കൊച്ചി: ആഗോള ബാങ്കിങ് രംഗത്തെ അതികായരായ സ്റ്റാൻഡേർഡ് ചാറ്റേർഡ് ബാങ്ക് ഇന്ത്യയുടെ ക്രെഡിറ്റ് കാർഡുകൾ ഏറ്റെടുക്കാനൊരുങ്ങി ഫെഡറൽ ബാങ്ക്. ഇതുസംബന്ധിച്ച കരാറിൽ ഏർപ്പെടുന്നതിന് ഫെഡറൽ ബാങ്കിന്റെ ഡയറക്ടർ ബോർഡ് അംഗീകാരം നൽകി. രാജ്യത്തെ മുൻനിര നഗരങ്ങളിൽ ഉൾപ്പെടെ, ബാങ്കിന്റെ ക്രെഡിറ്റ് കാർഡ് ബിസിനസ് ശക്തിപ്പെടുത്തുകയാണ് പരസ്പര സഹകരണത്തിലൂടെ ലക്ഷ്യമിടുന്നത്. ഫെഡറൽ ബാങ്കിനെ സംബന്ധിച്ച്, ഇന്ത്യയിലെ സമ്പന്ന ഇടപാടുകാർക്കിടയിലുള്ള ബിസിനസ് വിപുലീകരണവും കരാറിലൂടെ സാധ്യമാകും.
നിലവിൽ, കോ- ബ്രാൻഡഡ് വിഭാഗത്തിൽ 13 ലക്ഷവും നോൺ കോ- ബ്രാൻഡഡ് വിഭാഗത്തിൽ 8 ലക്ഷവും ആയി 21 ലക്ഷം ക്രെഡിറ്റ് കാർഡുകളാണ് ഫെഡറൽ ബാങ്ക് ഇഷ്യൂ ചെയ്തിരിക്കുന്നത്. 4.50 ലക്ഷം ക്രെഡിറ്റ് കാർഡുകളാണ് സ്റ്റാൻഡേർഡ് ചാറ്റേർഡ് ബാങ്കിൽ നിന്ന് ഏറ്റെടുക്കുന്നത്. ഏറ്റെടുക്കുന്ന ക്രെഡിറ്റ് കാർഡിന്റെ 75 ശതമാനവും രാജ്യത്തെ സാമ്പത്തികമായി മുന്നിലുള്ള 8 നഗരങ്ങളിൽ ഇഷ്യൂ ചെയ്തതാണ്. ഈ മേഖലയിലേക്കുള്ള ഫെഡറൽ ബാങ്കിന്റെ സാന്നിധ്യം വർധിപ്പിക്കാനും ഏറ്റെടുക്കൽ വഴി സാധ്യമാകും.
ഫെഡറൽ ബാങ്കിന്റെ റീട്ടെയ്ൽ ക്രെഡിറ്റ് വ്യാപാരം വർധിപ്പിക്കുന്നതിനുള്ള തന്ത്രപ്രധാനമായ സഹകരണമാണ് സ്റ്റാൻഡേർഡ് ചാറ്റേർഡ് ബാങ്കുമായി നടത്തുന്നതെന്ന് എംഡിയും സിഇഒയുമായ കെവിഎസ് മണിയൻ പറഞ്ഞു. വളരെ മികച്ച രീതിയിൽ ക്രെഡിറ്റ് കാർഡ് ഉപയോഗിക്കുന്ന ഒരു വലിയ വിഭാഗം ഇടപാടുകാരെ ഇതിലൂടെ ബാങ്കിന് ലഭിക്കും. ക്രെഡിറ്റ് കാർഡ് ബിസിനസ് രംഗം ശക്തിപ്പെടുത്തുന്നതിനോടൊപ്പം പുതിയ ഇടപാടുകാരുടെ ദീർഘകാല ബന്ധം രൂപപ്പെടുത്തുന്നതിനും ഏറെ സഹായകരമാണ് സഹകരണമെന്നും അദ്ദേഹം കൂട്ടിച്ചേർത്തു. സ്റ്റാൻഡേർഡ് ചാറ്റേർഡ് ബാങ്കിന്റെ ഇടപാടുകാരെ ഫെഡറൽ ബാങ്കിന്റെ നൂതന സേവനങ്ങൾ പ്രയോജനപ്പെടുത്തുന്നതിന് സ്വാഗതം ചെയ്യുന്നതായി കൺസ്യൂമർ ബാങ്കിങ് വിഭാഗം നാഷണൽ ഹെഡ് വിരാട് ദിവാൻജി പറഞ്ഞു. ബാങ്കിന്റെ വൈവിധ്യമാർന്ന ഉത്പന്നങ്ങളും സേവനങ്ങളും തടസമില്ലാതെ ലഭ്യമാക്കുന്നതിന് ഫെഡറൽ ബാങ്ക് എക്കാലവും പ്രതിബദ്ധത പുലർത്തുമെന്നും അദ്ദേഹം കൂട്ടിച്ചേർത്തു.
ഇടപാടുകാരുമായി ബന്ധം ശക്തിപ്പെടുത്തുന്നതിനുള്ള ഞങ്ങളുടെ ഉദ്ദേശത്തിന്റെ ഭാഗമായാണ് ഈ തീരുമാനം കൈക്കൊണ്ടിരിക്കുന്നത്. ക്രെഡിറ്റ് കാർഡുകൾ ഞങ്ങളുടെ പ്രധാന ഉത്പന്നമായി തുടരും. അതിനൊപ്പം, വെൽത് മാനേജ്മെന്റ് പ്ലാറ്റ്ഫോം കൂടുതൽ ശക്തിപ്പെടുത്തുന്നതിനും മുൻനിര ഇടപാടുകാർക്കായുള്ള സേവന നിർദേശങ്ങൾ മെച്ചപ്പെടുത്തുകയും ചെയ്യുന്നുണ്ട്. ഇതിന്റെ ഭാഗമായി അടുത്തിടെ ‘മെറ്റൽ ബിയോണ്ട്’ ക്രെഡിറ്റ് കാർഡ് ഞങ്ങൾ അവതരിപ്പിച്ചിരുന്നു. ഇടപാടുകാർക്ക് തടസ്സമില്ലാത്ത സേവനം നൽകിക്കൊണ്ടും കൂടുതൽ നിക്ഷേപം നടത്തിക്കൊണ്ടും സാന്നിധ്യം മെച്ചപ്പെടുത്തുന്നതിലൂടെ സ്റ്റാൻഡേഡ് ചാർട്ടേഡിന് ഒരു പ്രധാന വിപണിയായി ഇന്ത്യ തുടരും. ഇടപാടുകാർക്ക് സുഗമമായ മാറ്റം ഉറപ്പാക്കാൻ ഞങ്ങൾ ഫെഡറൽ ബാങ്കുമായി സഹകരിച്ച് പ്രവർത്തിക്കുന്നതാണ്. സ്റ്റാൻഡേർഡ് ചാറ്റേർഡ് ബാങ്ക് ഇന്ത്യ ആൻഡ് സൗത്ത് ഏഷ്യ വെൽത്ത് ആൻഡ് റീട്ടെയ്ൽ ബാങ്കിങ് വിഭാഗം എംഡിയും ഹെഡുമായ ആദിത്യ മൻലോയ് പറഞ്ഞു.
2026 അവസാനത്തോടുകൂടി ഏറ്റെടുക്കൽ നടപടികൾ പൂർത്തീകരിക്കുമെന്ന് ഫെഡറൽ ബാങ്ക് അറിയിച്ചു.
Athulya K R
