തിരുവനന്തപുരം : കേരള നിയമസഭാ തെരഞ്ഞെടുപ്പിന്റെ പരസ്യപ്രചാരണത്തിനുള്ള സമയം ചൊവ്വാഴ്ച വൈകിട്ട് ആറുമണിക്ക് അവസാനിച്ചിട്ടും സിപിഎമ്മും ബിജെപിയും നവമാധ്യമങ്ങളിലൂടെയും ഓണ്‍ലൈനിലൂടെയും പരസ്യപ്രചാരണം തുടരുന്നതിനെതിരെ പരാതി. സംസ്ഥാനത്തെ മുഖ്യ തെരഞ്ഞെടുപ്പ് ഓഫീസര്‍ നടപടിയെടുക്കാത്തതിനെ തുടര്‍ന്ന് കോണ്‍ഗ്രസിന്റെ പ്രചാരണ സമിതി അധ്യക്ഷനായ രമേശ് ചെന്നിത്തല കേന്ദ്ര തെരഞ്ഞെടുപ്പ് കമ്മിഷനെ സമീപിച്ചു.
നവമാധ്യമങ്ങളിലൂടെയുള്ള പരസ്യപ്രചാരണം തുടരുന്ന കാര്യം മുഖ്യ തെരഞ്ഞെടുപ്പ് ഓഫീസര്‍ രത്തന്‍ യു ഖേല്‍ക്കറെ ചൊവ്വാഴ്ച തന്നെ ഫോണിലൂടെയും രേഖാമൂലവും അറിയിച്ചിരുന്നു. എന്നാല്‍ ഇന്നലെ ഉച്ചയ്ക്ക് രണ്ടുമണിവരെയായിട്ടും യാതൊരു നടപടിയും സ്വീകരിച്ചില്ലെന്ന് രമേശ് ചെന്നിത്തല വ്യക്തമാക്കി. തുടര്‍ന്നാണ് പരാതിയുമായി കേന്ദ്ര തെരഞ്ഞെടുപ്പ് കമ്മിഷണറെ സമീപിച്ചത്.
ഓണ്‍ലൈന്‍ നവമാധ്യമങ്ങളിലൂടെയുള്ള പരസ്യപ്രചാരണം തെരഞ്ഞെടുപ്പ് ചട്ടങ്ങള്‍ക്ക് വിരുദ്ധമാണെന്നും എന്നാല്‍ തെരഞ്ഞെടുപ്പ് കമ്മിഷന്‍ ഇക്കാര്യത്തില്‍ പക്ഷപാതപരമായ നിലപാടാണ് സ്വീകരിക്കുന്നതെന്നും അദ്ദേഹം ആരോപിച്ചു. മുഖ്യ തെരഞ്ഞെടുപ്പ് ഓഫീസറുടെ ഭാഗത്തുനിന്നും ഉണ്ടായത് ഗുരുതരമായ വീഴ്ചയാണെന്നും രമേശ് ചെന്നിത്തല പറഞ്ഞു.