ജനങ്ങള്‍ക്ക് നീതി പുനഃപ്രതിജ്ഞ ചെയ്യുന്ന മാഗ്‌നാകാര്‍ട്ടയാണ് പ്രകടനപത്രികയെന്ന് കോണ്‍ഗ്രസ് പ്രവര്‍ത്തക സമിതിയംഗം രമേശ് ചെന്നിത്തല ചൂണ്ടിക്കാട്ടി രാജ്യത്ത് ഭിന്നിപ്പിക്കപ്പെട്ട ജനവിഭാഗങ്ങളെ ഒന്നിപ്പിക്കുന്നതിനായി രാഹുല്‍ ഗാന്ധി നടത്തിയ രണ്ട് ഭാരത് ജോഡോ യാത്രകളില്‍ ജനങ്ങള്‍ പങ്കുവെച്ച അഭിപ്രായങ്ങളും നിര്‍ദ്ദേശങ്ങളുമാണ് പ്രകടന പത്രികയിലുള്ളത്.
തെരഞ്ഞെടുപ്പില്‍ 400-ലേറെ സീറ്റുകള്‍ ലഭിക്കുമെന്നും അധികാരത്തിലേറിയാല്‍ ഭരണഘടന തിരുത്തിയെഴുതുമെന്നും പ്രഖ്യാപിക്കുന്ന പ്രധാനമന്ത്രിയും പാര്‍ട്ടിയും രാജ്യത്തിന് അപകടമാണ്. ലോകത്തെ ഏറ്റവും മികച്ച ഭരണഘടനയാണ് നമ്മുടേത്. അത് തിരുത്തിയെഴുതാനുള്ള അവസരം സംഘ്പരിവാറിന് നല്‍കരുത്. പാര്‍ലമെന്റിനെ ദുര്‍ബലപ്പെടുത്തുകയും പാര്‍ലമെന്ററി സംവിധാനങ്ങളെ തച്ചുതകര്‍ക്കുകയും ചെയ്തതടക്കമുള്ള പത്തുവര്‍ഷത്തെ കിരാത ഭരണം അവസാനിപ്പിക്കാന്‍ തെരഞ്ഞെടുപ്പില്‍ ജനങ്ങള്‍ മുന്നോട്ടുവരണമെന്ന് അദ്ദേഹം അഭ്യര്‍ത്ഥിച്ചു.
