കൊച്ചി: ഹൈക്കോടതി ജസ്റ്റിസുമാരായ ബെച്ചു കുര്യൻ തോമസ്, പി. ഗോപിനാഥ് എന്നിവർ ഭാരത് പെട്രോളിയം കോർപ്പറേഷൻ ലിമിറ്റഡിന്റെ (ബി.പി.സി.എൽ) ബ്രഹ്മപുരത്തെ കംപ്രസ്ഡ് ബയോഗ്യാസ് പ്ലാന്റ് (സി.ബി.ജി) സന്ദർശിച്ചു. ജൈവ മാലിന്യങ്ങൾ ശാസ്ത്രീയമായി സംസ്കരിച്ച് ഊർജ്ജമാക്കി മാറ്റുന്ന പ്ലാന്റിന്റെ പ്രവർത്തനങ്ങൾ ജഡ്ജിമാർ നേരിട്ട് കണ്ട് വിലയിരുത്തി. ബ്രഹ്മപുരത്തെ ബി.പി.സി.എല്ലിന്റെ സി.ബി.ജി പ്ലാന്റ് ‘സംസ്ഥാനത്തെ ജൈവമാലിന്യ സംസ്കരണ രംഗത്തെ വിജയ മാതൃകയാണെന്ന്’ ജസ്റ്റിസ് ബെച്ചു കുര്യൻ തോമസ് വിലയിരുത്തി. ജൈവമാലിന്യങ്ങളെ ഊർജ്ജവും ജൈവവളവുമാക്കി മാറ്റുന്ന ബ്രഹ്മപുരത്തെ മാതൃകാപരമായ പ്രവർത്തനങ്ങൾക്കുള്ള അംഗീകാരമാണ് ജസ്റ്റിസിന്റെ നിരീക്ഷണം.
2023 മാർച്ചിൽ ബ്രഹ്മപുരത്തുണ്ടായ തീപിടിത്തത്തെ തുടർന്ന്, നഗരത്തിലെ മാലിന്യ പ്രശ്നങ്ങൾക്ക് ശാശ്വത പരിഹാരം കാണാൻ ഹൈക്കോടതി ഉത്തരവിട്ടിരുന്നു. ഇതിന്റെ അടിസ്ഥാനത്തിലാണ് ബി.പി.സി.എൽ. സി.ബി.ജി പ്ലാന്റ് പദ്ധതിക്ക് രൂപം നൽകിയത്. കൊച്ചി കോർപ്പറേഷൻ നൽകുന്ന, ഉറവിടത്തിൽ തന്നെ തരംതിരിച്ച 150 ടൺ ജൈവ മാലിന്യങ്ങൾ ദിവസേന സംസ്കരിക്കാനാണ് പ്ലാന്റ് രൂപകൽപ്പന ചെയ്തിരിക്കുന്നത്. അനറോബിക് ഡൈജഷൻ (വായുമില്ലാ സംസ്കരണം) വഴി ജൈവമാലിന്യങ്ങളെ ബയോഗ്യാസ് ആക്കി മാറ്റുകയും, അത് ശുദ്ധീകരിച്ച് കംപ്രസ്ഡ് ബയോഗ്യാസ് (സി.ബി.ജി) ആയി മാറ്റുകയും ചെയ്യുന്നു. പ്രക്രിയയ്ക്കുശേഷമുള്ള അവശിഷ്ടങ്ങൾ ഗുണനിലവാരമുള്ള ജൈവവളമാക്കി മാറ്റുന്നുണ്ട്.
പ്ലാന്റ് പൂർണ്ണ തോതിൽ പ്രവർത്തനക്ഷമമാകുന്നതോടെ ദിവസേന ഏകദേശം 5.6 ടൺ സി.ബി.ജിയും 28 ടൺ ജൈവവളവും ഉത്പാദിപ്പിക്കാൻ സാധിക്കുമെന്നാണ് പ്രതീക്ഷിക്കുന്നത്. ഇവിടെ ഉത്പാദിപ്പിക്കുന്ന സി.ബി.ജി പ്രത്യേക പൈപ്പ്ലൈൻ വഴി ബി.പി.സി.എല്ലിന്റെ കൊച്ചി റിഫൈനറിയിലേക്ക് ഇന്ധനമായി ഉപയോഗിക്കാൻ എത്തിക്കും.
Julie John
