കൊച്ചി: സംസ്ഥാനത്തെ സൂക്ഷ്മ-ചെറുകിട-ഇടത്തരം സംരംഭങ്ങളുടെ (MSME) ആഗോള മത്സരക്ഷമത വർദ്ധിപ്പിക്കുന്നതിനും കേന്ദ്ര-സംസ്ഥാന സർക്കാരുകളുടെ വിവിധ പദ്ധതികൾ സംരംഭകരിലേക്ക് എത്തിക്കുന്നതിനുമായി ‘കോമ്പോസിറ്റ് കോംപറ്റിറ്റീവ്നെസ് അവയർനസ് വർക്ക്ഷോപ്പ്’ സംഘടിപ്പിച്ചു. കൊച്ചി ലെ മെറിഡിയൻ ഹോട്ടലിൽ നടന്ന ചടങ്ങ് വ്യവസായ വകുപ്പ് പ്രിൻസിപ്പൽ സെക്രട്ടറിയും കെ.ബി.ഐ.പി. (KBIP) ചെയർമാനുമായ എ.പി.എം. മുഹമ്മദ് ഹനീഷ് ഐ.എ.എസ്. ഉദ്ഘാടനം ചെയ്തു.
കേന്ദ്ര എം.എസ്.എം.ഇ. മന്ത്രാലയവും കേരള വ്യവസായ വാണിജ്യ വകുപ്പും സംയുക്തമായാണ് ഏകദിന ശില്പശാല ഒരുക്കിയത്. സംരംഭകർക്ക് വായ്പാ സൗകര്യങ്ങൾ ഉറപ്പാക്കുന്നതിനും ഉൽപ്പന്നങ്ങൾക്ക് അന്താരാഷ്ട്ര വിപണി കണ്ടെത്താനും ഡിജിറ്റൽ സാങ്കേതികവിദ്യ പ്രയോജനപ്പെടുത്താനും ലക്ഷ്യമിട്ടായിരുന്നു പരിപാടി. വ്യവസായ വകുപ്പ് ഡയറക്ടർ വിഷ്ണുരാജ് പി. ഐ.എ.എസ്. സംസ്ഥാനത്തെ പദ്ധതികളുടെ പുരോഗതി റിപ്പോർട്ട് അവതരിപ്പിച്ചു. കേന്ദ്ര എം.എസ്.എം.ഇ. മന്ത്രാലയം ജോയിന്റ് സെക്രട്ടറി കേശവേന്ദ്ര കുമാർ ഐ.എ.എസ്. പദ്ധതികളുടെ പ്രാധാന്യത്തെക്കുറിച്ച് സംസാരിച്ചു.
ശില്പശാലയിലെ പ്രധാന ചർച്ചകൾ:
വായ്പാ ലഭ്യത: എം.എസ്.എം.ഇ.കൾക്ക് എളുപ്പത്തിൽ മൂലധനം ലഭ്യമാക്കുന്നതിനായി ജിഫ്റ്റ് സിറ്റി (GIFT City) നൽകുന്ന അവസരങ്ങൾ വിശദീകരിച്ചു.
വൈകിയുള്ള പേയ്മെന്റുകൾ: ഉൽപ്പന്നങ്ങൾ വിറ്റഴിച്ച ശേഷം പണം ലഭിക്കാൻ നേരിടുന്ന കാലതാമസം ഒഴിവാക്കാൻ ‘ട്രെഡ്സ്’ (TReDS) പ്ലാറ്റ്ഫോം, എം.എസ്.ഇ. ഒ.ഡി.ആർ. പോർട്ടൽ എന്നിവയെക്കുറിച്ച് ഇൻവോയ്സ് മാർട്ട് പ്രതിനിധികൾ ക്ലാസെടുത്തു.
പരിസ്ഥിതി സൗഹൃദ സംരംഭങ്ങൾ: വ്യവസായ ശാലകളെ പരിസ്ഥിതി സൗഹൃദമാക്കുന്നതിന് സിഡ്ബി (SIDBI) ആവിഷ്കരിച്ച എം.എസ്.ഇ. ജിഫ്റ്റ്, സ്പൈസ് പദ്ധതികളെക്കുറിച്ചും ഇ.എസ്.ജി. (ESG) മാനദണ്ഡങ്ങളെക്കുറിച്ചും ലോകബാങ്ക് പ്രതിനിധികൾ വിശദീകരിച്ചു.
പുതിയ വിപണികൾ: ചെറുകിട സംരംഭകരുടെ ഉൽപ്പന്നങ്ങൾ ഡിജിറ്റൽ പ്ലാറ്റ്ഫോമുകൾ വഴി ആഗോള വിപണിയിലെത്തിക്കാൻ സഹായിക്കുന്ന ‘ടീം’ (TEAM) സ്കീമിനെക്കുറിച്ചും സെഷനുകൾ നടന്നു.
നാഷണൽ എസ്.സി./എസ്.ടി. ഹബ്ബ് പദ്ധതിയെക്കുറിച്ച് എൻ.എസ്.ഐ.സി.യും (NSIC), എം.എസ്.എം.ഇ. ചാമ്പ്യൻസ് പദ്ധതിയെക്കുറിച്ച് ക്യു.സി.ഐ.യും (QCI) വിശദീകരണം നൽകി. വ്യവസായ വകുപ്പ് അഡീഷണൽ ഡയറക്ടർ ജി. രാജീവ് സ്വാഗതവും തൃശൂർ എം.എസ്.എം.ഇ. ഡി.എഫ്.ഒ. ജോയിന്റ് ഡയറക്ടർ പ്രകാശ് ജി.എസ്. നന്ദിയും പറഞ്ഞു. സമാപന സമ്മേളനത്തിൽ വ്യവസായ വകുപ്പ് ജോയിന്റ് ഡയറക്ടർ പ്രേംരാജ് പി. നന്ദി രേഖപ്പെടുത്തി.
ഫോട്ടോ ക്യാപ്ഷന്: സംസ്ഥാനത്തെ സൂക്ഷ്മ-ചെറുകിട-ഇടത്തരം സംരംഭങ്ങളുടെ (MSME) ആഗോള മത്സരക്ഷമത വര്ദ്ധിപ്പിക്കുന്നതിനും കേന്ദ്ര-സംസ്ഥാന സര്ക്കാരുകളുടെ വിവിധ പദ്ധതികള് സംരംഭകരിലേക്ക് എത്തിക്കുന്നതിനുമായി സംഘടിപ്പിച്ച ‘കോമ്പോസിറ്റ് കോംപറ്റിറ്റീവ്നെസ് അവയര്നസ് വര്ക്ക്ഷോപ്പ്’ വ്യവസായ വകുപ്പ് പ്രിന്സിപ്പല് സെക്രട്ടറിയും കെ.ബി.ഐ.പി. (KBIP) ചെയര്മാനുമായ എ.പി.എം. മുഹമ്മദ് ഹനീഷ് ഐ.എ.എസ്. ഉദ്ഘാടനം ചെയ്യുന്നു. വ്യവസായ വകുപ്പ് ഡയറക്ടര് വിഷ്ണുരാജ് പി. ഐ.എ.എസ്. കേന്ദ്ര എം.എസ്.എം.ഇ. മന്ത്രാലയം ജോയിന്റ് സെക്രട്ടറി കേശവേന്ദ്ര കുമാര് ഐ.എ.എസ്., വ്യവസായ വകുപ്പ് അഡീഷണല് ഡയറക്ടര് ജി. രാജീവ് തുടങ്ങിയവര് സമീപം.
Divya Raj.K
