ഷിക്കാഗോ : ഷിക്കാഗോയിലെ അൽബനി പാർക്ക് (Albany Park) മേഖലയിൽ 32-കാരിയായ യുവതിയെ കുത്തിക്കൊലപ്പെടുത്തിയ കേസിൽ 31-കാരനായ അങ്കുർ പട്ടേൽ (Ankur Patel) എന്നയാൾക്കെതിരെ ഫസ്റ്റ് ഡിഗ്രി കൊലക്കുറ്റം (First-Degree Murder) ചുമത്തി പോലീസ് കേസെടുത്തു.
ഓഗസ്റ്റ് 9-ന് പുലർച്ചെ നോർത്ത് ഏവേഴ്സ് അവന്യൂവിലെ (North Avers Avenue) ഒരു വസതിയിൽ കഴുത്തിൽ കുത്തേറ്റ നിലയിൽ യുവതിയെ അബോധാവസ്ഥയിൽ കണ്ടെത്തുകയായിരുന്നു. സംഭവസ്ഥലത്തെത്തിയ രക്ഷാപ്രവർത്തകർ മരണം സ്ഥിരീകരിച്ചു.
സംഭവത്തിന് ഏകദേശം ഒമ്പത് മണിക്കൂറുകൾക്കുശേഷം പ്രതിയായ അങ്കുർ പട്ടേലിനെ ഷിക്കാഗോയിലെ ഒ’ഹെയർ അന്താരാഷ്ട്ര വിമാനത്താവളത്തിൽ (O’Hare International Airport) നിന്ന് പോലീസ് കസ്റ്റഡിയിലെടുത്തു. തുടർന്ന് ഇയാൾക്കെതിരെ ഫസ്റ്റ് ഡിഗ്രി കൊലക്കുറ്റം ചുമത്തുകയായിരുന്നു.
കൊലപാതകത്തിന് പിന്നിലെ കാരണം സംബന്ധിച്ച് അധികൃതർ ഇതുവരെ ഔദ്യോഗിക വിശദീകരണം നൽകിയിട്ടില്ല. കേസിൽ അന്വേഷണം തുടരുകയാണെന്നും പോലീസ് അറിയിച്ചു.
