സയ്യിദ് മുഷ്താഖ് അലി ടൂർണമെന്റിൽ പോണ്ടിച്ചേരിയെ 18 റൺസിന് തോൽപ്പിച്ച് കേരളം

Spread the love

ന്യൂ ചണ്ഡീഗഢ്: സയ്യിദ് മുഷ്താഖ് അലി ട്വന്റി 20 ടൂർണമെന്റിൽ പോണ്ടിച്ചേരിക്കെതിരെ കേരളത്തിന് 18 റൺസ് വിജയം. ഓപ്പണർമാരായ മുഹമ്മദ് അസറുദ്ദീന്റെയും രോഹൻ കുന്നുമ്മലിന്റെയും മികച്ച ബാറ്റിങ്ങും എം.ഡി. നിധീഷിന്റെ ഉജ്ജ്വല ബൗളിങ്ങുമാണ് കേരളത്തിന് വിജയമൊരുക്കിയത്. ആദ്യം ബാറ്റ് ചെയ്ത കേരളം 20 ഓവറിൽ നാല് വിക്കറ്റ് നഷ്ടത്തിൽ 204 റൺസെടുത്തു. മറുപടി ബാറ്റിങ്ങിന് ഇറങ്ങിയ പോണ്ടിച്ചേരിക്ക് എട്ട് വിക്കറ്റ് നഷ്ടത്തിൽ 186 റൺസ് മാത്രമാണ് നേടാനായത്.

സ്കോ‍ർ – കേരളം 20 ഓവറിൽ 204/4, പോണ്ടിച്ചേരി‌ 20 ഓവറിൽ 186/8

ടോസ് നേടി ബാറ്റിങ് തെരഞ്ഞെടുത്ത കേരളത്തിന് ഓപ്പണർമാർ നൽകിയ തകർപ്പൻ തുടക്കമാണ് കരുത്ത് പക‍ർന്നത്. മുഹമ്മദ് അസറുദ്ദീനും രോഹൻ കുന്നുമ്മലും ചേർന്ന് 11.5 ഓവറിൽ 118 റൺസാണ് അടിച്ചുകൂട്ടിയത്. ബൗളർമാരെ തലങ്ങുംവിലങ്ങും പായിച്ച ഇരുവരും ചേ‍ർന്ന് 11ആം ഓവറിൽ തന്നെ കേരളത്തിൻ്റെ സ്കോ‍ർ 100 കടത്തി. ഇരുവരും ഒരേ ഓവറിൽ തന്നെയാണ് അർദ്ധസെഞ്ച്വറി പൂർത്തിയാക്കിയത്. രോഹൻ 31ഉം അസർ 33ഉം പന്തുകളിലുമാണ് അൻപത് പിന്നിട്ടത്. തൊട്ടടുത്ത ഓവറിൽ 59 റൺസെടുത്ത രോഹൻ മടങ്ങി. 35 പന്തുകളിൽ മൂന്ന് ഫോറും നാല് സിക്സുമടക്കമാണ് രോഹൻ 59 റൺസെടുത്തത്.

തുടർന്നെത്തിയ വിഷ്ണു വിനോദും അതേ ശൈലിയിൽ ബാറ്റ് വീശിയതോടെ 15-ാം ഓവറിൽ കേരളത്തിന്റെ സ്കോർ 150 പിന്നിട്ടു. 17-ാം ഓവറിൽ മുഹമ്മദ് അസറുദ്ദീൻ പുറത്തായി. 48 പന്തുകളിൽ ഏഴ് ഫോറും മൂന്ന് സിക്സറുമടക്കം 78 റൺസാണ് അസറുദ്ദീൻ നേടിയത്. അടുത്ത ഓവറിൽ വിഷ്ണു വിനോദും (34) മടങ്ങി. തുടർന്നെത്തിയ സഞ്ജു സാംസൺ ഒൻപത് പന്തുകളിൽ 17 റൺസ് നേടി കേരളത്തിൻ്റെ സ്കോ‍ർ 200 കടത്തി. പോണ്ടിച്ചേരിക്ക് വേണ്ടി അമൻ ഖാൻ രണ്ട് വിക്കറ്റ് വീഴ്ത്തി.

മറുപടി ബാറ്റിങ്ങിന് ഇറങ്ങിയ പോണ്ടിച്ചേരിക്ക് ആദ്യ ഓവറിൽ തന്നെ രണ്ട് വിക്കറ്റ് നഷ്ടമായി. ഓവറിലെ അവസാന രണ്ട് പന്തുകളിൽ ആകാശ് പുകഴന്തിയെയും (6) എസ്. പരമേശ്വരനെയും (0) പുറത്താക്കി എം.ഡി. നിധീഷാണ് പോണ്ടിച്ചേരിക്ക് ഇരട്ടപ്രഹരമേൽപ്പിച്ചത്. മൂന്നാം വിക്കറ്റിൽ ഭാനു ആനന്ദും പ്രസാദ് പവാറും ചേർന്ന് 37 റൺസ് കൂട്ടിച്ചേർത്തു. എന്നാൽ തിരിച്ചുവരവിനുള്ള പോണ്ടിച്ചേരിയുടെ ശ്രമങ്ങൾക്ക് തടയിട്ട് എം.ഡി. നിധീഷ് വീണ്ടും ആഞ്ഞടിച്ചു. അഞ്ചാം ഓവറിലെ നാലാം പന്തിൽ ഭാനു ആനന്ദിനെ (9) പുറത്താക്കിയ നിധീഷ് അടുത്ത പന്തിൽ ഐ.പി.എല്ലിലെ വെടിക്കെട്ട് താരം ശശാങ്ക് സിങ്ങിനെയും മടക്കിയയച്ചു.

ഇതോടെ സമ്മർദ്ദത്തിലായ പോണ്ടിച്ചേരിക്ക് പ്രസാദ് പവാറും അങ്കിത് ശർമ്മയും ചേർന്ന ആറാം വിക്കറ്റ് കൂട്ടുകെട്ട് പ്രതീക്ഷ നൽകി. ഇരുവരും ചേർന്ന് 47 പന്തുകളിൽ 73 റൺസ് കൂട്ടിച്ചേർത്തു. എന്നാൽ 67 റൺസെടുത്ത പ്രസാദ് പവാറിനെ കാർത്തിക് ബി. നായരും 45 റൺസെടുത്ത അങ്കിത് ശർമ്മയെ കെ.എം. ആസിഫും പുറത്താക്കിയതോടെ കളി കേരളത്തിന്റെ വരുതിയിലായി. അവസാന ഓവറുകളിൽ 19 പന്തുകളിൽ നിന്ന് 34 റൺസെടുത്ത സാഗർ ത്രിവേദിയുടെ ബാറ്റിങ്ങാണ് പോണ്ടിച്ചേരിയുടെ സ്കോർ 186 വരെ എത്തിച്ചത്. കേരളത്തിന് വേണ്ടി എം.ഡി. നിധീഷ് നാലും കാർത്തിക് ബി. നായർ രണ്ടും വിക്കറ്റുകൾ വീഴ്ത്തി.4 വിക്കറ്റ് നേടിയ എം.ഡി. നിധീഷാണ് പ്ലയർ ഓഫ് ദി മാച്ച്

RAJESH

Leave a Reply

Your email address will not be published. Required fields are marked *