കേരള സ്റ്റേറ്റ് സ്പോർട്സ് കൗൺസിലിന്റെ അധീനതയിൽ വിവിധ ജില്ലകളിലായി പ്രവർത്തിക്കുന്ന കോളേജ് സ്പോർട്സ് അക്കാഡമികളിലേക്ക് 2026-27 അധ്യയന വർഷത്തെ കായിക താരങ്ങളെ തെരഞ്ഞെടുക്കുന്നതിന് സോണൽ സെലക്ഷൻ നടത്തുന്നു. അത്ലറ്റിക്സ്, ആർച്ചറി, ബാസ്കറ്റ്ബോൾ, ബോക്സിംഗ്, കനോയിംഗ്, കയാക്കിംഗ്, സൈക്ലിംഗ്, ഫെൻസിംഗ്, ഫുട്ബോൾ, ഹാൻഡ്ബോൾ, ഹോക്കി, ജൂഡോ, കബഡി, ഖൊ-ഖൊ, നെറ്റ്ബോൾ, റോവിംഗ്, സോഫ്റ്റ്ബോൾ, സ്വിമ്മിംഗ്, തയ്ക്വൺഡോ, വോളിബോൾ, വെയ്റ്റ് ലിഫ്റ്റിംഗ്, റെസ്ലിംഗ് എന്നീ കായിക ഇനങ്ങളിലാണ് ഡിഗ്രി ഒന്നാം വർഷ ക്ലാസുകളിലേക്ക് സെലക്ഷൻ (പുരുഷ, വനിത കായികതാരങ്ങളെ) സംഘടിപ്പിക്കുന്നത്. അതത് കായിക ഇനത്തിൽ സംസ്ഥാന ചാമ്പ്യൻഷിപ്പുകളിൽ ഒന്നും, രണ്ടും, മൂന്നും സ്ഥാനം ലഭിച്ചവർക്ക് സെലക്ഷനിൽ പങ്കെടുക്കാം. ഏപ്രിൽ 17ന് തലശ്ശേരി മുനിസിപ്പൽ സ്റ്റേഡിയം കണ്ണൂർ, 18ന് ഫിസിക്കൽ എഡ്യൂക്കേഷൻ കോളേജ്, ഈസ്റ്റ് ഹിൽ, കോഴിക്കോട്, 20 ന് തോപ്പ് സ്റ്റേഡിയം, തൃശൂർ, 21ന് സെന്റ് ഡൊമനിക് കോളേജ്, കാഞ്ഞിരപ്പിള്ളി, കോട്ടയം, 23ന് യൂണിവേഴ്സിറ്റി സ്റ്റേഡിയം, പാളയം, തിരുവനന്തപുരം, 27 ന് കലവൂർ ഗോപിനാഥ് സ്റ്റേഡിയം (കനോയിംഗ് കയാക്കിംഗ്, റോവിംഗ്).
സെലക്ഷനിൽ പങ്കെടുക്കുവാൻ താല്പര്യമുള്ളവർ സ്പോർട്സിൽ പ്രാവീണ്യം തെളിയിച്ച സർട്ടിഫിക്കറ്റ്, ആധാർകാർഡ്, 2 പാസ്പോർട്ട് സൈസ് ഫോട്ടോ, സ്പോർട്സ് കിറ്റ് എന്നിവയുമായി സെലക്ഷൻ വേദിയിൽ രാവിലെ 8 മണിക്ക് ഹാജരാകണം.