കൊച്ചി: മുതിർന്ന പൗരന്മാരുടെ സ്ഥിരനിക്ഷേപങ്ങൾക്കുള്ള അധിക പലിശനിരക്കിൽ വർദ്ധനവ് വരുത്തി ഫെഡറൽ ബാങ്ക്. നിലവിൽ ലഭിക്കുന്ന 0.50 ശതമാനത്തിനു പകരം 0.60 ശതമാനം പലിശയാണ് സ്ഥിരനിക്ഷേപങ്ങൾക്ക് ഇനി മുതൽ അധികമായി ലഭിക്കുക. ഇതോടെ മുതിർന്ന പൗരന്മാർക്കുള്ള സ്ഥിര നിക്ഷേപ പലിശനിരക്ക് 7.50 ശതമാനം വരെയായി ഉയർന്നു. 18 മാസം, രണ്ട് വർഷം മുതൽ മൂന്ന് വർഷത്തിൽ താഴെയുമുള്ള കാലാവധികളിലെ സ്ഥിരനിക്ഷേപങ്ങളുടെ പലിശനിരക്കും വർധിപ്പിച്ചിട്ടുണ്ട്.
കാലാവധിക്ക് മുൻപ് പിൻവലിക്കാൻ സൗകര്യമുള്ള നിക്ഷേപങ്ങൾക്ക് മേൽപ്പറഞ്ഞ കാലയളവിൽ 7.40 ശതമാനം പലിശ ലഭിക്കും. ഇതേ കാലയളവിൽ, ഒരു കോടി രൂപയിൽ കൂടുതലുള്ള, കാലാവധിക്ക് മുൻപ് പിൻവലിക്കാൻ സൗകര്യമില്ലാത്ത നിക്ഷേപങ്ങൾക്ക് 7.50 ശതമാനം പലിശ ലഭിക്കും. 35 മാസത്തേക്കുള്ള ഇത്തരം നിക്ഷേപങ്ങളുടെ ഫലപ്രദ വാർഷിക ആദായം യഥാക്രമം 8.18 ശതമാനവും 8.30 ശതമാനവുമാണ്. ഈ കാലാവധിയിലുള്ള സ്ഥിര നിക്ഷേപ പദ്ധതികൾക്ക് മുതിർന്ന പൗരന്മാർ അല്ലാത്ത പൊതുജനങ്ങൾക്കും (എൻആർഇ/എൻആർഒ നിക്ഷേപങ്ങൾ ഉൾപ്പെടെ) യഥാക്രമം 6.80 ശതമാനവും 6.90 ശതമാനവും വാർഷിക പലിശ ലഭ്യമാണ്.
പുതുക്കിയ നിരക്കുകൾ നവംബർ 12 മുതൽ പ്രാബല്യത്തിലായി. ₹3 കോടിയിൽ താഴെയുള്ള ഒറ്റത്തവണ സ്ഥിര നിക്ഷേപങ്ങൾക്കാണ് ഈ നിരക്കുകൾ ബാധകം.
ഇടപാടുകാർക്ക്, പ്രത്യേകിച്ച് സുരക്ഷിതവും മികച്ച ആദായം നൽകുന്നതുമായ സ്ഥിരനിക്ഷേപ അവസരങ്ങൾ തേടുന്ന മുതിർന്ന പൗരന്മാർക്ക്, കൂടുതൽ മൂല്യം നൽകാനുള്ള ബാങ്കിന്റെ പ്രതിബദ്ധതയാണ് പുതുക്കിയ പലിശ നിരക്കുകൾ വ്യക്തമാക്കുന്നതെന്ന് ബാങ്കിന്റെ എക്സിക്യുട്ടീവ് വൈസ് പ്രസിഡന്റും റീട്ടെയ്ൽ ലയബിലിറ്റി & ഫീ പ്രോഡക്ട് കൺട്രി ഹെഡുമായ ജോയ് പി വി പറഞ്ഞു. ഉറപ്പുള്ള ആദായവും കാലാവധിക്കു മുമ്പ് പണം പിൻവലിക്കാനുള്ള സൗകര്യവും ഒരുപോലെ ലഭിക്കുന്നതിനാൽ, സുരക്ഷയും പണലഭ്യതയും മികച്ച വരുമാനവും ആഗ്രഹിക്കുന്നവർക്ക് ഈ നിക്ഷേപങ്ങൾ മികച്ച സമ്പാദ്യ മാർഗമാണെന്നും അദ്ദേഹം കൂട്ടിച്ചേർത്തു.
ഫെഡറൽ ബാങ്ക് ശാഖകളിൽ നിന്ന് നേരിട്ടും ഡിജിറ്റൽ സൗകര്യങ്ങൾ മുഖേനയും ഇടപടുകാർക്ക് സ്ഥിരനിക്ഷേപം തുടങ്ങാം.
Athulya Raj K R