മുതിർന്ന കോൺഗ്രസ് നേതാവും മുൻ ചിറ്റൂർ എം.എൽ.എയുമായ കെ. അച്യുതന്റെ നിര്യാണത്തിൽ എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ അനുശോചനം രേഖപ്പെടുത്തി.
ജനങ്ങളുടെ മനസ്സറിഞ്ഞ ജനകീയ പൊതുപ്രവർത്തകനായിരുന്നു കെ. അച്യുതൻ. ചിറ്റൂരിന്റെ വികസനത്തിനും ജനങ്ങളുടെ പ്രശ്നങ്ങൾ നിയമസഭയിലും പൊതുസമൂഹത്തിലും ഉയർത്തിക്കൊണ്ടുവരുന്നതിനും അദ്ദേഹം സജീവമായി പ്രവർത്തിച്ചു. കോൺഗ്രസ് പ്രസ്ഥാനത്തോട് ജീവിതകാലം മുഴുവൻ പ്രതിബദ്ധത പുലർത്തിയ നേതാവായിരുന്നു അദ്ദേഹം.
കർഷക കുടുംബത്തിൽ ജനിച്ച കെ. അച്യുതൻ കർഷകരുടെ ഇടയിൽ പ്രവർത്തിച്ചാണ് രാഷ്ട്രീയരംഗത്ത് സജീവമായത്. കർഷകരുടെയും സാധാരണക്കാരുടെയും പ്രശ്നങ്ങൾ അടുത്തറിഞ്ഞ് അവർക്കുവേണ്ടി നിലകൊണ്ട അദ്ദേഹം ജനകീയനായ നേതാവായി വളർന്നു. ലാളിത്യവും സൗഹൃദവും നിറഞ്ഞ അദ്ദേഹത്തിന്റെ വ്യക്തിത്വം സഹപ്രവർത്തകരുടെയും ജനങ്ങളുടെയും മനസ്സിൽ എന്നും നിലനിൽക്കും.
കെ. അച്യുതന്റെ വിയോഗം കോൺഗ്രസ് പ്രസ്ഥാനത്തിനും ചിറ്റൂരിലെ ജനങ്ങൾക്കും വലിയ നഷ്ടമാണ്. അദ്ദേഹത്തിന്റെ കുടുംബാംഗങ്ങളുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നു. പ്രിയപ്പെട്ട കെ. അച്യുതന്റെ ഓർമകൾക്ക് മുന്നിൽ ആദരാഞ്ജലികൾ അർപ്പിക്കുന്നതായും കെ.സി. വേണുഗോപാൽ അറിയിച്ചു.
