കൊച്ചി: ഓഹരി വിപണിയായ നാഷണൽ സ്റ്റോക്ക് എക്സ്ചേഞ്ചിൽ (എൻഎസ്ഇ) ഇനിമുതൽ ഇലക്ട്രോണിക് ഗോൾഡ് റെസീപ്റ്റ് മുഖേന ട്രേഡിംഗ് നടത്താം. ഇതുസംബന്ധിച്ച മുഴുവൻ നടപടിക്രമങ്ങളും പൂർത്തീകരിച്ചതായി എൻഎസ്ഇ അറിയിച്ചു. കഴിഞ്ഞ ശനിയാഴ്ച ഇലക്ട്രോണിക് ഗോൾഡ് റെസീപ്റ്റ് മുഖേനയുള്ള പരീക്ഷണ വ്യാപാരം (മോക് ട്രേഡിംഗ്) വിജയകരമായിരുന്നു. നിക്ഷേപകർക്കിടയിൽ സ്വീകാര്യത ലഭിച്ചതിനെത്തുടർന്ന് മെയ് 18 തിങ്കൾ മുതൽ വ്യാപാരത്തിന് തുടക്കമിട്ടു. സ്വർണ നിക്ഷേപങ്ങൾ ഡിജിറ്റലായി നടത്തുന്നവർക്ക് ഉപകാരപ്രദമായ ട്രേഡിംഗ് രീതിയാണിത്. സ്റ്റോക്ക്, ബോണ്ട് എന്നിവപോലെ എളുപ്പത്തിൽ വ്യാപാരം നടത്താമെന്നതാണ് പ്രത്യേകത. ഡിജിറ്റലായി നിക്ഷേപിച്ച സ്വർണത്തിന് തത്തുല്യമായ യഥാർത്ഥ സ്വർണം, സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യയുടെ (സെബി) നിയന്ത്രണത്തിൽ അഹമ്മദാബാദ്, മുംബൈ എന്നിവിടങ്ങളിൽ പ്രവർത്തിക്കുന്ന വാൾട്ടിങ് ആൻഡ് കളക്ഷൻ സെന്ററുകളിൽ സൂക്ഷിക്കും. ഡൽഹി, കൊൽക്കത്ത, ചെന്നൈ, ബാംഗ്ലൂർ എന്നിവിടങ്ങളിലും സെന്ററുകൾ പ്രവർത്തനസജ്ജമാണ്. ഡിജിറ്റൽ ഗോൾഡ് റെസീപ്റ്റ് മുഖേനയുള്ള വ്യാപാരം വർധിക്കുമെന്നതിനാൽ രാജ്യമൊട്ടാകെ 120 ഇടങ്ങളിലേക്ക് വാൾട്ടിങ് ആൻഡ് കളക്ഷൻ സെന്ററുകൾ വിപുലീകരിക്കുമെന്ന് എൻഎസ്ഇ അറിയിച്ചു.
എന്താണ് ഇലക്ട്രോണിക് ഗോൾഡ് റെസീപ്റ്റ്?
ഡിജിറ്റലായി സ്വർണ നിക്ഷേപം നടത്തിയതിന്റെ രേഖയാണ് ഇലക്ട്രോണിക് ഗോൾഡ് റെസീപ്റ്റ്. ഇത്തരത്തിൽ നിക്ഷേപം നടത്തിയതിന് തുല്യമായ സ്വർണം സെബിയുടെ നിയന്ത്രണത്തിലുള്ള വോൾട്ടുകളിൽ സൂക്ഷിക്കുകയും ഡിജിറ്റൽ റെസീപ്റ്റ് നൽകുകയും ചെയ്യുന്നു. സ്വർണം സൂക്ഷിക്കേണ്ടതിന്റെ ഉത്തരവാദിത്തമോ ലോക്കർ ചെലവുകളുടെ അധിക ബാധ്യതയോ നിക്ഷേപകർക്ക് ഉണ്ടാകുന്നില്ല. നിക്ഷേപകർക്ക് എപ്പോൾ വേണമെങ്കിലും റെസീപ്റ്റ് സമർപ്പിച്ചു ഫിസിക്കൽ സ്വർണം വാങ്ങിക്കാവുന്നതാണ്.
Anu Maria Thomas
