ടെക്സാസ് : നോർത്ത് ടെക്സസിലെ ഗ്രേപ്വൈനിലുള്ള ഡെയ്ൻ പാർക്ക് അപ്പാർട്ട്മെന്റ് പരിസരത്ത് വിഷപ്പാമ്പുകളായ ‘സതേൺ കോപ്പർഹെഡ്’ (Southern Copperhead) പാമ്പുകളുടെ ശല്യം വർദ്ധിക്കുന്നതായി റിപ്പോർട്ട്. വനമേഖലയോട് ചേർന്നുള്ള പ്രദേശമായതിനാലും, നിലവിലെ പ്രജനന കാലവും വസന്തകാലത്തെ കാലാവസ്ഥാ വ്യതിയാനവുമാണ് പാമ്പുകൾ ജനവാസ മേഖലയിലേക്ക് ഇറങ്ങാൻ കാരണമെന്ന് വിദഗ്ധർ പറയുന്നു.
പാമ്പുകളുടെ സാന്നിധ്യം വർദ്ധിച്ചതോടെ, ഫ്ലാറ്റിൽ പുതുതായി താമസിക്കാൻ എത്തുന്നവർക്ക് മാനേജ്മെന്റ് പാമ്പുകളിൽ നിന്ന് എങ്ങനെ സ്വയം രക്ഷപ്പെടാം എന്നതിനെക്കുറിച്ചുള്ള മാർഗ്ഗനിർദ്ദേശങ്ങൾ അടങ്ങിയ ലഘുലേഖകൾ നൽകിത്തുടങ്ങി.
വളർത്തുനായ്ക്കളുടെ ഭക്ഷണപ്പാത്രങ്ങൾക്ക് സമീപവും പൂച്ചട്ടികളുടെ അടിയിലും പാമ്പുകളെ കണ്ടെത്തിയിട്ടുണ്ട്. പാമ്പുകൾ നായുടെ ഭക്ഷണം കഴിക്കില്ലെങ്കിലും, ഈ ഭക്ഷണം തേടിയെത്തുന്ന എലികളെയും മറ്റ് ജീവികളെയും ഇരയാക്കാനാണ് ഇവ എത്തുന്നത്. അതിനാൽ വീട്ടുപരിസരത്ത് ഭക്ഷണസാധനങ്ങൾ തുറന്നുവെക്കരുതെന്ന് വിദഗ്ധർ മുന്നറിയിപ്പ് നൽകുന്നു.
കോപ്പർഹെഡ് പാമ്പുകൾ വിഷമുള്ളവയാണെങ്കിലും ഇവയുടെ കടിയേറ്റുള്ള മരണം വളരെ അപൂർവ്വമാണ്. മനുഷ്യരെ കണ്ടാൽ സാധാരണയായി ഇവ ആക്രമിക്കാറില്ല. അതിനാൽ ഇവയെ ഉപദ്രവിക്കാനോ മാറ്റാനോ ശ്രമിക്കാതെ മാറിനിൽക്കുകയാണ് സുരക്ഷിതമെന്ന് പാമ്പ് പിടുത്ത വിദഗ്ധനായ സക്കറി ഗെൽനർ വ്യക്തമാക്കി.
