കണ്ണൂർ: സ്തനാർബുദ ബോധവൽക്കരണ മാസാചരണത്തിന്റെ ഭാഗമായി കണ്ണൂർ ബേബി മെമ്മോറിയൽ ഹോസ്പിറ്റലും (ബിഎംഎച്ച്) മദേഴ്സ് ആർമി കണ്ണൂരും സംയുക്തമായി ‘പിങ്ക് ബൈക്ക് റാലി’ സംഘടിപ്പിച്ചു. സ്തനാർബുദത്തിനെതിരെ ഒരുമിച്ച് മുന്നേറാം എന്ന സന്ദേശവുമായി സംഘടിപ്പിച്ച റാലിയിൽ ജില്ലയുടെ വിവിധ ഭാഗങ്ങളിൽ നിന്നുള്ള നൂറുകണക്കിന് സ്ത്രീകൾ പങ്കെടുത്തു. പിങ്ക് പൊലീസ് എഎസ്ഐ റോജ പി. ബൈക്ക് റാലി ഫ്ലാഗ് ഓഫ് ചെയ്തു. റാലി കണ്ണൂർ ബിഎംഎച്ചിൽ നിന്ന് ആരംഭിച്ച് റെയിൽവേ സ്റ്റേഷൻ, കാൽടെക്സ് വഴി തിരിച്ച് ബിഎംഎച്ചിൽ തന്നെ അവസാനിച്ചു. സ്തനാർബുദം നേരത്തെ കണ്ടുപിടിച്ച് ചികിത്സ ഉറപ്പാക്കേണ്ടതിന്റെ ആവശ്യകത പൊതുജനങ്ങളിലേക്ക് എത്തിച്ച റാലി പങ്കാളിത്തത്താൽ ശ്രദ്ധനേടി.
രോഗം നേരത്തേ തിരിച്ചറിഞ്ഞ് കൃത്യമായ ചികിത്സ ഉറപ്പാക്കുകയാണ് സ്തനാർബുദത്തെ അതിജീവിക്കാനുള്ള ഏറ്റവും മികച്ച മാർഗമെന്ന് ബിഎംഎച്ച് മെഡിക്കൽ ഓങ്കോളജി വിഭാഗം കൺസൾട്ടന്റായ ഡോക്ടർ അരുൺ മോഹൻ പറഞ്ഞു. സ്തനത്തിലെ കോശങ്ങൾ അനിയന്ത്രിതമായി വളർന്ന് മുഴകളായി മാറുന്ന അവസ്ഥയാണ് സ്തനാർബുദം. കൃത്യമായ സ്വയം പരിശോധനയും മാമോഗ്രാമും വഴി ആദ്യഘട്ടത്തിൽ തന്നെ സ്തനാർബുദം തിരിച്ചറിയാൻ സാധിക്കും. മാസമുറയുള്ളവർ ആർത്തവം അവസാനിച്ചതിന് ശേഷവും മറ്റുള്ളവർ എല്ലാ മാസവും നിശ്ചിത ദിവസം തിരഞ്ഞെടുത്തും സ്തനങ്ങൾ സ്വയം പരിശോധിക്കുന്ന ശീലം പിന്തുടരണം. സ്തനങ്ങളിൽ വേദനയില്ലാത്ത മുഴകളോ അസാധാരണമായ മാറ്റങ്ങളോ സ്തനാർബുദത്തിന്റെ ലക്ഷണങ്ങളാകാമെന്നും ഡോക്ടർ കൂട്ടിച്ചേർത്തു.
കേരളത്തിൽ സ്ത്രീകളെ ബാധിക്കുന്ന അർബുദങ്ങളിൽ ഏറ്റവും മുന്നിലാണ് സ്തനാർബുദം. ഇതുസംബന്ധിച്ച് പൊതുജനങ്ങളിൽ കൂടുതൽ അവബോധം വളർത്താൻ ഇത്തരം വേറിട്ട പരിപാടികൾ തുടർന്നും സംഘടിപ്പിക്കുമെന്ന് ബിഎംഎച്ച് അധികൃതർ അറിയിച്ചു.
Anju V Nair