വാഷിംഗ്ടൺ ഡി സി : അമേരിക്കയെയും കാനഡയെയും ബന്ധിപ്പിക്കുന്ന പുതിയ ‘ഗോർഡി ഹോവ്’ അന്താരാഷ്ട്ര പാലത്തിന്റെ നിർമ്മാണവുമായി ബന്ധപ്പെട്ട് കാനഡയ്ക്കെതിരെ രൂക്ഷവിമർശനവുമായി യുഎസ് പ്രസിഡന്റ് ഡൊണാൾഡ് ട്രംപ്. പാലത്തിന്റെ പകുതി ഉടമസ്ഥാവകാശം അമേരിക്കയ്ക്ക് നൽകണമെന്നും അല്ലാത്തപക്ഷം പാലം തുറക്കാൻ അനുവദിക്കില്ലെന്നുമാണ് ട്രംപിന്റെ ഭീഷണി.
കാനഡയുടെ പൂർണ്ണ സാമ്പത്തിക സഹായത്തോടെ നിർമ്മിക്കുന്ന ഈ പാലത്തിന്റെ ഉടമസ്ഥാവകാശം കാനഡയ്ക്കാണ്. എന്നാൽ ഇത് അമേരിക്കയെ ചൂഷണം ചെയ്യലാണെന്നും പാലത്തിന്റെ പകുതി പങ്ക് യുഎസിന് വേണമെന്നും ട്രംപ് വാദിക്കുന്നു.
പാലം പണിയാൻ അമേരിക്കൻ ഉരുക്ക് (Steel) ഉപയോഗിക്കാതെ കാനഡയ്ക്ക് ഇളവ് നൽകിയ മുൻ പ്രസിഡന്റ് ബരാക് ഒബാമയുടെ നടപടിയെ ട്രംപ് ‘വിഡ്ഢിത്തം’ എന്ന് വിശേഷിപ്പിച്ചു.
കാനഡ ചൈനയുമായി വ്യാപാര കരാറിൽ ഏർപ്പെടാൻ നീക്കം നടത്തുകയാണെന്ന് ട്രംപ് ആരോപിച്ചു. ചൈനയുമായുള്ള ഈ ബന്ധം കാനഡയിലെ ഐസ് ഹോക്കി കളി തന്നെ ഇല്ലാതാക്കുമെന്നും വിഖ്യാതമായ ‘സ്റ്റാൻലി കപ്പ്’ എന്നെന്നേക്കുമായി നിർത്തലാക്കുമെന്നുമാണ് ട്രംപിന്റെ വിചിത്രമായ അവകാശവാദം.
മിഷിഗണെയും ഒന്റാറിയോയെയും ബന്ധിപ്പിക്കുന്ന ഈ പാലം വടക്കേ അമേരിക്കയിലെ ഏറ്റവും തിരക്കേറിയ വ്യാപാര പാതകളിലൊന്നാണ്. ഈ വർഷം പാലം തുറക്കാനിരിക്കെയാണ് ട്രംപിന്റെ പുതിയ നീക്കം.
കാനഡ പ്രധാനമന്ത്രി മാർക്ക് കാർണിയുമായി (Mark Carney) ഉടൻ ചർച്ചകൾ ആരംഭിക്കുമെന്നും അമേരിക്കയ്ക്ക് അർഹമായ നഷ്ടപരിഹാരം ലഭിക്കാതെ വിട്ടുവീഴ്ചയില്ലെന്നും ട്രംപ് വ്യക്തമാക്കി.
