ജനാധിപത്യം സംരക്ഷിക്കാനുള്ള രണ്ടാം സ്വാതന്ത്ര്യസമരമാണ് തിരഞ്ഞെടുപ്പ് കമ്മീഷന്റെ നടപടിക്കെതിരായ കോണ്ഗ്രസിന്റെ പോരാട്ടമെന്ന് എ.ഐ.സി.സി. ജനറല് സെക്രട്ടറി കെ.സി. വേണുഗോപാല് പറഞ്ഞു. എസ്.ഐ.ആറുമായി ബന്ധപ്പെട്ട് തിരഞ്ഞെടുപ്പ് കമ്മീഷന് സ്വീകരിച്ച വിവാദ തീരുമാനങ്ങള് തെറ്റാണെന്ന് സമ്മതിച്ചതിനാലാണ് അവ പിന്വലിക്കാന് തയ്യാറായതെന്നും അദ്ദേഹം പറഞ്ഞു. ഡല്ഹിയില് മാധ്യമങ്ങളോട് പ്രതികരിക്കുക ആയിരുന്നു കെസി വേണുഗോപാല്.
നിഷ്പക്ഷത വെടിഞ്ഞാണ് കോടിക്കണക്കിന് വോട്ടര്മാരെ കമ്മീഷന് വോട്ടര്പട്ടികയില് നിന്ന് നീക്കം ചെയ്തതെന്നും വേണുഗോപാല് ആരോപിച്ചു. തിരഞ്ഞെടുപ്പ് കമ്മീഷനെ മുഖ്യ തിരഞ്ഞെടുപ്പ് കമ്മീഷണര് ഗ്യാനേഷ് കുമാര് വെറും പാര്ട്ടി കമ്മിറ്റികളുടെ നിലവാരത്തിലേക്ക് കൊണ്ടുവന്നിരിക്കുകയാണ്. ബി.ജെ.പി. നിയമിച്ച മറ്റ് രണ്ട് കമ്മീഷന് അംഗങ്ങള് വിയോജിച്ച വിഷയങ്ങളില് പോലും നിയമവിരുദ്ധവും ഭരണഘടനാവിരുദ്ധവുമായ നടപടികള് സ്വീകരിക്കാന് ഗ്യാനേഷ് കുമാര് തയ്യാറാകുന്നത് ആര്ക്കുവേണ്ടിയാണെന്നും കെ.സി. വേണുഗോപാല് ചോദിച്ചു.
കമ്മീഷന്റെ കൂട്ടുത്തരവാദിത്തം പോലും നഷ്ടപ്പെടുത്തി നരേന്ദ്ര മോദിക്കും അമിത് ഷായ്ക്കും വേണ്ടി മുഖ്യ തിരഞ്ഞെടുപ്പ് കമ്മീഷണര് ജനാധിപത്യത്തെ അട്ടിമറിക്കാനുള്ള ക്രിമിനല് ഗൂഢാലോചനയുടെ ഭാഗമായെന്നും കെ.സി. വേണുഗോപാല് ആരോപിച്ചു.
പ്രതിപക്ഷ നേതാവ് രാഹുല് ഗാന്ധി ഹരിയാന ഉള്പ്പെടെയുള്ള സംസ്ഥാനങ്ങളില് നിന്നുള്ള തെളിവുകള് സഹിതം ഉന്നയിച്ച കാര്യങ്ങള് കമ്മീഷണര്മാര് നല്കിയ പരാതിയിലൂടെ അക്ഷരംപ്രതി ശരിയാണെന്ന് തെളിയിക്കപ്പെടുകയാണെന്നും അദ്ദേഹം പറഞ്ഞു.
നിയമപോരാട്ടം ഉള്പ്പെടെയുള്ള മുന്നോട്ടുള്ള കാര്യങ്ങള് സംബന്ധിച്ച് കോണ്ഗ്രസ് പ്രവര്ത്തകസമിതിയുടെയും ഇന്ത്യാ സഖ്യകക്ഷികളുടെയും യോഗങ്ങളില് തീരുമാനമെടുക്കുമെന്നും കെ.സി. വേണുഗോപാല് വ്യക്തമാക്കി. ജനാധിപത്യം സംരക്ഷിക്കാനുള്ള ഈ പോരാട്ടത്തില് സഹകരിക്കാന് കഴിയുന്ന എല്ലാവരും കോണ്ഗ്രസിന്റെ പോരാട്ടത്തിനൊപ്പം അണിചേരണമെന്നും അദ്ദേഹം അഭ്യര്ഥിച്ചു.
*പ്രതിഷേധിക്കാന് പോലും അനുവദിക്കാത്ത അസഹിഷ്ണുതയുടെ രാഷ്ട്രീയമാണ് ഭരണകൂടത്തിന്റേത്: കെ.സി. വേണുഗോപാല്*
പ്രതിഷേധിക്കാന് പോലും അനുവദിക്കാത്ത അസഹിഷ്ണുതയുടെ രാഷ്ട്രീയമാണ് ഭരണകൂടത്തിന്റേതെന്ന് കെ.സി. വേണുഗോപാല് പറഞ്ഞു. പഞ്ചാബിലെ ലൗലി പ്രൊഫഷണല് യൂണിവേഴ്സിറ്റിയില് ഉണ്ടായ സംഘര്ഷത്തില് പോലീസിന് വീഴ്ചയുണ്ടായെന്നും അദ്ദേഹം ആരോപിച്ചു.
ലൗലി പ്രൊഫഷണല് യൂണിവേഴ്സിറ്റിയിലെ സംഘര്ഷത്തിന്റെ പശ്ചാത്തലത്തില് മലയാളി വിദ്യാര്ഥികള് താനുമായി ബന്ധപ്പെട്ടിരുന്നുവെന്നും അവരെ നാട്ടിലെത്തിക്കുന്നതിനുള്ള എല്ലാ ക്രമീകരണങ്ങളും ചെയ്തിട്ടുണ്ടെന്നും കെ.സി. വേണുഗോപാല് വ്യക്തമാക്കി.
*തനിക്കെതിരായ സൈബര് അധിക്ഷേപത്തിന്റെ പേരില് ആരെയും ജയിലിലടയ്ക്കണമെന്ന് വാശിയുള്ള ആളല്ല: കെ.സി. വേണുഗോപാല്*
തനിക്കെതിരായ സൈബര് ആക്രമണത്തിന്റെയും അധിക്ഷേപത്തിന്റെയും പേരില് ഒരു പ്രവര്ത്തകനെയും ജയിലിലടയ്ക്കണമെന്ന് വാശിയുള്ള ആളല്ലെന്ന് കെ.സി. വേണുഗോപാല് വ്യക്തമാക്കി.സൈബര് ആക്രമണങ്ങള്ക്കെതിരായ പോലീസ് നടപടിയോട് പ്രതികരിക്കുകയായിരുന്നു അദ്ദേഹം.
നിരവധി സൈബര് ആക്രമണങ്ങള് നേരിട്ട വ്യക്തിയാണ് താനെന്നും, പ്രവര്ത്തകര് സൈബര് ഇടങ്ങളില് പാര്ട്ടിക്കുവേണ്ടിയാണ് പ്രവര്ത്തിക്കേണ്ടതെന്നും അദ്ദേഹം പറഞ്ഞു. നേതാക്കളെ അവഹേളിക്കാനല്ല സൈബര് ഇടങ്ങള് ഉപയോഗിക്കേണ്ടതെന്നും അദ്ദേഹം വ്യക്തമാക്കി.
താന് കേള്ക്കേണ്ടതെല്ലാം ഇതിനോടകം കേട്ടുകഴിഞ്ഞു. ഇനി ആരുടെയെങ്കിലും പേരില് കേസെടുക്കുന്നതിനോടും തന്റെ പേരില് ഒരു കോണ്ഗ്രസ് പ്രവര്ത്തകനെ ഈ കേസുമായി ബന്ധപ്പെടുത്തി പോലീസ് സ്റ്റേഷനിലേക്ക് വലിച്ചിഴയ്ക്കുന്നതിനോടും തനിക്ക് യോജിപ്പില്ലെന്നും കെ.സി. വേണുഗോപാല് പ്രതികരിച്ചു.
*അമിത് ഷാ പ്രതിഷേധങ്ങള്ക്ക് അതീതനായ ദൈവമല്ല: കെ.സി. വേണുഗോപാല്*
അമിത് ഷായ്ക്കെതിരായ യൂത്ത് കോണ്ഗ്രസിന്റെ പ്രതിഷേധത്തെക്കുറിച്ചും കെ.സി. വേണുഗോപാല് പ്രതികരിച്ചു. ജന്തര് മന്തറിലെ പെല്ലറ്റ് ആക്രമണത്തില് പാര്ലമെന്റില് മറുപടി പറയാതെ ഒളിച്ചോടിയ ആളാണ് അമിത് ഷാ. ഗ്യാനേഷ് കുമാര് തിരഞ്ഞെടുപ്പ് സംവിധാനത്തെ അട്ടിമറിക്കുന്നത് ആര്ക്കുവേണ്ടിയാണെന്നും അദ്ദേഹം ചോദിച്ചു. ഇതിന്റെയെല്ലാം പശ്ചാത്തലത്തില് അമിത് ഷായ്ക്കെതിരായ പ്രതിഷേധം ഉണ്ടാകുന്നത് സ്വാഭാവികമാണ്. പ്രതിഷേധങ്ങള്ക്ക് അതീതനായ ദൈവമൊന്നുമല്ല ആഭ്യന്തരമന്ത്രിയെന്നും യൂത്ത് കോണ്ഗ്രസിന്റെ പ്രതിഷേധത്തെ മറ്റൊരു തരത്തില് ചിത്രീകരിക്കുന്നത് ശരിയല്ലെന്നും കെ.സി. വേണുഗോപാല് പറഞ്ഞു.
