കൊച്ചി: എംഎസ്എംഇ മേഖലയ്ക്ക് കൂടുതൽ കരുത്തുപകരാനും വായ്പകൾ സംരംഭകരിലേക്ക് നേരിട്ടെത്തിക്കാനും ലക്ഷ്യമിട്ടുള്ള എസ്ഐഡിബിഐയുടെ (SIDBI) പുതിയ പദ്ധതികൾ കേന്ദ്ര ധനമന്ത്രി നിർമ്മല സീതാരാമൻ ഉദ്ഘാടനം ചെയ്തു. എസ്ഐഡിബിഐയുടെ 37-ാമത് സ്ഥാപകദിനാഘോഷ ചടങ്ങിലായിരുന്നു പുതിയ പദ്ധതികൾക്ക് തുടക്കം കുറിച്ചത്.
ഗ്രാമീണ മേഖലകളിൽ വായ്പാ ലഭ്യത വർധിപ്പിക്കാൻ റീജിയണൽ റൂറൽ ബാങ്കുകളുമായി സഹകരിച്ചുള്ള ‘എസ്ഐഡിബിഐ ആർആർബി കോ-ലെൻഡിങ് പോർട്ടൽ’, എംഎസ്എംഇകൾക്ക് യന്ത്രോപകരണങ്ങളും ധനസഹായവും ലഭ്യമാക്കുന്ന ‘എസ്ഐഡിബിഐ മാക്ഫിൻ മാർട്ട്’ (www.machineryportal.sidbi.in) എന്നീ ഡിജിറ്റൽ പ്ലാറ്റ്ഫോമുകളാണ് ചടങ്ങിൽ പുറത്തിറക്കിയത്. അടുത്ത മൂന്ന് വർഷത്തിനുള്ളിൽ പതിനായിരത്തോളം ഗ്രാമീണ ചെറുകിട-കുടിൽ വ്യവസായ യൂണിറ്റുകളുടെ മുഖച്ഛായ മാറ്റാൻ ലക്ഷ്യമിട്ടുള്ള ‘മോഡേണൈസേഷൻ ഓഫ് റൂറൽ എന്റർപ്രൈസസ്’ (MoRE) പദ്ധതിക്കും തുടക്കം കുറിച്ചു.
ഇന്ത്യയുടെ വളർച്ചയിലും കൂടുതൽ തൊഴിലവസരങ്ങൾ സൃഷ്ടിക്കുന്നതിലും കയറ്റുമതി വർധിപ്പിക്കുന്നതിലും എംഎസ്എംഇകൾ നിർണായക പങ്കാണ് വഹിക്കുന്നതെന്ന് നിർമ്മല സീതാരാമൻ പറഞ്ഞു. പശ്ചിമേഷ്യയിലെ സംഘർഷങ്ങളെ തുടർന്നുണ്ടായ പ്രതിസന്ധികളിൽ നിന്ന് എംഎസ്എംഇ മേഖലയെ സംരക്ഷിക്കാൻ കേന്ദ്രസർക്കാർ സ്വീകരിച്ച സഹായ നടപടികളും മന്ത്രി വിശദീകരിച്ചു. ഇതിന്റെ ഭാഗമായി നടപ്പാക്കിയ ‘എമർജൻസി ക്രെഡിറ്റ് ലൈൻ ഗ്യാരണ്ടി സ്കീം 5.0’ ഉൾപ്പെടെയുള്ള പദ്ധതികൾ സംരംഭകർക്ക് വലിയ ആശ്വാസമായതായും മന്ത്രി ചൂണ്ടിക്കാട്ടി.
ഡിജിറ്റൽ സാങ്കേതികവിദ്യയിലൂടെയും പുതിയ പങ്കാളിത്തങ്ങളിലൂടെയും എംഎസ്എംഇ വായ്പാ രംഗത്ത് വിപ്ലവകരമായ മാറ്റങ്ങൾ കൊണ്ടുവരാനുള്ള നിരന്തര ശ്രമങ്ങളുടെ ഭാഗമായാണ് പുതിയ പദ്ധതികൾക്ക് തുടക്കം കുറിച്ചതെന്ന് എസ്ഐഡിബിഐയുടെ ചെയർമാനും മാനേജിങ് ഡയറക്ടറുമായ മനോജ് മിത്തൽ പറഞ്ഞു.
Athulya Raj K R
