എല്ലാത്തിലും വലുത് പ്രസ്ഥാനമെന്ന് വിശ്വസിച്ച അച്ചടക്കമുള്ള
നേതാവായിരുന്നു കെപി ധനപാലനെന്ന് കെസി വേണുഗോപാല് എംപി.
നിയമസഭാ തിരഞ്ഞെടുപ്പില് മത്സരിക്കാന് പാര്ട്ടി സീറ്റ് നല്കി പ്രചരണവും തുടങ്ങി പിന്നീട് പിന്മാറേണ്ടി വന്ന വേദന നിറഞ്ഞ ഓര്മ്മയാണ് ധനപാലനെ കുറിച്ച് എന്നും മനസ്സിലേക്കോടിയെത്തുന്നതെന്ന് കെസി വേണുഗോപാല് അനുസ്മരിച്ചു. ഒരിക്കലും പാര്ട്ടിയെ തള്ളിപ്പറയാന് അദ്ദേഹം തയ്യാറായിട്ടില്ല. കോണ്ഗ്രസ് പ്രസ്ഥാനമാണ് എല്ലാത്തിലും വലുത് എന്നു പറഞ്ഞ് അച്ചടക്കത്തോടെ അദ്ദേഹം മാറി നിന്നു കൊണ്ട് പകരം വയ്ക്കാനില്ലാത്ത ഒരു മാതൃക സൃഷ്ടിച്ച നേതാവ് കൂടിയായിരുന്നു കെപി ധനപാലനെന്നും കെസി വേണുഗോപാല് പറഞ്ഞു.
എല്ലാക്കാലത്തും പാര്ട്ടിയുടെ തീരുമാനങ്ങള്ക്കൊപ്പമായിരുന്നു കെപി ധനപാലനെന്ന നേതാവ്. 2009 ല് ലോക്സഭയിലേക്ക് മത്സരിക്കാനുള്ള പാര്ട്ടി നിര്ദ്ദേശം ശിരസാവഹിച്ച അദ്ദേഹം മികച്ച വിജയം നേടി ലോക്സഭയിലെത്തി. സൗമ്യമായ മുഖവും വിട്ടുവീഴ്ചയില്ലാത്ത നിലപാടുകളും ആദര്ശവുമായിരുന്നു കെപി ധനപാലനെന്ന പൊതുപ്രവര്ത്തകന്. എതിര് രാഷ്ട്രീയ ചേരികള്ക്ക് പോലും സ്വീകാര്യന്. ഒട്ടേറെ പ്രവര്ത്തന മണ്ഡലങ്ങളില് തന്റേതായ വ്യക്തിമുദ്ര പതിപ്പിച്ച കെപി ധനപാലന്റെ വിയോഗം കോണ്ഗ്രസ് പ്രസ്ഥാനത്തിന് മാത്രമല്ല, നാടിനും തീര്ത്താല് തീരാത്ത നഷ്ടമാണെന്നും കെസി വേണുഗോപാല് പറഞ്ഞു.
ചാലക്കുടി എംപി, എറണാകുളം ജില്ലാ കോണ്ഗ്രസ് കമ്മിറ്റി പ്രസിഡന്റ്, കെപിസിസി വൈസ് പ്രസിഡന്റ് എന്നിങ്ങനെ പദവികള് വഹിച്ച, നിസ്വാര്ത്ഥ സേവകന് കൂടിയായിരുന്നു ധനപാലന് പ്രസ്ഥാനത്തിന്. എക്കാലവും താനും ധനപാലനും തമ്മില് ആത്മബന്ധമുണ്ടായിരുന്നു. യൂത്ത് കോണ്ഗ്രസ് ജില്ലാ പ്രസിഡന്റ് ,സംസ്ഥാന വൈസ് പ്രസിഡന്റ് എന്നീ നിലകളില് പ്രവര്ത്തിച്ച് അദ്ദേഹം ആര്ജിച്ചെടുത്ത ജനകീയ അടിത്തറയാണ് കരുത്തനായ നേതാവായി വളരാന് കെപി ധനപാലനെന്ന പൊതുപ്രവര്ത്തകന് കരുത്തേകിയത്.
ജനാധിപത്യ, മതനിരപേക്ഷ രാഷ്ട്രീയത്തിന്റെ ശക്തനായ വക്താവ് കൂടിയായ കെപി ധനപാലനുമായി 2009 മുതല് 2014 വരെയുള്ള കാലഘട്ടത്തില് ലോക്സഭയില് ഒരുമിച്ച് പ്രവര്ത്തിച്ചിരുന്നു.ഏത് തിരക്കുകള്ക്കിടയിലും മണ്ഡലത്തെയും ജനങ്ങളെയും മറക്കാത്ത കെപി ധനപാലന് എന്ന രാഷ്ട്രീയ നേതാവ്, വിദ്യാര്ത്ഥി, യുവജന പ്രസ്ഥാനങ്ങളിലേക്ക് കടന്നുവരുന്ന ഓരോരുത്തര്ക്കും മാതൃക കൂടിയാണെന്നും കെസി വേണുഗോപാല് പറഞ്ഞു.
