സാംസ്കാരിക കലാരംഗങ്ങളിലെ പ്രവർത്തകനും സംഗീത നാടക അക്കാദമി മുൻ ചെയർമാനുമായ സൂര്യാ കൃഷ്ണമൂർത്തിയുടെ നിര്യാണത്തിൽ കെപിസിസി പ്രസിഡന്റ് സണ്ണി ജോസഫ് അനുശോചനം രേഖപ്പെടുത്തി.
നാടകരചയിതാവ്, സാംസ്കാരിക നായകൻ, കലാസംഘാടകൻ തുടങ്ങിയ നിലകളിൽ തന്റേതായ പാത തെളിയിച്ച അദ്ദേഹം കേരളത്തിന്റെ സാംസ്കാരിക മുഖമായി മാറിയ വ്യക്തിത്വമായിരുന്നു. സംഗീതം, സിനിമ, നാടകം, നൃത്തം തുടങ്ങിയ വിവിധ കലാരൂപങ്ങളെ സമന്വയിപ്പിച്ച് ‘സൂര്യ ഫെസ്റ്റിവൽ’ എന്ന വേദിയിലൂടെ യുവകലാപ്രതിഭകൾക്ക് അവസരങ്ങളുടെ ലോകവും അവരുടെ സർഗാത്മക കഴിവുകൾ മാറ്റുരയ്ക്കാനുള്ള ഇടവും അദ്ദേഹം ഒരുക്കി നൽകി.
സൂര്യാ കൃഷ്ണമൂർത്തിയുടെ കലാബോധവും സംഘടനാശേഷിയും നമ്മുടെ നാടിന്റെ തനത് കലാരൂപങ്ങളെ ലോകത്തിന് പരിചയപ്പെടുത്തുന്നതിനും വലിയൊരു ആസ്വാദക സമൂഹത്തെ സൃഷ്ടിക്കുന്നതിനും സഹായിച്ചു. കലാരംഗത്തെ പുതുതലമുറയ്ക്ക് അവസരങ്ങൾ ഒരുക്കുന്നതിലും അവരെ പ്രോത്സാഹിപ്പിക്കുന്നതിലും അദ്ദേഹം നൽകിയ സംഭാവനകൾ വിലമതിക്കാനാകാത്തതാണ്.
