കൊച്ചി: ജൈവ ഇന്ധനത്തിന്റെ ഉത്പാദനം, ജൈവ വിഭവങ്ങളുടെ ഉപഭോഗം, മാലിന്യ വിഭവ ശേഖരണം എന്നീ മേഖലകളിൽ സഹകരിക്കുന്നതിന് പൊതുമേഖലാ സ്ഥാപനമായ ഭാരത് പെട്രോളിയം കോർപറേഷൻ ലിമിറ്റഡും (ബിപിസിഎൽ) ഡൽഹി ആസ്ഥാനമായ സെന്റർ ഫോർ സയൻസ് ആൻഡ് എൻവയോൺമെന്റും (സിഎസ്ഇ) തമ്മിൽ ധാരണയിലെത്തി. കംപ്രസ്ഡ് ബയോഗ്യാസ് (സിബിജി) ഉൾപ്പെടെയുള്ള ജൈവ ഇന്ധനത്തിന്റെ ഉൽപാദനക്ഷമതയ്ക്ക് കൂടുതൽ അവസരങ്ങൾ തുറക്കുന്നതാണ് സഹകരണം. ഇന്ധന വിതരണ ശൃംഖലയുടെ വികസനം, ഉപോത്പന്നങ്ങളുടെ കാര്യക്ഷമമായ വിനിയോഗം, സാങ്കേതിക പിന്തുണ, നിർദിഷ്ട പദ്ധതികളുടെ പൂർത്തീകരണം, വിപണി കണ്ടെത്തൽ, വിജ്ഞാന കൈമാറ്റം എന്നിങ്ങനെ ജൈവ ഇന്ധന മേഖലയുമായി ബന്ധപ്പെട്ട സമഗ്ര സഹകരണത്തിനാണ് ലക്ഷ്യമിടുന്നത്. ശുദ്ധവും സുസ്ഥിരവുമായ ഊർജ മേഖലയിലേക്കുള്ള രാജ്യത്തിന്റെ പരിവർത്തനത്തെ ശക്തിപ്പെടുത്തുന്നതിനോടൊപ്പം മാലിന്യ സംസ്കരണ മേഖലയിലെ ഗവേഷണ- വികസനങ്ങൾക്ക് ആക്കം കൂട്ടുകയും ചെയ്യും. ഇതിനായി സെന്റർ ഫോർ സയൻസ് ആൻഡ് എൻവയോൺമെന്റിന്റെ വൈദഗ്ധ്യം വിനിയോഗിക്കാനും ധാരണയുണ്ട്.
ജൈവ ഇന്ധനത്തിന്റെ ഉപോത്പന്നങ്ങളായ ജൈവ വളം, ശുദ്ധീകരിച്ച കാർബൺ ഡൈ ഓക്സൈഡ്, പ്രോട്ടീൻ സമ്പന്നമായ കന്നുകാലി തീറ്റ എന്നിവയുടെ ഉത്പാദനവും ഇതിലൂടെ വർധിപ്പിക്കും. കമ്പനിയുടെ വളർച്ചയിൽ നിർണായകമാകുന്നതാണ് സെന്റർ ഫോർ സയൻസ് ആൻഡ് എൻവയോൺമെന്റുമായുള്ള സഹകരണമെന്നും രാജ്യത്തിന്റെ ജൈവ ഇന്ധന മേഖലയുടെ സുസ്ഥിര വികസനത്തിനുള്ള കൂട്ടായ പരിശ്രമങ്ങളാണ് ലക്ഷ്യമിടുന്നതിനും ബിപിസിഎൽ മാർക്കറ്റിംഗ് ഡയറക്ടർ ശുഭാങ്കർ സെൻ അഭിപ്രായപ്പെട്ടു. സെന്റർ ഫോർ സയൻസ് ആൻഡ് എൻവയോൺമെന്റിന്റെ ഗവേഷണ മികവും ബിപിസിഎല്ലിന്റെ വ്യവസായിക ശേഷിയും ഒരുപോലെ പ്രയോജനപ്പെടുത്താൻ സാധിക്കുന്നതാണ് സഹകരണമെന്ന് സിഎസ്ഇ ഡയറക്ടർ ജനറൽ പറഞ്ഞു. പരസ്പര സഹകരണത്തിനുള്ള പൊതു കാര്യങ്ങളുടെ ചട്ടക്കൂടാണ് ധാരണാപത്രത്തിലുള്ളത്. നിർദിഷ്ട പദ്ധതികളുടെ ആരംഭത്തിനും നടത്തിപ്പിനുമായി പ്രത്യേകം കരാറുകളിൽ ഏർപ്പെടുമെന്നും ബിപിസിഎൽ അറിയിച്ചു.
Julie John
