കുട്ടനാടിന്റെ യാത്രാദുരിതത്തിന് ശാശ്വത പരിഹാരമായി പുനരുദ്ധരിക്കപ്പെട്ട ആലപ്പുഴ – ചങ്ങനാശ്ശേരി (എ.സി) റോഡ് ഉൾപ്പെടെ 17 പൊതുമരാമത്ത് പദ്ധതികൾ നാടിന് സമർപ്പിച്ചു. കേരളത്തിലെ ആദ്യത്തെ സെമി എലിവേറ്റഡ് ഹൈവേ മാതൃകയിൽ നിർമ്മിച്ചിരിക്കുന്ന റോഡാണിത്. പ്രളയത്തെയും കാലാവസ്ഥാ വ്യതിയാനങ്ങളെയും പ്രതിരോധിക്കത്തക്ക രീതിയിൽ റീ-ബിൽഡ് കേരള ഇനിഷ്യേറ്റീവിലൂടെ 672 കോടി രൂപ ചെലവഴിച്ചാണ് അന്താരാഷ്ട്ര നിലവാരത്തിൽ എ.സി റോഡ് നവീകരിച്ചത്. 24.16 കിലോമീറ്റർ നീളത്തിലുള്ള ഈ പാതയിൽ 4 വലിയ പാലങ്ങളും 5 ഫ്ലൈ ഓവറുകളും ഉൾപ്പെടെ അത്യാധുനിക സൗകര്യങ്ങളാണ് ഒരുക്കിയിരിക്കുന്നത്. ഇതോടൊപ്പം ഉദ്ഘാടനം ചെയ്ത നെടുമുടി – തകഴി പഞ്ചായത്തുകളെ ബന്ധിപ്പിക്കുന്ന പടഹാരം പാലവും കുട്ടനാടിന്റെ ഗതാഗത ശൃംഖലയ്ക്ക് വലിയ കരുത്താകും. കുട്ടനാടിന്റെ സമഗ്ര വികസനത്തിനായി 615 കോടി രൂപയുടെ കുടിവെള്ള പദ്ധതിക്കും 132 കോടി രൂപയുടെ വീയപുരം – മുളയ്ക്കാന്തുരുത്തി റോഡ് നിർമ്മാണത്തിനും ഇന്ന് തുടക്കം കുറിച്ചു. അത്യാധുനിക പശ്ചാത്തല സൗകര്യങ്ങളുള്ള നാടായി കേരളത്തെ മാറ്റിത്തീർക്കുമെന്ന എൽഡിഎഫ് സർക്കാരിന്റെ ഉറപ്പാണ് ഈ പദ്ധതികളിലൂടെ യാഥാർത്ഥ്യമാവുന്നത്.
