വാഷിംഗ്ടൺ ഡിസി : അമേരിക്കയിൽ പഠിക്കുന്ന വിദേശ വിദ്യാർത്ഥികൾക്ക് ഇനിമുതൽ ഫെഡറൽ സർക്കാരിന്റെ പ്രത്യേക അനുമതിയില്ലാതെ നാല് വർഷത്തിൽ കൂടുതൽ രാജ്യത്ത് തുടരാനാകില്ലെന്ന പുതിയ നിയമം ട്രംപ് ഭരണകൂടം പുറത്തിറക്കി. സെപ്റ്റംബർ മുതൽ പ്രാബല്യത്തിൽ വരുന്ന ഈ നിയമം അനുസരിച്ച് വിദ്യാർത്ഥികൾക്ക് കോഴ്സുകളോ മേജറുകളോ മാറുന്നതിനും കർശന നിയന്ത്രണങ്ങളുണ്ടാകും.
വിദ്യാർത്ഥികൾ പഠനം നീട്ടിവെച്ച് വിസാ കാലാവധി ദുരുപയോഗം ചെയ്യുന്നത് തടയാനും നിരീക്ഷണം ശക്തമാക്കാനുമാണ് ഈ നടപടിയെന്ന് ആഭ്യന്തര സുരക്ഷാ വകുപ്പ് (DHS) വ്യക്തമാക്കി. എന്നാൽ, ഈ പുതിയ നിയന്ത്രണം വിദേശ വിദ്യാർത്ഥികളുടെ എണ്ണം കുറയ്ക്കുമെന്നും അമേരിക്കൻ സമ്പദ്വ്യവസ്ഥയെയും സർവ്വകലാശാലകളെയും പ്രതികൂലമായി ബാധിക്കുമെന്നും വിദ്യാഭ്യാസ രംഗത്തെ വിദഗ്ദ്ധർ ആശങ്കപ്പെടുന്നു.
