ആശ പ്രവര്‍ത്തകര്‍ സെക്രട്ടേറിയറ്റിന് മുന്നില്‍ നടത്തുന്ന സമരം നാല്‍പതാം ദിവസത്തിലേക്ക് കടന്നിരിക്കുകയാണ്. കഴിഞ്ഞ ദിവസം മുതലാണ് അവര്‍ നിരാഹാര സമരം തുടങ്ങിയത്. സ്ത്രീകളാണ് അനിശ്ചിതകാല നിരാഹാര സമരം നടത്തുന്നത് ന്യായമായ ആവശ്യത്തിനു വേണ്ടിയാണ്. കേന്ദ്ര സര്‍ക്കാര്‍ ഇന്‍സെന്റീവും സംസ്ഥാന സര്‍ക്കാര്‍ ഓണറേറിയവും വര്‍ധിപ്പിക്കണമെന്നാണ് പ്രതിപക്ഷം ആവശ്യപ്പെടുന്നത്. മുഖ്യമന്ത്രിയെ കഴിഞ്ഞ ദിവസം നേരില്‍ക്കണ്ട് സമരം ഒത്തുതീര്‍പ്പാക്കണമെന്ന് അഭ്യര്‍ത്ഥിച്ചു. മുഖ്യമന്ത്രി അതിനോട് പോസിറ്റീവായി പ്രതികരിക്കുകയും സമരം തീര്‍ക്കുന്നതിനു വേണ്ടി ആരോഗ്യമന്ത്രിയുടെയും എന്‍.എച്ച്.എമ്മിന്റെയും ശ്രമമുണ്ടാകുകയും ചെയ്തു. എന്നാല്‍ അത് പരാജയപ്പെട്ടു. തുടര്‍ച്ചയായി അത് ചര്‍ച്ച ചെയ്ത് പരിഹരിക്കാന്‍ സര്‍ക്കാര്‍ തയാറാകണം. വിഷയത്തില്‍ പോസിറ്റീവായ ഇടപെടലാണ് പ്രതിപക്ഷവും ആഗ്രഹിക്കുന്നത്. പ്രശ്‌നത്തിന് ശാശ്വതമായ പരിഹാരം ഉണ്ടാകണമെന്ന ഉദ്ദേശ്യത്തോടെയാണ് സബ്മിഷന്‍ ഉന്നയിക്കുന്നത്.
സംസ്ഥാന ആരോഗ്യമന്ത്രി ഡല്‍ഹിയിലേക്ക് പോയപ്പോള്‍ കേന്ദ്ര ആരോഗ്യമന്ത്രിയുമായി ചര്‍ച്ച നടത്തുമെന്നാണ് അറിഞ്ഞത്. പ്രതിപക്ഷം നിയമസഭയില്‍ ആശ പ്രവര്‍ത്തകര്‍ക്ക് വേണ്ടി സംസാരിക്കുമ്പോള്‍ തന്നെ യു.ഡി.എഫ് എം.പിമാര്‍ പാര്‍ലമെന്റിന് അകത്തും പുറത്തും കേന്ദ്ര സര്‍ക്കാര്‍ ഇന്‍സെന്റീവ് വര്‍ധിപ്പിക്കണമെന്ന് ആവശ്യപ്പെട്ടുള്ള തുടര്‍ച്ചയായ സമരങ്ങള്‍ നടത്തുകയാണ്. സംസ്ഥാന ആരോഗ്യമന്ത്രിക്ക് കേന്ദ്ര ആരോഗ്യമന്ത്രിയെ കാണാന്‍ കഴിയാത്തതിന്റെ കാരണം അറിയില്ല. അപ്പോയിന്‍മെന്റ് എടുക്കാതെ പോയതു കൊണ്ടാണ് കാണാന്‍ സാധിക്കാതിരുന്നതെന്നും അപ്പോയിന്‍മെന്റ് ചോദിച്ചിട്ടും കിട്ടിയില്ലെന്നും പറയുന്നുണ്ട്. ഞങ്ങള്‍ക്ക് അതേക്കുറിച്ച് അറിയില്ല. അപ്പോയിന്‍മെന്റ് ചോദിച്ചിട്ട് കൊടുത്തില്ലെങ്കില്‍ അത് ഗുരുതരമായ പ്രശ്‌നമാണെന്ന് ഞങ്ങള്‍ പ്രതികരിക്കുകയും ചെയ്തു. അപ്പോയിന്‍മെന്റ് എടുക്കാതെ പോയതിനെ കുറിച്ച് മന്ത്രിയാണ് വിശദീകരിക്കേണ്ടത്. ആ വിവാദത്തിലേക്കൊന്നും പോകാന്‍ ആഗ്രഹിക്കുന്നില്ല.
സര്‍ക്കാര്‍ മുന്‍കൈ എടുത്ത് ആശ പ്രവര്‍ത്തകരുടെ പ്രശ്‌നങ്ങള്‍ പരിഹരിക്കണം എന്നതാണ് ഞങ്ങളുടെ ആവശ്യം. കേന്ദ്ര സര്‍ക്കരിന്റെ ഇന്‍സെന്റീവ് വര്‍ധിപ്പിക്കുന്നതിനു വേണ്ടി ഞങ്ങളുടെ എം.പിമാര്‍ ശ്രമിക്കുന്നുണ്ട്. അതിനൊപ്പം സംസ്ഥാന സര്‍ക്കാരും ഇടപെടണം. ആശ പ്രവര്‍ത്തകരുടെ എല്ലാ ആവശ്യങ്ങളും ഒറ്റയടിക്ക് പരിഹരിക്കാന്‍ സാധിച്ചില്ലെങ്കിലും ചെയ്യാന്‍ പറ്റാവുന്ന തരത്തിലുള്ള നല്ല ഇടപെടല്‍ സര്‍ക്കാരിന്റെ ഭാഗത്ത് നിന്നും ഉണ്ടാകണം.
*പ്രതിപക്ഷ നേതാവിന്റെ വാക്കൗട്ട് പ്രസംഗം*
ആശ പ്രവര്‍ത്തകരുടെ സമരം പരിഹരിക്കണമെന്ന പോസിറ്റീവായ അഭ്യര്‍ത്ഥനയാണ് മുന്നോട്ടു വച്ചത്. എന്നാല്‍ സമരത്തെ മന്ത്രി പൂര്‍ണമായും തള്ളിപ്പറയുകയാണ് ചെയ്തത്. മറ്റു സംസ്ഥാനങ്ങളുമായി കേരളത്തിലെ ആശ പ്രവര്‍ത്തകരെ താതമ്യപ്പെടുത്തരുത്. മറ്റൊരു സംസ്ഥാനത്തും ആശ പ്രവര്‍ത്തകര്‍ക്ക് ഇത്രയും ജോലി ഭാരമില്ല. ട്രേഡ് യൂണിയനുകള്‍ സമരത്തിനൊപ്പം ഇല്ലെന്നാണ് മന്ത്രി പറഞ്ഞത്. ഈ സമരം നടത്തുന്നത് മറ്റൊരു ട്രേഡ് യൂണിയനാണ്. ഐ.എന്‍.ടി.യു.സി ഇതേ ആവശ്യങ്ങള്‍ ഉന്നയിച്ച് എല്ലാ ജില്ലകളിലും സമരം നടത്തിയിട്ടുണ്ട്. ഇതേ ട്രേഡ് യൂണിയന്‍ നേതാവ് തന്നെയാണ് 11 വര്‍ഷം മുന്‍പ് ഇതേ സഭയില്‍ വന്ന് സംസ്ഥാനത്തിന്റെ ഓണറേറിയം പതിനായിരം രൂപയാക്കണമെന്ന് ആവശ്യപ്പെട്ടത്. സമരം ന്യായമല്ലെന്ന നിലപാട് ശരിയല്ല. ന്യായമായ ആവശ്യം ഉന്നയിച്ചുള്ള സമരത്തിനൊപ്പമാണ് പ്രതിപക്ഷം.
പ്രതിപക്ഷ നേതാവിന്റെ പ്രസംഗം തടസപ്പെടുത്തുന്നതിന് സ്പീക്കര്‍ കൂട്ടു നില്‍ക്കുകയാണ്. രണ്ടു മിനിട്ട് ഈ വിഷയം നിയമസഭയില്‍ മെന്‍ഷന്‍ ചെയ്യാന്‍ പോലും അവസരമില്ലെങ്കില്‍ എന്തിനാണ് നിയമസഭ കൂടുന്നത്. 99 പേര്‍ ബഹളമുണ്ടാക്കി ഞങ്ങളുടെ ശബ്ദം നിലപ്പിക്കാമെന്നാണോ? 15 മിനിട്ട് മന്ത്രി പറഞ്ഞത് ഞങ്ങള്‍ കേട്ടുകൊണ്ടിരുന്നില്ലേ?
സമരം തുടങ്ങിയപ്പോള്‍ മുതല്‍ അതിനെ പരിഹസിക്കുകയും അവരെ പുച്ഛത്തോടെ നോക്കിക്കാണുകയും ചെയ്യുന്ന സമീപനവുമാണ് സര്‍ക്കാര്‍ സ്വീകരിച്ചത്. മുഖ്യമന്ത്രിക്ക് വേണ്ടി മറുപടി നല്‍കിയ പാര്‍ലമെന്ററി കാര്യ മന്ത്രിയും ഇന്ന് അതേ സമീപനമാണ് തുടര്‍ന്നത്. ന്യായമായ ആവശ്യങ്ങള്‍ ഉന്നയിച്ചുള്ള സമരത്തിന് സര്‍ക്കാര്‍ ന്യായമായ പരിഹാരം ഉണ്ടാക്കണം. എന്നാല്‍ വീണ്ടും സമരത്തെ പരിഹസിക്കാനും സമരത്തില്‍ പങ്കെടുക്കുന്നവരുടെ എണ്ണം നോക്കാനും സര്‍ക്കാര്‍ ഇറങ്ങിപ്പുറപ്പെടുന്നതില്‍ പ്രതിഷേധിച്ച് വാക്കൗട്ട് ചെയ്യുന്നു.
