കാന്‍സര്‍ അവബോധവും ചികില്‍സാ സഹായവും സംയോജിപ്പിച്ചു നടപ്പാക്കുന്ന സിഎസ്ആര്‍ പദ്ധതിയായ സഞ്ജീവനിക്കു കീഴില്‍ മുംബൈ അന്ധേരിയിലെ ഹോളി സ്പിരിറ്റ് ആശുപത്രിയുമായി ഫെഡറല്‍ ബാങ്ക് ഹോര്‍മിസ് ഫൗണ്ടേഷന്‍ ധാരണാ പത്രം ഒപ്പു വെച്ചു.
ഇതിന്റെ ഭാഗമായി ഹോളി സ്പിരിറ്റ് ആശുപത്രിയുടെ ഗുണഭോക്തൃ പിന്തുണാ പദ്ധതിക്ക് ഫൗണ്ടേഷന്‍ 75 ലക്ഷം രൂപ സംഭാവന നല്‍കി. പദ്ധതിയുടെ ധാരണാ പത്രം ഫെഡറല്‍ ബാങ്ക് മുംബൈ സോണ്‍ മേധാവിയും സീനിയര്‍ വൈസ് പ്രസിഡന്റുമായ റിഷി ഝായും ഹോളി സ്പിരിറ്റ് ആശുപത്രി എസ്‌കിക്യൂട്ടീവ് ഡയറക്ടറുമായ ലിസ്സി ദേവസ്സിയും കൈമാറി.
ചടങ്ങില്‍ ബാങ്കിന്റെ റീജണല്‍ മേധാവിയും ഡെപ്യൂട്ടി വൈസ് പ്രസിഡന്റുമായ അരുണ്‍ രാജു, മുംബൈ സോണല്‍ സെയില്‍സ് മേധാവിയും ഡെപ്യൂട്ടി വൈസ് പ്രസിഡന്റുമായ പര്‍വേഷ് ഹബ്ലാനി, ബാങ്കിന്റെ മറ്റ് മുതിര്‍ന്ന ഉദ്യോഗസ്ഥര്‍, ഹോളി സ്പിരിറ്റ് ആശുപത്രി ഫിനാന്‍സ് ഡയറക്ടര്‍ സിസ്റ്റര്‍ ശ്രുതി ചാക്കോ, കാന്‍സര്‍ സെന്റര്‍ ഇന്‍ ചാര്‍ജ് സിസ്റ്റര്‍ മെറ്റില്‍ഡ ജോര്‍ജ്ജ്, റേഡിയേഷന്‍ ഓങ്കോളജിസ്റ്റ് ഡോ. അജയ് കോല്‍സെ, ചീഫ് ഫിനാന്‍ഷ്യല്‍ ഓഫിസര്‍ കെ വി രവീന്ദ്രകുമാര്‍ തുടങ്ങിയവർ പങ്കെടുത്തു.
ഫെഡറൽ ബാങ്കിന്റെ സി.എസ്.ആർ പദ്ധതിയായ സഞ്ജീവനിയിലൂടെ ഇതുവരെ 13,645 പേർക്ക് കാൻസർ സ്‌ക്രീനിംഗ് നടത്തിയിട്ടുണ്ട്. കൂടാതെ 33,014 ഗുണഭോക്താക്കൾക്ക് ബോധവത്ക്കരണം, രോഗനിർണ്ണയം, പരിശോധന, ചികിത്സാസഹായം, രോഗീപരിചരണം തുടങ്ങിയ ആവശ്യങ്ങൾക്കുള്ള സഹായവും നൽകിയിട്ടുണ്ട്.
സമൂഹത്തിന്റെ ആവശ്യങ്ങള്‍ മനസിലാക്കി ജനങ്ങളുടെ ജീവിതത്തില്‍ നിര്‍ണായകമായ വ്യത്യാസം പ്രദാനം ചെയ്യുന്ന പിന്തുണാ നീക്കങ്ങള്‍ നടത്തുന്നതിലൂടെയാണ് അര്‍ത്ഥവത്തായ മാറ്റങ്ങള്‍ ആരംഭിക്കുന്നതെന്നു തങ്ങള്‍ വിശ്വസിക്കുന്നതായി ഇതേക്കുറിച്ചു സംസാരിക്കവെ ബാങ്ക് സീനിയര്‍ വൈസ് പ്രസിഡന്റ് റിഷി ഝാ പറഞ്ഞു. സുസ്ഥിരമായ സാമൂഹിക പ്രതിഫലനങ്ങളുണ്ടാക്കുന്നതും, ക്രിയാത്മകമായ പ്രവര്‍ത്തനങ്ങള്‍ തുടരാനുള്ള ശ്രമങ്ങളുടെ ഭാഗമായുമുള്ള ബാങ്കിന്റെ മറ്റൊരു ചുവടുവെപ്പാണ് ധാരണാപത്രമെന്ന് അദ്ദേഹം ചൂണ്ടിക്കാട്ടി.
വ്യക്തിപരമായ ഉണര്‍വ്വിനും ദേശീയ വികസനത്തിനും ആവശ്യമായ അടിസ്ഥാനപരമായ ഘടകമാണ് ആരോഗ്യം എന്നു മനസിലാക്കിയുള്ള പദ്ധതികളാണ് സഞ്ജീവനി ഉള്‍പ്പെടെയുള്ള ഫെഡറല്‍ ബാങ്കിന്റെ സാമൂഹിക പ്രതിബദ്ധതാ പദ്ധതികൾ.
Athulya Raj K R
