ആരോഗ്യമന്ത്രിയുടെ നാടകം പൊളിഞ്ഞതിന്റെ ജാള്യതയില് സിപിഎം കേരളത്തില് വ്യാപകമായി അക്രമം നടത്തുകയാണെന്നും അതിന്റെ ഭാഗമാണ്
മന്ത്രി വീണാ ജോര്ജിനെതിരെ പ്രതിഷേധിച്ച കെ എസ് യു നേതാവ് ബിതുല് ബാലന്റെ കോഴിക്കോട് വടകര തോടന്നൂരിലെ വീടിനുനേരെ നടത്തിയ ബോംബേറെന്നും കെപിസിസി പ്രസിഡന്റ് സണ്ണി ജോസഫ് എംഎല്എ.
സിപിഎമ്മിന്റെ അസഹിഷ്ണുതയാണ് ഇതിലൂടെ പ്രകടമാകുന്നത്. ഭരണപരാജയത്തിലും കെടുകാര്യസ്ഥതയിലും ജനങ്ങളുടെ മുന്നില് പ്രതിക്കൂട്ടില് നില്ക്കുന്ന സിപിഎമ്മിന് മുഖം രക്ഷിക്കാനുള്ള കച്ചിത്തുരുമ്പായിരുന്നു വനിതാ മന്ത്രിക്കെതിരായ അതിക്രമ നാടകം. പക്ഷെ അതിലെ സത്യം ജനം തിരിച്ചറിഞ്ഞതോടെ സിപിഎം കൂടുതല് അപഹാസ്യമായി. ഇതോടെ വ്യാപകമായ അക്രമം നടത്തി കേരളീയ സമൂഹത്തിന്റെ സമാധാന അന്തരീക്ഷം തകര്ക്കുകയാണ് സിപിഎം പദ്ധതി.
മന്ത്രിയെ അക്രമിച്ചെന്ന കള്ളക്കേസില് ബിതുല് ബാലന് റിമാര്ഡില് കഴിയുമ്പോഴാണ് ഈ ബോംബേറ്. കെഎസ് യു നേതാവിന്റെ കുടുംബത്തെ വകവരുത്തനാണ് സിപിഎം പദ്ധതിയിട്ടതെന്ന് ഇതിലൂടെ വ്യക്തം.കൃത്യമായ ഗൂഢാലോചന നടത്തിയാണ് സിപിഎം അക്രമം നടത്തിയത്. ഇരുട്ടിന്റെ മറവില് അക്രമം നടത്തുന്നത് സിപിഎമ്മിന്റെ ഭീരുത്വത്തിന് തെളിവാണ്. ഇത്തരം ഭീഷണികൊണ്ട് കോണ്ഗ്രസ് പ്രവര്ത്തകരുടെ പോരാട്ടവീര്യം തകര്ക്കാനാവില്ല.
യുഡിഎഫ് നേതാക്കള്ക്കും പ്രവര്ത്തകര്ക്കും എതിരെ അക്രമം ഉണ്ടാകുമ്പോള് നിഷ്ക്രിയമാകുന്ന പോലീസ്, അവരെ ചെയ്യാത്ത കുറ്റത്തിന്റെ പേരില് വേട്ടയാടാന് വലിയ ശുഷ്കാന്തിയാണ് കാട്ടുന്നത്.ബിതുല് ബാലന്റെ വീടിന് നേരെ ബോംബേറിഞ്ഞവര്ക്കെതിരെ കര്ശന നിയമനടപടി പോലീസ് സ്വീകരിക്കണം. മറിച്ച് ഇതെല്ലാം രക്ഷാപ്രവര്ത്തനം എന്നതലത്തില് ചിത്രീകരിക്കുന്ന മുഖ്യമന്ത്രിയുടെ ബലത്തില് അക്രമികളെ സംരക്ഷിക്കുന്ന നിലപാട് പാദസേവകരായ പോലീസ് സ്വീകരിച്ചാല് അതിന് അവര് കനത്ത വില നല്കേണ്ടിവരും. എക്കാലവും മുഖ്യമന്ത്രി പദത്തില് പിണറായി വിജയനുണ്ടാകില്ല. അന്ന് ഈ ചെയ്തികള്ക്കെല്ലാം കണക്ക് പറയേണ്ടിവരുമെന്നും സണ്ണി ജോസഫ് പറഞ്ഞു.
