പൊതുവ ക്രിസ്ത്യൻ സ്ത്രീകൾക്ക് ശ്ലീഹന്മാരായ പൗലോസ്, പത്രോസ് തുടങ്ങിയവരോട് സ്വല്പം വിരോധം ഉണ്ടെന്നു പറയപ്പെടുന്നു .കാരണം “ഭർത്താക്കന്മാർക്ക് കീഴടങ്ങിയിരിക്കണമെന്ന്”ബൈബിളിൽ എഴുതിവെച്ചവർ ഇവരാണത്രെ! പലപ്പോഴും വിവാഹ പ്രസംഗങ്ങളിൽ അച്ഛന്മാർ “കീഴടങ്ങൽ” എന്ന വശത്തിന് അമിത പ്രാധാന്യം നൽകി സംസാരിക്കാറുണ്ട്. ഇത് പലപ്പോഴും സ്ത്രീകളിൽ വിവേചനബോധം ഉണ്ടാക്കുന്നു. വരികളിലെ ആത്മീയ അർത്ഥത്തേക്കാൾ ഉപരിയായി, അവയെ ലിംഗവിവേചനത്തിന് ആയുധമാക്കുന്ന രീതിയാണ് എതിർപ്പുകൾക്ക് പ്രധാന കാരണം.
നിങ്ങളുടെ ദാമ്പത്യം എപ്പോഴെങ്കിലും ഒരു വടംവലി പോലെ തോന്നിയിട്ടുണ്ടോ? പരിഗണിക്കപ്പെടണമെന്നും സ്നേഹിക്കപ്പെടണമെന്നും നിങ്ങൾ ആഗ്രഹിക്കുന്നു, എന്നാൽ അടുപ്പത്തിന് പകരം അകൽച്ചയും പിരിമുറുക്കവുമാണ് ഫലം. പല സ്ത്രീകൾക്കും ബൈബിളിലെ “കീഴടങ്ങുക”, “ബഹുമാനിക്കുക” എന്നീ വാക്കുകൾ കേൾക്കുമ്പോൾ വലിയ പ്രയാസം തോന്നാറുണ്ട്. അത് നീതിയല്ലെന്നും അല്ലെങ്കിൽ ഇന്നത്തെ കാലത്തിന് യോജിച്ചതല്ലെന്നും നിങ്ങൾ കരുതിയേക്കാം.
‘അവനെ മാറ്റുക’ എന്ന തെറ്റായ ചിന്ത:
അടുത്തിടെ ഞങ്ങളെ കാണാൻ വന്ന ഒരു ദമ്പതികളുടെ കാര്യം നോക്കാം. ഭർത്താവിനെ “നന്നാക്കിയെടുക്കാൻ” വേണ്ടിയാണ് ആ ഭാര്യ കൗൺസിലിംഗിന് നിർബന്ധിച്ചത്. എന്നാൽ സംസാരത്തിനിടയിൽ ഒരു കാര്യം വ്യക്തമായി; ഭർത്താവ് ജോലി കഴിഞ്ഞ് വരുമ്പോൾ മൊബൈലിലോ പത്രത്തിലോ, ടീവിയിലോ അഭയം പ്രാപിക്കുന്നു, ഭാര്യയാകട്ടെ നിരന്തരമായ കുറ്റപ്പെടുത്തലുകളിലൂടെയും ദേഷ്യത്തിലൂടെയും അവനെ നേരിടുന്നു. അവരെ സംബന്ധിച്ചിടത്തോളം ബഹുമാനം എന്നത് ചോദിച്ചു വാങ്ങേണ്ട ഒന്നാണ്. ഭർത്താവ് അത് അർഹിക്കുന്നില്ല എന്നതായിരുന്നു അവരുടെ വാദം.
ഇന്ന് നമ്മുടെ സംസ്കാരം ‘കീഴടങ്ങൽ’ എന്നാൽ ബലഹീനതയാണെന്ന് നമ്മെ പഠിപ്പിക്കുന്നു. ഒന്നു പറഞ്ഞു രണ്ടാമത്തേതിന് “ഡൈവോഴ്സ്” എന്ന് പറയാനുള്ള അവകാശത്തിലും അവസ്ഥയിലും സ്ത്രീകളും പ്രബുദ്ധരായിക്കഴിഞ്ഞു. അതുകൊണ്ടാണ് ഈ വാക്കുകളോട് നമുക്ക് എത്രയും എതിർപ്പ് തോന്നുന്നത്.
എന്നാൽ ബൈബിൾ മുന്നോട്ടുവെക്കുന്ന കാഴ്ചപ്പാട് തികച്ചും വ്യത്യസ്തമാണ്. 1 പത്രോസ് 3:1-2-ൽ പറയുന്നത്, വാക്കുകളേക്കാൾ ഉപരിയായി ഒരു ഭാര്യയുടെ ദൈവഭക്തിയുള്ള പെരുമാറ്റത്തിന് ഭർത്താവിനെ സ്വാധീനിക്കാൻ കഴിയുമെന്നാണ്.
ഇത് അടിച്ചമർത്തപ്പെടാനോ പീഡനങ്ങൾ സഹിക്കാനോ ഉള്ള ആഹ്വാനമല്ല. മറിച്ച്, ഭർത്താവിന്റെ കുറവുകളേക്കാൾ ദൈവത്തിൽ വിശ്വസിക്കുന്ന ഒരു ഹൃദയത്തിന്റെ നിലപാടാണ്.:
സദൃശവാക്യങ്ങൾ 31:23-ൽ ദൈവവഴിയിൽ നടക്കുന്ന ഒരു സ്ത്രീയുടെ ഭർത്താവ് സമൂഹത്തിൽ ബഹുമാനിക്കപ്പെടുന്നതിനെക്കുറിച്ച് പറയുന്നുണ്ട്. ഇത് ആ പുരുഷന്റെ മാത്രം കഴിവല്ല, മറിച്ച് അവന്റെ പിന്നിൽ നിൽക്കുന്ന ഭാര്യയുടെ സ്വാധീനത്തിന്റെ ഫലം കൂടിയാണ്.
വിനയം തിരഞ്ഞെടുക്കുന്നത് നിങ്ങളുടെ ശബ്ദമില്ലാതാക്കാനല്ല. മറിച്ച്, വികാരങ്ങൾക്കനുസരിച്ച് പ്രതികരിക്കാതെ ദൈവത്തിന്റെ വാക്കിനെ വിശ്വസിക്കാനാണ്. ജഡികമായി ചിന്തിക്കുമ്പോൾ കീഴടങ്ങുന്നത് തോൽവിയായി തോന്നാം, എന്നാൽ ആത്മീയമായി നോക്കിയാൽ അത് നിങ്ങളുടെ ഏറ്റവും വലിയ വിജയമായി മാറും.
വാൽക്കഷണം : വിജയിച്ച ഒരു ഭാര്യാജി പറഞ്ഞതിങ്ങനെ “ഞാൻ എന്റെ ഭർത്താവിന് പൂർണ്ണമായും വിധേയയാണ്. എനിക്ക് ഇഷ്ടമുള്ളത് ഞാൻ ചെയ്യും, പക്ഷേ ഈ കാര്യത്തിൽ തനിക്ക് യാതൊരു പങ്കുമില്ല എന്ന ആശയത്തിന് അദ്ദേഹം കീഴടങ്ങുന്നു.”
