പാലക്കാട്-മുണ്ടൂർ-തൂത റോഡിൽ തുടർച്ചയായി ഉണ്ടാകുന്ന വാഹനാപകടങ്ങൾക്ക് പരിഹാരം കാണുന്നതിനും യാത്രക്കാരുടെ സുരക്ഷ ഉറപ്പാക്കുന്നതിനുമായി സർക്കാർ അടിയന്തര നടപടി സ്വീകരിക്കും. അപകടസാധ്യത ഒഴിവാക്കുന്നതിനാവശ്യമായ പ്രവൃത്തികളുടെ എസ്റ്റിമേറ്റ് കേരള സ്റ്റേറ്റ് ട്രാൻസ്പോർട്ട് പ്രോജക്ട് ഈ ആഴ്ച തന്നെ തയ്യാറാക്കി ഭരണാനുമതിക്കായി സമർപ്പിക്കും. തുടർന്ന് ഈ മാസം തന്നെ ഭരണാനുമതി നൽകാനും തീരുമാനമായി.
പൊതുമരാമത്ത് വകുപ്പ് മന്ത്രി പി.കെ. ബഷീറിന്റെയും പട്ടികജാതി പട്ടികവർഗ പിന്നോക്കക്ഷേമ വകുപ്പ് മന്ത്രി കെ.എ. തുളസിയുടെയും നേതൃത്വത്തിൽ തിരുവനന്തപുരത്ത് ചേർന്ന ഉന്നതതല അവലോകന യോഗത്തിലാണ് തീരുമാനം. കോങ്ങാട് നിയോജക മണ്ഡലത്തിലെ വിവിധ പൊതുമരാമത്ത് പ്രവൃത്തികളുടെ നിലവിലെ സ്ഥിതിയും പുരോഗതിയും വിലയിരുത്തി.
പാലക്കാട്-മുണ്ടൂർ- തൂത റോഡിൽ മുൻകാലങ്ങളിൽ പതിനഞ്ചോളം പേർക്ക് ജീവൻ നഷ്ടപ്പെട്ടിട്ടുണ്ടെന്നത് ഗൗരവത്തോടെ കാണണമെന്ന് കോങ്ങാട് എം.എൽ.എ കൂടിയായ മന്ത്രി കെ.എ. തുളസി യോഗത്തിൽ ആവശ്യപ്പെട്ടു. റോഡിലെ അപകടസാധ്യത ശാസ്ത്രീയമായി വിലയിരുത്തി യാത്രക്കാർക്ക് സുരക്ഷിത യാത്ര ഉറപ്പാക്കുന്നതിനുള്ള നടപടി അടിയന്തരമായി സ്വീകരിക്കണമെന്നും ബന്ധപ്പെട്ട ഉദ്യോഗസ്ഥർക്ക് മന്ത്രി നിർദേശം നൽകി. വിവിധ വകുപ്പുകളെ ഏകോപിപ്പിച്ച് പാതയിൽ അടിയന്തരമായി റോഡ് സേഫ്റ്റി ഓഡിറ്റിംഗ് പൂർത്തിയാക്കും. കോങ്ങാട് നിയോജക മണ്ഡലത്തിലെ അടിസ്ഥാനസൗകര്യ വികസനം ലക്ഷ്യമിട്ട് ദീർഘകാല പൊതുമരാമത്ത് പദ്ധതികൾക്ക് അടിയന്തരമായി രൂപം നൽകാനും മന്ത്രിതല യോഗത്തിൽ തീരുമാനമായി.
റോഡിലെ അടിയന്തര പരിഹാര പ്രവൃത്തികൾക്കായുള്ള എസ്റ്റിമേറ്റ് കെഎസ്ടിപി തയ്യാറാക്കി സമർപ്പിക്കുന്ന മുറയ്ക്ക് ഭരണാനുമതിയും തുടർനടപടികളും വേഗത്തിലാക്കാനും യോഗം തീരുമാനിച്ചു. വിവിധ വകുപ്പുകളുടെ ഏകോപനം ആവശ്യമായ വിഷയങ്ങളിൽ അദാലത്ത് സംഘടിപ്പിക്കാനും ധാരണയായി.
കോങ്ങാട് നിയോജക മണ്ഡലത്തിലെ റോഡുകൾ ഉൾപ്പെടെയുള്ള പൊതുമരാമത്ത് അടിസ്ഥാനസൗകര്യങ്ങളുടെ ദീർഘകാല വികസനത്തിനായി സമഗ്രമായ പദ്ധതി തയ്യാറാക്കാനും തീരുമാനിച്ചു. പൊതുമരാമത്ത് അഡീഷണൽ സെക്രട്ടറി വി ആർ വിനോദ്, പൊതുമരാമത്ത് ചീഫ് എഞ്ചിനീയർ (നിരത്തുകൾ) എ അൻസാർ, കെ.എസ്.ടി.പി ചീഫ് എഞ്ചിനീയർ ബിന്ദു, പൊതുമരാമത്ത് വകുപ്പിലെ മറ്റ് ഉന്നത ഉദ്യോഗസ്ഥർ തുടങ്ങിയവർ പങ്കെടുത്തു.
