ജില്ലാപഞ്ചായത്ത് വികസന സെമിനാർ മന്ത്രി ഉദ്ഘാടനം ചെയ്തു
കഴിഞ്ഞ കാൽനൂറ്റാണ്ടിലെ ജനകീയാസൂത്രണ അനുഭവങ്ങൾ മുൻനിർത്തിയാണ് സർക്കാർ വികസന പദ്ധതികൾ തയ്യാറാക്കുന്നതെന്ന് കൃഷി വകുപ്പ് മന്ത്രി പി പ്രസാദ് പറഞ്ഞു. ജില്ലാ പഞ്ചായത്ത് ജനകീയാസൂത്രണ പദ്ധതി 2026-27 ൻ്റെ ഭാഗമായുള്ള വികസന സെമിനാർ ആലപ്പുഴ കർമ്മസദൻ ഹാളിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ജില്ലയുടെ വരുംകാല വികസനപാത നിശ്ചയിക്കുകയെന്നതാണ് ഇത്തരം വികസന സെമിനാറുകളുടെ ലക്ഷ്യമെന്ന് മന്ത്രി പറഞ്ഞു. വികസനമെന്നത് റോഡുകളിലും കെട്ടിടങ്ങളിലും മാത്രം ഒതുങ്ങുന്നതല്ല. ആരോഗ്യമുള്ള സമൂഹത്തെ സൃഷ്ടിക്കുക, ഓരോ കുടുംബത്തിനും സ്ഥിരവരുമാനം ഉറപ്പാക്കുക, മാന്യതയുള്ള തൊഴിലവസരങ്ങൾ സൃഷ്ടിക്കുക എന്നിവയും വികസനത്തിന്റെ ഭാഗമാണെന്നും അതിനുള്ള പ്രവർത്തനങ്ങളാണ് സർക്കാർ നടപ്പിലാക്കുന്നതെന്നും മന്ത്രി പറഞ്ഞു.
ജില്ലാ പഞ്ചായത്ത് 2026-27 വാർഷിക പദ്ധതി രൂപീകരണത്തിനായി വിവിധ വർക്കിംഗ് ഗ്രൂപ്പുകൾ, ഗ്രാമസഭകൾ നൽകിയ നിർദ്ദേശങ്ങൾ ക്രോഡീകരിച്ചു തയ്യാറാക്കിയ കരട് പദ്ധതിരേഖ ചർച്ച ചെയ്ത് അംഗീകരിക്കുന്നതിന്റെ ഭാഗമായാണ് സെമിനാർ സംഘടിപ്പിച്ചത്. സെമിനാറിൽ എച്ച് സലാം എംഎൽഎ കരട് പദ്ധതി രേഖ പ്രകാശനം ചെയ്തു. ജില്ലാ പഞ്ചായത്ത് പ്രസിഡന്റ് എ മഹേന്ദ്രൻ അധ്യക്ഷനായി. വൈസ് പ്രസിഡന്റ് ഷീന സനൽകുമാർ, സ്ഥിരംസമിതി അധ്യക്ഷരായ എസ് രാധാകൃഷ്ണൻ, സന്ധ്യാ ബെന്നി, ആർ രാഹുൽ, ഡി അംബുജാക്ഷി ടീച്ചർ, ജില്ലാ പഞ്ചായത്ത് സെക്രട്ടറി വി പ്രദീപ് കുമാർ, ഗ്രാമ, ബ്ലോക്ക് പഞ്ചായത്ത് പ്രസിഡന്റുമാർ, ജില്ലാ പഞ്ചായത്തംഗങ്ങൾ, മറ്റ് ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.
