മന്ത്രിസഭായോഗത്തിന് ശേഷം മുഖ്യമന്ത്രി നടത്തിയ വാര്ത്താസമ്മേളനം (23/09/2026). PART-1
മഴക്കെടുതിയില് മലപ്പുറം, ഇടുക്കി, കോട്ടയം ജില്ലകളിലായി ജീവന് നഷ്ടപ്പെട്ട 9 പേരുടെ കുടുംബങ്ങള്ക്ക് എട്ടു ലക്ഷം രൂപ വീതം ധനസഹായം നല്കാന് മന്ത്രിസഭാ യോഗം തീരുമാനിച്ചു. വയോജന ക്ഷേമ വകുപ്പിന്റെ പേര് ‘ഡിപ്പാര്ട്ട്മെന്റ് ഫോര് സീനിയര് സിറ്റിസണ്സ്’ (മുതിര്ന്ന പൗരന്മാര്ക്കുള്ള വകുപ്പ്) എന്ന് പുനര്നാമകരണം ചെയ്തു. വര്ധിച്ചുവരുന്ന റോഡപകടങ്ങളും മരണ നിരക്കും കുറയ്ക്കുന്നതിനായി ഗതാഗത വകുപ്പിന്റെ നേതൃത്വത്തില് വിവിധ വകുപ്പുകളെ ഏകോപിപ്പിച്ച് ബോധവല്ക്കരണവും കര്ശന നടപടികളും ഉള്പ്പെടുത്തി വിപുലമായ റോഡ് സുരക്ഷാ ക്യാമ്പയിന് സംഘടിപ്പിക്കാനും തീരുമാനമായി.
കേരളപ്പിറവിയുടെ 70-ാം വര്ഷത്തിലേക്ക് കടക്കുന്നതിന്റെ ഭാഗമായി സംസ്ഥാനത്തിന്റെ ടൂറിസം, നിക്ഷേപ സാധ്യതകള്, തനത് കലാരൂപങ്ങള് എന്നിവ രാജ്യത്തിന് മുന്നില് അവതരിപ്പിക്കുന്നതിനായി ‘ഫെസ്റ്റിവല് കേരള’ സംഘടിപ്പിക്കും. ഡല്ഹി, മുംബൈ, ചെന്നൈ, ബെംഗളൂരു, കൊല്ക്കത്ത തുടങ്ങിയ പ്രധാന നഗരങ്ങളില് ആദ്യഘട്ടത്തിലും, തുടര്ന്ന് അന്താരാഷ്ട്ര തലത്തിലും ഇന്വെസ്റ്റ്മെന്റ് മീറ്റ് ഉള്പ്പെടെയുള്ള പരിപാടികള് നടത്താന് മന്ത്രിസഭാ ഉപസമിതിയെ ചുമതലപ്പെടുത്തി.
ലോക കേരള സഭ
ലോക കേരള സഭ പിരിച്ചുവിടാനും പ്രവാസികളുടെ ക്ഷേമത്തിനും വിഷയങ്ങള് പരിഹരിക്കുന്നതിനുമായി ബദല് സംവിധാനം ഏര്പ്പെടുത്താനും യോഗം തീരുമാനിച്ചു. പ്രവാസി പണത്തെ നിക്ഷേപമാക്കി മാറ്റുന്നതിനുള്ള (Remttiance Economy to Invetsement Economy) പദ്ധതികള്ക്കായി മുഖ്യമന്ത്രി ചെയര്മാനും വ്യവസായം, ആഭ്യന്തരം, ആരോഗ്യം, ജലസേചനം എന്നീ വകുപ്പ് മന്ത്രിമാര് അംഗങ്ങളുമായ ഉപസമിതി രൂപീകരിച്ചു.
ഇ.എസ്.എ (ESA) വിഷയത്തില് ജനവാസ കേന്ദ്രങ്ങളും സി.എച്ച്.ആര് (CHR) പ്രദേശങ്ങളും പൂര്ണ്ണമായും ഒഴിവാക്കിക്കൊണ്ടുള്ള നിര്ദ്ദേശം കേന്ദ്രസര്ക്കാരിന് സമര്പ്പിക്കാനും, ഇതിനായി പരിസ്ഥിതി വകുപ്പ് സമഗ്രമായ മാപ്പ് തയ്യാറാക്കാനും തീരുമാനിച്ചു.
ലോക മാരിടൈം ദിനം എറണാകുളത്ത് വിപുലമായി ആഘോഷിക്കും.
ഇ.ഡിയുടെ കത്തിന്മേലുള്ള പോലീസ് അന്വേഷണം എടുത്തുചാടിയുള്ള തീരുമാനമല്ല. പിഎംഎല്എ ആക്ടിന്റെ 62(2) അനുസരിച്ച് ഇഡി കത്ത് ഡി.ജി.പിയ്ക്ക് നല്കി. ഡി.ജി.പി അത് ആഭ്യന്തരവകുപ്പിനു കൈമാറുകയും തുടര്ന്ന് ഞാനുമായി സംസാരിച്ചശേഷം നിയമോപദേശത്തിനായി വിടുകയുമായിരുന്നു. അഡ്വേക്കേറ്റ് ജനറലും ഡയറക്ടര് ഓഫ് പ്രോസിക്യൂഷനും നല്കിയ നിയമോപദേശത്തില് രണ്ട് പ്രധാനപ്പെട്ട കാര്യങ്ങളുണ്ട്. ഒന്ന് സുപ്രീം കോടതിയുടെ വിധിയാണ്. പി.എം.എല്.എ 66(2 )അനുസരിച്ച് ഇ.ഡി കേസുമായി ബന്ധപ്പെട്ട പരിധിയിലുള്ള സംസ്ഥാനത്തിനു കത്ത് കൈമാറിയാല് ആ സംസ്ഥാനത്തെ പോലീസ് അന്വേഷണം നടത്തണം. അന്വേഷണം നടത്തിയേ മതിയാകൂ. നിയമപരമായ ബാധ്യതയാണത്. ആഭ്യന്തര വകുപ്പ് മന്ത്രി അക്കാര്യം വ്യക്തമായി പറഞ്ഞു. രണ്ടാമത്തെ കാര്യം ലളിതകുമാരി കേസിലെ സുപ്രീം കോടതി വിധിയാണ്. അഴിമതി കേസുള്പ്പടെയുള്ള പ്രധാനപ്പെട്ട് നാല് കാര്യങ്ങളില് എഫ്.ഐ.ആര് ഇടുന്നതിനു മുമ്പ് അന്വേഷണം നടത്തണമെന്ന് കോടതി നിര്ദ്ദേശിക്കുന്നുണ്ട്. ഈ രണ്ട് വിധികളും അനുസരിച്ച് പോലീസ് ആദ്യം അന്വേഷണം നടത്തിയിട്ടേ തീരുമാനം എടുക്കുകയുള്ളൂ. നിയമപരമായ പരിശോധന നടത്തി ഈ വിഷയത്തില് സുപ്രീംകോടതിയുടെ വിധി കൂടി പരിഗണിച്ചാണ് ആ തീരുമാനം. ആരെയും വേട്ടയാടാനോ ആരുടെയും പുറകേ നടന്ന് പ്രതികാരബുദ്ധിയോടെ പ്രവര്ത്തിക്കാനോ ഉള്ളതല്ല ഈ ഗവണ്മെന്റ്. നിയമം നിയമത്തിന്റെ വഴിക്കുപോകും.
