ഹൂസ്റ്റൺ : ഹൂസ്റ്റണിലെ ഗലേറിയ ഏരിയയിലുള്ള ഓൾഡ് നേവി വസ്ത്രവ്യാപാര ശാലയിൽ നിന്ന് സാധനങ്ങൾ മോഷ്ടിച്ച ശേഷം പോലീസിൽ നിന്ന് രക്ഷപ്പെടാൻ ശ്രമിക്കുന്നതിനിടെ, ഹൈവേ മുറിച്ചുകടന്ന രണ്ട് കൗമാരക്കാരായ പെൺകുട്ടികൾ വാഹനമിടിച്ച് മരിച്ചു. വ്യാഴാഴ്ച രാത്രി ഒമ്പതരയോടെയായിരുന്നു സംഭവം.
കടയിലെ മോഷണവിവരമറിഞ്ഞ് സ്ഥലത്തെത്തിയ പോലീസ് സംഘം പ്രതികൾ സഞ്ചരിച്ചിരുന്ന ഷെവർലെ ടാഹോ (Chevrolet Tahoe) വാഹനം തടയാൻ ശ്രമിച്ചെങ്കിലും ഡ്രൈവർ വാഹനം നിർത്താതെ ഓടിച്ചുപോവുകയായിരുന്നു. തുടർന്ന് പോലീസ് നടത്തിയ ചേസിംഗിനൊടുവിൽ, ഇവരുടെ വാഹനം മറ്റൊരു കാറുമായി ചെറിയ അപകടത്തിൽപ്പെട്ടു.
ഇതോടെ വാഹനത്തിലുണ്ടായിരുന്ന നാല് പെൺകുട്ടികളും പുറത്തിറങ്ങി അടുത്തുള്ള ഹൈവേ 288 (Highway 288) ലേക്ക് ഓടിക്കയറുകയായിരുന്നു. ഇതിൽ വടക്കൻ പാത വിജയകരമായി മുറിച്ചുകടന്നുവെങ്കിലും, തെക്കൻ പാതയിലേക്ക് പ്രവേശിച്ച രണ്ടുപേരെ വേഗത്തിൽ വന്ന വാഹനങ്ങൾ ഇടിച്ചുതെറിപ്പിച്ചു. രണ്ടുപേരും സംഭവസ്ഥലത്തുതന്നെ മരണപ്പെട്ടതായി ഹൂസ്റ്റൺ പോലീസ് അറിയിച്ചു.
