കർഷക സുരക്ഷ–വന്യജീവി സംഘർഷ ലഘൂകരണം: സംസ്ഥാനതല കോൺക്ലേവ് സെപ്റ്റംബർ 29ന് തിരുവമ്പാടിയിൽ
കോഴിക്കോട്: കർഷക സുരക്ഷ ഉറപ്പാക്കുന്നതിനും വന്യജീവി ആക്രമണങ്ങൾ മൂലമുള്ള പ്രശ്നങ്ങൾക്ക് ശാസ്ത്രീയവും പ്രായോഗികവുമായ പരിഹാരങ്ങൾ കണ്ടെത്തുന്നതിനുമായി കർഷക സുരക്ഷ–വന്യജീവി സംഘർഷ ലഘൂകരണ സംസ്ഥാനതല കോൺക്ലേവ് സെപ്റ്റംബർ 29ന് ചൊവ്വാഴ്ച തിരുവമ്പാടിയിൽ നടക്കും. തിരുവമ്പാടി സേക്രഡ് ഹാർട്ട് ചർച്ച് പാരിഷ് ഹാളിൽ രാവിലെ 10 മുതൽ വൈകിട്ട് അഞ്ച് വരെയാണ് കോൺക്ലേവ്.
വനം വകുപ്പ് മന്ത്രി ഷിബു ബേബി ജോൺ കോൺക്ലേവ് ഉദ്ഘാടനം ചെയ്യും. കൃഷിമന്ത്രി അഡ്വ. ടി. സിദ്ദിഖ് അധ്യക്ഷത വഹിക്കും. റവന്യൂ മന്ത്രി എ.പി. അനിൽകുമാർ, എം.പിമാർ, എം.എൽ.എമാർ ഉൾപ്പെടെയുള്ള ജനപ്രതിനിധികൾ പങ്കെടുക്കും.
കൃഷിവകുപ്പ് വനംവകുപ്പുമായി സഹകരിച്ചാണ് കോൺക്ലേവ് സംഘടിപ്പിക്കുന്നത്. കേരള കാർഷിക സർവകലാശാല, അമൃത സർവകലാശാല, വെറ്ററിനറി സർവകലാശാല, ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ച് (ICAR), വൈൽഡ്ലൈഫ് ഇൻസ്റ്റിറ്റ്യൂട്ട് ഓഫ് ഇന്ത്യ (WII), കേരള ഫോറസ്റ്റ് റിസർച്ച് ഇൻസ്റ്റിറ്റ്യൂട്ട് (KFRI) എന്നിവിടങ്ങളിൽ നിന്നുള്ള വിദഗ്ധരും അഗ്രി-ടെക് സ്റ്റാർട്ടപ്പുകളും വന്യജീവി ആക്രമണം നേരിടുന്ന കർഷകരും കോൺക്ലേവിൽ പങ്കെടുക്കും.
വന്യജീവി ആക്രമണം തടയുന്നതിനും സംഘർഷസാധ്യത കുറയ്ക്കുന്നതിനുമുള്ള വിവിധ ശാസ്ത്രീയ-സാങ്കേതിക പരിഹാരങ്ങൾ കോൺക്ലേവിൽ ചർച്ച ചെയ്യും. ഇതിന്റെ ഭാഗമായി വിളാധിഷ്ഠിതം (Crop-centric), വന്യജീവിയധിഷ്ഠിതം (Species-centric), പ്രദേശാധിഷ്ഠിതം (Area-centric) എന്നിങ്ങനെ മൂന്ന് തലത്തിലുള്ള പ്രതിരോധ പദ്ധതികൾ ആവിഷ്കരിക്കും. ഓരോ പ്രദേശത്തെയും കൃഷിരീതി, വന്യജീവി സാന്നിധ്യം, ഭൂപ്രകൃതി തുടങ്ങിയ ഘടകങ്ങൾ പരിഗണിച്ചായിരിക്കും പ്രതിരോധ മാർഗങ്ങൾ രൂപപ്പെടുത്തുക. ആർട്ടിഫിഷ്യൽ ഇന്റലിജൻസ് (AI), ഡ്രോൺ, വിവിധ ഫെൻസിങ് മാതൃകകൾ തുടങ്ങിയ പ്രതിരോധ സംവിധാനങ്ങളുടെ സാധ്യതകളും പ്രായോഗികതയും പരിശോധിക്കും.
കർഷകരുടെ നേരിട്ടുള്ള അനുഭവങ്ങൾ, ശാസ്ത്രീയ പഠനങ്ങൾ, സാങ്കേതിക പരിഹാരങ്ങൾ, സ്റ്റാർട്ടപ്പ് ആശയങ്ങൾ എന്നിവ സംയോജിപ്പിച്ച് പ്രദേശാധിഷ്ഠിതവും പ്രവർത്തനാധിഷ്ഠിതവുമായ നിർദേശങ്ങൾ രൂപപ്പെടുത്തുകയാണ് ലക്ഷ്യം. കോൺക്ലേവിൽ രൂപപ്പെടുന്ന പ്രായോഗിക നിർദേശങ്ങൾ സംസ്ഥാനത്തെ വിവിധ പ്രദേശങ്ങളിൽ പൈലറ്റ് പദ്ധതികളായി ഉടൻ നടപ്പാക്കുന്നതിനുള്ള നടപടികളും സ്വീകരിക്കും.
വന്യജീവി ആക്രമണം മൂലമുള്ള വിളനാശം, വിള ഇൻഷുറൻസ് പരിരക്ഷ എന്നിവയുമായി ബന്ധപ്പെട്ട് ആവശ്യമായ പരിഷ്കാരങ്ങൾ കൊണ്ടുവരുന്നതിനുള്ള വിഷയങ്ങളും കോൺക്ലേവ് ചർച്ച ചെയ്യും.
കർഷക സുരക്ഷയ്ക്ക് മുൻഗണന നൽകി ശാസ്ത്രവും സാങ്കേതികവിദ്യയും പ്രാദേശിക അനുഭവങ്ങളും സമന്വയിപ്പിച്ച് വന്യജീവി ആക്രമണ പ്രതിരോധത്തിന് പ്രായോഗിക മാതൃകകൾ രൂപപ്പെടുത്തുന്നതിനുള്ള വേദിയാകും സംസ്ഥാനതല കോൺക്ലേവ്.
