തിരുവനന്തപുരം : പ്രതിക്ഷ നേതാവ് പിണറായി വിജയൻ, മകൾ വീണ വിജയൻ, മുൻമന്ത്രി പി.എ. മുഹമ്മദ് റിയാസ് എന്നിവർ നൽകിയ ഹർജി ഹൈക്കോടതി ഡിവിഷൻ ബെഞ്ച് തള്ളിയതോടെ ഇവർക്കെതിരായ അഴിമതി ആരോപണങ്ങൾ രാഷ്ട്രീയപ്രേരിതമാണെന്ന സിപിഎമ്മിന്റെ വാദം പൂർണമായും അപ്രസക്തമായെന്ന് കെപിസിസി പ്രസിഡന്റ് സണ്ണി ജോസഫ്.
ആരോപണങ്ങൾ പ്രഥമദൃഷ്ട്യാ നിലനിൽക്കുന്നതാണെന്ന സിംഗിൾ ബെഞ്ചിന്റെ ഉത്തരവ് ശരിവെച്ചുകൊണ്ടുള്ള ഡിവിഷൻ ബെഞ്ചിന്റെ വിധി സിപിഎം നേതൃത്വത്തിന്റെയും അണികളുടെയും കണ്ണുതുറപ്പിക്കാൻ പര്യാപ്തമാണ്. കോടതിവിധികളെ രാഷ്ട്രീയപ്രേരിതമെന്ന് മുദ്രകുത്തി ജനങ്ങളെ തെറ്റിദ്ധരിപ്പിക്കാനുള്ള സിപിഎമ്മിന്റെ ശ്രമങ്ങൾ ഇനി വിലപ്പോവില്ല.
രണ്ട് കോടതികളുടെയും വിധികൾ ഉൾക്കൊണ്ട് അന്വേഷണവുമായി സഹകരിക്കാനും നിയമനടപടികളെ നേരിടാനും സിപിഎം നേതൃത്വം തയ്യാറാകണം. അഴിമതി ആരോപണങ്ങൾ ഉയരുമ്പോൾ രാഷ്ട്രീയ പകപോക്കലാണെന്ന് ആരോപിച്ച് ഉത്തരവാദിത്വത്തിൽനിന്ന് ഒഴിഞ്ഞുമാറുന്ന സമീപനം ജനാധിപത്യത്തോടും നിയമവ്യവസ്ഥയോടുമുള്ള വെല്ലുവിളിയാണ്. നിയമത്തിന് മുന്നിൽ എല്ലാവരും ഒരുപോലെയാണെന്ന യാഥാർഥ്യം സിപിഎം നേതൃത്വം അംഗീകരിക്കണമെന്നും സണ്ണി ജോസഫ് ആവശ്യപ്പെട്ടു.