മാഫിയ സംരക്ഷനായ മുഖ്യമന്ത്രി രാജിവെയ്ക്കുക, തൃശ്ശൂര്‍പൂരം കലക്കിയ സിപിഎം-ബിജെപി ഗൂഢാലോചനയില്‍ ജുഡീഷ്യല്‍ അന്വേഷണം നടത്തുക,ആഭ്യന്തര വകുപ്പിലെ ക്രിമിനല്‍വത്ക്കരണം അവസാനിപ്പിക്കുക,വിലക്കയറ്റം തടയാന്‍ സര്‍ക്കാര്‍ പൊതുവിപണിയില്‍ ഇടപെടുക എന്നീ ആവശ്യങ്ങള്‍ ഉന്നയിച്ച് കോണ്‍ഗ്രസ് നടത്തി വരുന്ന പ്രക്ഷോഭ പരിപാടികളുടെ തുടര്‍ച്ചയായി ഒക്ടോബര്‍ 5 മുതല്‍ 20 വരെ നടത്തുന്ന ‘ജനദ്രോഹ സര്‍ക്കാരിനെതിരെ ജനകീയ പ്രക്ഷോഭം ‘എന്ന സംസ്ഥാന ക്യാമ്പയിന് തുടക്കമായി.
ജനദ്രോഹ പിണറായി ഭരണത്തിനെതിരെ കോണ്‍ഗ്ര നടത്തിവരുന്ന തുടര്‍ച്ചയായ സമരത്തിന്റെ ഭാഗമായാണ് സംസ്ഥാന ക്യാമ്പയിന് സംഘടിപ്പിക്കുന്നത്.1494 മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തില്‍ 1500 കേന്ദ്രങ്ങളിലായി രാഷ്ട്രീയ വിശദീകരണ യോഗങ്ങള്‍ നടക്കും. അതിന്റെ ജില്ലാതല ഉദ്ഘാടനം പന്ത്രണ്ട് ഡിസിസികളില്‍ ഇന്ന് നടന്നു. സംസ്ഥാനതല ഉദ്ഘാടനം വയനാട് മാനന്തവാടി മണ്ഡലത്തിലെ ഗാന്ധി പാര്‍ക്കില്‍ കെ.പി.സി.സി പ്രസിഡന്റ് കെ.സുധാകരന്‍ എംപി നിര്‍വഹിച്ചു. കെപിസിസി വര്‍ക്കിംഗ് പ്രസിഡന്റ് ടി.സിദ്ധിഖ് പങ്കെടുത്തു. തിരുവനന്തപുരത്ത് 6നും കാസര്‍കോഡ് 9നും ജില്ലാതല ഉദ്ഘാടനങ്ങള്‍ നടക്കും.
കോഴിക്കോട് ഇലത്തൂര്‍ ബ്ലോക്കിലെ എലഞ്ഞിക്കല്‍ മണ്ഡലത്തില്‍ പ്രതിപക്ഷ നേതാവ് വി.ഡി.സതീശനും കണ്ണൂര്‍ ധര്‍മ്മടം ബ്ലോക്കിലെ ചക്കരക്കല്‍ മണ്ഡലത്തില്‍ യുഡിഎഫ് കണ്‍വീനര്‍ എം.എം.ഹസ്സനും കൊല്ലം ശാസ്താംകോട്ട ബ്ലോക്ക്, ശാസ്താംകോട്ട വെസ്റ്റ് മണ്ഡലത്തില്‍ കോണ്‍ഗ്രസ് പ്രവര്‍ത്തക സമിതി അംഗം കൊടിക്കുന്നില്‍ സുരേഷും എറണാകുളം വൈറ്റില ബ്ലോക്കിലെ തമ്മനം മണ്ഡലം കെപിസിസി വര്‍ക്കിംഗ് പ്രസിഡന്റ് ടി.എന്‍. പ്രതാപനും രാഷ്ട്രീയ വിശദീകരണ യോഗത്തിന്റെ ജില്ലാതല ഉദ്ഘാടനം നിര്‍വഹിച്ചു.കെപിസിസി സംഘടനാ ചുമതലയുള്ള ജനറല്‍ സെക്രട്ടറി എം.ലിജു എറണാകുളത്ത് തമ്മനം മണ്ഡലത്തില്‍ നടന്ന രാഷ്ട്രീയ വിശദീകരണ യോഗത്തില്‍ പങ്കെടുത്തു.
ആലപ്പുഴ സൗത്ത് ബ്ലോക്കിലെ ബീച്ച് മണ്ഡലം എഐസിസി സെക്രട്ടറി പി.സി.വിഷ്ണുനാഥ്, പത്തനംതിട്ട ബ്ലോക്കിലെ കോഴഞ്ചേരി മണ്ഡലം മുന്‍ രാജ്യസഭാ ഉപാധ്യക്ഷന്‍ പി.ജെ.കുര്യന്‍, കോട്ടയം ഏറ്റുമാനൂര്‍ ബ്ലോക്കിലെ അതിരമ്പുഴ മണ്ഡലം കെപിസിസി വൈസ് പ്രസിഡന്റ് വി.ടി.ബല്‍റാം, ഇടുക്കി തൊടുപുഴ ബ്ലോക്കിലെ ഇടവെട്ടി മണ്ഡലം രാഷ്ട്രീയകാര്യ സമിതി അംഗം ഷാനിമോള്‍ ഉസ്മാന്‍, തൃശൂര്‍ ചേലക്കര മണ്ഡലം കെപിസിസി വൈസ് പ്രസിഡന്റ് വി.പി. സജീന്ദ്രന്‍,പാലക്കാട് പിരായിരി മണ്ഡലം വി.കെ.ശ്രീകണ്ഠന്‍ എംപി, മലപ്പുറംകുറ്റിപ്പുറം ബ്ലോക്കിലെ വളാഞ്ചേരി മണ്ഡലം കെ.മുരളീധരന്‍ മുന്‍ എംപി എന്നിവരും രാഷ്ട്രീയ വിശദീകരണ യോഗത്തിന്റെ ജില്ലാതല ഉദ്ഘാടനം നിര്‍വഹിച്ചു.
ഈ മാസം 6ന് തിരുവനന്തപുരത്ത് നെയ്യാറ്റിന്‍കര ബ്ലോക്ക് പെരുമ്പഴുതൂരില്‍ കെ.മുരളീധരന്‍ മുന്‍ എംപിയും 9ന് കാസര്‍കോട് ബളാല്‍ ബ്ലോക്കിലെ വെള്ളരിക്കുണ്ടില്‍ രാജ്‌മോഹന്‍ ഉണ്ണിത്താനും ജില്ലാതല ഉദ്ഘാടനം നിര്‍വഹിക്കും.
—-
