തിരുവനന്തപുരം ഗവൺമെന്റ് ആയൂർവേദ മെഡിക്കൽ കോളജിന്റെ നിർമാണം പൂർത്തിയാക്കിയ ലേഡീസ് ഹോസ്റ്റലിന്റെ ഉദ്ഘാടനം ആരോഗ്യ വകുപ്പ് മന്ത്രി വീണ ജോർജ് നിർവഹിക്കും. നാളെ (ജൂൺ 30) ഉച്ചക്ക് 2.30 ന് പൂജപ്പുര മണ്ഡപത്തിൽ നടക്കുന്ന ചടങ്ങിൽ പൊതു വിദ്യാഭ്യാസ വകുപ്പ് മന്ത്രി വി ശിവൻകുട്ടി അധ്യക്ഷത വഹിക്കും. ഡോ. ശശിതരൂർ എം.പി, മേയർ ആര്യ രാജേന്ദ്രൻ, ആരോഗ്യ വകുപ്പ് പ്രിൻസിപ്പൽ സെക്രട്ടറി മുഹമ്മദ് ഹനീഷ് എ.പി.എം എന്നിവർ ചടങ്ങിൽ പങ്കെടുക്കും. മികച്ച അടിസ്ഥാന സൗകര്യങ്ങൾ ഒരുക്കുക എന്ന ലക്ഷ്യത്തോടെ നൂറ് ദിന കർമ്മ പരിപാടിയിലുൾപ്പെടുത്തിയാണ് ലേഡീസ് ഹോസ്റ്റൽ നിർമ്മാണം പൂർത്തീകരിച്ചത്.