാങ്ക് ഇ.വി.പി. & കൺട്രി ഹെഡ്, റീട്ടെയിൽ ലയബിലിറ്റി & ഫീ പ്രോഡക്ട്സ് ജോയ് പി.വി. പറഞ്ഞു.
സ്റ്റാർട്ടപ്പുകൾ, എം.എസ്.എം.ഇകൾ, കോർപ്പറേറ്റ് ഇടപാടുകാർ എന്നിവരുടെ മാറിവരുന്ന ആവശ്യങ്ങൾ നിറവേറ്റുന്നതിനായി ഫെഡറൽ ബാങ്ക് ഡിജിറ്റൽ സംവിധാനങ്ങളും ഉപഭോക്തൃകേന്ദ്രീകൃത സേവനങ്ങളും തുടർച്ചയായി ശക്തിപ്പെടുത്തിവരുന്നു. നൂതന ഉൽപ്പന്നങ്ങൾ, ലളിതവും തടസ്സരഹിതവുമായ ഓൺബോർഡിങ് അനുഭവം, കരുത്തുറ്റ ഡിജിറ്റൽ അടിസ്ഥാനസൗകര്യങ്ങൾ എന്നിവയിലൂടെ രാജ്യത്തുടനീളം സംരംഭകത്വത്തെ പ്രോത്സാഹിപ്പിക്കുന്നതിനും ബിസിനസ് വളർച്ചയ്ക്ക് പിന്തുണ നൽകുന്നതിനും ബാങ്ക് പ്രതിജ്ഞാബദ്ധമാണ്.
Photo Caption: കേന്ദ്ര കോർപ്പറേറ്റ് കാര്യ മന്ത്രാലയം ഡയറക്ടർ കിരൺ റെഡ്ഡി ഐആർഎസുമായി ഫെഡറൽ ബാങ്ക് പ്രതിനിധികൾ കൂടിക്കാഴ്ച നടത്തിയപ്പോൾ. (ഇടത്തുനിന്ന്) ജിഐബി പ്രോജക്ട്സ് ഹെഡ് ജോബിൻ കെ. ജസ്റ്റിൻ, കറന്റ് അക്കൗണ്ട്സ് ഹെഡ് എബി പോൾ, കിരൺ റെഡ്ഡി, ഗവൺമെന്റ് & ഇൻസ്റ്റിറ്റ്യൂഷണൽ ബിസിനസ് കൺട്രി ഹെഡ് അനൂപ് ടി, ന്യൂ റിലേഷൻഷിപ്സ് (നോർത്ത്, ഈസ്റ്റ് & വെസ്റ്റ്) ഹെഡ് സണ്ണി ദഹൂജ.
Athulya Raj K R