കൊച്ചിന് കാന്സര് സെന്റര് മുതല് ഇന്റര്നാഷണല് റിസര്ച്ച് ഇന്സ്റ്റിറ്റ്യൂട്ട് ഓഫ് ആയുര്വേദ വരെ
പദ്ധതികള് മുഖ്യമന്ത്രി നാടിന് സമര്പ്പിക്കും
തിരുവനന്തപുരം: ആരോഗ്യ മേഖലയില് സാക്ഷാത്ക്കരിച്ച വിവിധ പദ്ധതികളുടെ ഉദ്ഘാടനങ്ങള് മുഖ്യമന്ത്രി പിണറായി വിജയന് നിര്വഹിക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ്. ആരോഗ്യ മേഖലയിലെ 1800 കോടിയിലധികം രൂപയുടെ പദ്ധതികളാണ് ഈ മാസം വിവിധ തീയതികളില് മുഖ്യമന്ത്രി നാടിന് സമര്പ്പിക്കുന്നത്. ഇത്രയേറെ വികസന പദ്ധതികള് ഒരുമിച്ച് സാക്ഷാത്ക്കരിക്കുന്നത് ഇതാദ്യമായാണ്. ആരോഗ്യ രംഗത്ത് വലിയ മുന്നേറ്റമുണ്ടാക്കാന് ഇതിലൂടെ സാധിക്കും.
ഫെബ്രുവരി 7
ഇന്സ്റ്റിറ്റ്യൂട്ട് ഓഫ് ഓര്ഗന് ട്രാന്സ്പ്ലാന്റേഷന് കോഴിക്കോട് (643.88 കോടി)
643.88 കോടി രൂപ ചെലവഴിച്ചാണ് കോഴിക്കോട് ഇന്സ്റ്റിറ്റ്യൂട്ട് ഓഫ് ഓര്ഗന് ട്രാന്സ്പ്ലാന്റേഷന് സജ്ജമാക്കുന്നത്. ഇന്സ്റ്റിറ്റ്യൂട്ടിനായി 60 തസ്തികകള് സൃഷ്ടിച്ചിരുന്നു. ആദ്യ ഘട്ടത്തില് കോഴിക്കോട് മെഡിക്കല് കോളേജിലായിരിക്കും ഇന്സ്റ്റിറ്റ്യൂട്ട് പ്രവര്ത്തിക്കുക. അവയവദാന രംഗത്തെ ഗവേഷണ, ചികിത്സാ, പരിശീലന മികവിന്റെ കേന്ദ്രം കൂടിയായിരിക്കും. പുതിയ കെട്ടിടത്തിന്റെ നിര്മ്മാണ ഉദ്ഘാടനം ഫെബ്രുവരി 7ന് മുഖ്യമന്ത്രി നിര്വഹിക്കും.
ഫെബ്രുവരി 9
സിസിആര്സി (387 കോടി)
മധ്യ കേരളത്തിന്റെ കാന്സര് ചികിത്സാ രംഗത്ത് വന് മാറ്റമുണ്ടാക്കുന്ന കൊച്ചിന് കാന്സര് റിസര്ച്ച് സെന്ററിന്റെ ഉദ്ഘാടനം ഫെബ്രുവരി 9ന് മുഖ്യമന്ത്രി നിര്വഹിക്കും. 387 കോടി ചെലവഴിച്ചാണ് അത്യാധുനിക സംവിധാനങ്ങളോടെ സിസിആര്സി യാഥാര്ത്ഥ്യമാക്കിയിരിക്കുന്നത്.
ഫെബ്രുവരി 13
ആലപ്പുഴ ഹോംകോ (109.82 കോടി)
109.82 കോടി രൂപ ചെലവഴിച്ചാണ് ഹോംകോയുടെ രണ്ടാംഘട്ട രണ്ടാംഘട്ട വികസനം സാധ്യമാക്കിയത്. ഗുളികകളും ഓയില്മെന്റുകളും നിര്മ്മിക്കാന് കഴിയുന്ന പുതിയ ഫാക്ടറിയുടെ ഉദ്ഘാടനമാണ് നിര്വഹിക്കുന്നത്.
ഫെബ്രുവരി14
മലപ്പുറം ഫുഡ് സ്ട്രീറ്റ് (1 കോടി)
ഒരു കോടി രൂപ ചെലവഴിച്ചാണ് മലപ്പുറം കോട്ടക്കുന്നില് ഫുഡ് സ്ട്രീറ്റ് സജ്ജമായിരിക്കുന്നത്. വൃത്തിയുള്ള, മനോഹരമായ അന്തരീക്ഷത്തില് നല്ല ഭക്ഷണം ഒരുക്കുന്നതിന്റെ ഭാഗമായാണ് ആധുനിക ഫുഡ് സ്ട്രീറ്റുകള് യാഥാര്ത്ഥ്യമാക്കിയത്.
ഫെബ്രുവരി 16
കോട്ടയം മെഡിക്കല് കോളേജ് സര്ജിക്കല് ബ്ലോക്ക് (257 കോടി)
കോട്ടയം മെഡിക്കല് കോളേജില് 257 കോടി രൂപ ചെലവഴിച്ചാണ് സര്ജിക്കല് ബ്ലോക്ക് സജ്ജമാക്കിയിരിക്കുന്നത്. 8 നിലകളിലായി 526 കിടക്കകളും, 14 ഓപ്പറേഷന് തീയറ്ററുകളും, 44 ഐസിയു ബെഡുകളും, 12 ഐസൊലേഷന് ബെഡുകളുമുണ്ട്. 115 കോടിയുടെ അത്യാധുനിക ഉപകരണങ്ങളും സംവിധാനങ്ങളും സജ്ജമാക്കിയിട്ടുണ്ട്.
ഫെബ്രുവരി 20
ഇന്റര്നാഷണല് റിസര്ച്ച് ഇന്സ്റ്റിറ്റ്യൂട്ട് ഓഫ് ആയുര്വേദ (200 കോടി)
ആയുര്വേദ ചികിത്സാ, ഗവേഷണ രംഗത്തെ നാഴികക്കല്ലാണ് കണ്ണൂരില് 300 ഏക്കര് സ്ഥലത്ത് സജ്ജമാക്കുന്ന ഇന്റര്നാഷണല് റിസര്ച്ച് ഇന്സ്റ്റിറ്റ്യൂട്ട് ഓഫ് ആയുര്വേദ (ഐആര്ഐഎ). ഒന്നാംഘട്ടത്തില് 200 കോടി ചെലവഴിച്ച് 100 കിടക്കകളുള്ള ആശുപത്രി, മാനുസ്ക്രിപ്റ്റ് സ്റ്റഡി സെന്റര്, ഔഷധസസ്യ നഴ്സറി & റിസര്ച്ച് സെന്റര് എന്നിവയാണ് സജ്ജമാക്കിയിരിക്കുന്നത്.
ഫെബ്രുവരി 23
ആര്സിസി (242.42 കോടി)
തിരുവനന്തപുരം റീജിയണല് കാന്സര് സെന്ററില് 242.42 കോടി രൂപ ചെലവഴിച്ചാണ് 30,680 സ്ക്വയര് മീറ്റര് വിസ്തീര്ണത്തില് 14 നില കെട്ടിടം നിര്മ്മിച്ചിരിക്കുന്നത്. സ്ഥലപരിമിതി മൂലം ബുദ്ധിമുട്ടുന്ന ആര്സിസിയ്ക്ക് ഏറെ സഹായകരമാണ് ഈ കെട്ടിടം.
