ഇന്ത്യയിലാദ്യമായി യുബി എൻഡോസ്കോപ്പി സാങ്കേതികവിദ്യ ഉപയോഗിച്ച് അപൂർവ ശസ്ത്രക്രിയ പൂർത്തിയാക്കി കണ്ണൂർ ബേബി മെമ്മോറിയൽ ഹോസ്പിറ്റൽ

ഇന്ത്യയിലാദ്യമായി യുബി എൻഡോസ്കോപ്പി സാങ്കേതികവിദ്യ ഉപയോഗിച്ച് അപൂർവ ശസ്ത്രക്രിയ പൂർത്തിയാക്കി കണ്ണൂർ ബേബി മെമ്മോറിയൽ ഹോസ്പിറ്റൽ
കണ്ണൂർ: ആധുനിക നട്ടെല്ല് ശസ്ത്രക്രിയാ രംഗത്ത് ശ്രദ്ധേയമായ നേട്ടം കൈവരിച്ച് കണ്ണൂർ ബേബി മെമ്മോറിയൽ ഹോസ്പിറ്റൽ. യുബി എൻഡോസ്കോപ്പി (Unilateral Biportal Endoscopy) സാങ്കേതികവിദ്യ ഉപയോഗിച്ച് നട്ടെല്ലിന്റെ ഏറ്റവും താഴെയുള്ള വാൽഎല്ല് നീക്കം ചെയ്യുന്ന അപൂർവ ‘കോക്സിജെക്ടമി’ (Coccygectomy) ശസ്ത്രക്രിയ ആശുപത്രിയിൽ വിജയകരമായി പൂർത്തിയാക്കി. ഇന്ത്യയിലാദ്യമായാണ് ഈ അപൂർവ ശസ്ത്രക്രിയ വിജയകരമായി പൂർത്തിയാക്കിയതെന്ന് ആശുപത്രി അധികൃതർ അറിയിച്ചു.
നട്ടെല്ലിന്റെ ഏറ്റവും താഴെയുള്ള ഭാഗമായ കോക്സിക്സ് (Coccyx) അഥവാ വാൽഎല്ലിന്റെ ഭാഗത്ത് തുടർച്ചയായ കടുത്ത വേദന അനുഭവപ്പെട്ടതിനെത്തുടർന്നാണ് കണ്ണൂർ കേളകം സ്വദേശിയായ 16 കാരനെ ബേബി മെമ്മോറിയൽ ആശുപത്രിയിൽ പ്രവേശിപ്പിച്ചത്. വിദഗ്ധ പരിശോധനയ്ക്ക് ശേഷമായിരുന്നു ശസ്ത്രക്രിയ. ശസ്ത്രക്രിയ വിജയകരമായി പൂർത്തിയാക്കിയ കുട്ടി ആശുപത്രി വിട്ടു. പതിനാറുകാരൻ സാധാരണ ജീവിതത്തിലേക്ക് മടങ്ങിയെത്തിയതായി ആശുപത്രി അധികൃതർ അറിയിച്ചു.
പരമ്പരാഗത രീതികളിൽ നിന്ന് വ്യത്യസ്തമായി, ചെറിയ താക്കോൽദ്വാര ശസ്ത്രക്രിയ നടത്താൻ യുബി എൻഡോസ്കോപ്പി സാങ്കേതികവിദ്യ വഴി സാധിച്ചെന്ന് ബേബി മെമ്മോറിയല്‍ ഹോസ്പിറ്റല്‍ യുബി എന്‍ഡോസ്‌കോപ്പിക് സ്‌പൈന്‍ സര്‍ജന്‍ ഡോ. ഹരി കൃഷ്ണന്‍ പറഞ്ഞു. നട്ടെല്ലിലെ വിവിധ പാത്തോളജികൾക്കും
പ്രശ്നങ്ങൾക്കും വേണ്ടി യുബി എൻഡോസ്കോപ്പി വ്യാപകമായി ഉപയോഗിക്കുന്നുണ്ടെങ്കിലും, യുബി എൻഡോസ്കോപ്പിയുടെ മിനിമലി ഇൻവേസീവ് സ്വഭാവവും മറ്റ് സാങ്കേതിക ഗുണങ്ങളും കോക്സിജെക്ടമി പോലുള്ള ഒരു പ്രൊസീജറിനായി
പ്രയോജനപ്പെടുത്താൻ കഴിഞ്ഞത് വളരെ സന്തോഷകരമായ കാര്യമാണെന്ന് ഡോ. ഹരി കൃഷ്ണൻ കൂട്ടിച്ചേർത്തു.
മിനിമലി ഇൻവേസീവ് ശസ്ത്രക്രിയ രോഗിക്ക് ശസ്ത്രക്രിയാനന്തര വേദനയും മുറിവിന്റെ വലുപ്പവും കുറയ്ക്കുന്നതിനും വളരെ വേഗത്തിൽ സാധാരണ ജീവിതത്തിലേക്ക് മടങ്ങുവാനും സഹായിക്കും. സാധാരണയായി കോക്സിജെക്ടമി, ഓപ്പൺ പ്രൊസീജർ വഴിയാണ് ചെയ്യുന്നത്. ഓപ്പൺ സർജറിയിൽ താരതമ്യേന വലിയ മുറിവ് ആവശ്യമായി വരുന്നതിനാൽ മുറിവ് ഉണങ്ങാൻ കൂടുതൽ സമയം എടുക്കുകയും, മുറിവിൽ ഇൻഫെക്ഷൻ ഉണ്ടാകാനുള്ള സാധ്യത കൂടുതലാകുകയും ചെയ്യാം. ഈ കാരണങ്ങളാലാണ് കോക്സിജെക്ടമിയിൽ മിനിമലി ഇൻവേസീവ് സർജറി രീതികൾക്ക് പ്രാധാന്യം നൽകുന്നത്.
ഇതിൽ ഏറ്റവും നൂതനമായ സാങ്കേതികവിദ്യകളിലൊന്നാണ് യുബി എൻഡോസ്കോപ്പി സ്‌പൈന്‍ സര്‍ജറി. യുബി എൻഡോസ്കോപ്പിയുടെ സഹായത്തോടെ കോക്സിക്സ് ബോൺ വളരെ കൃത്യമായി ദൃശ്യവൽക്കരിക്കാനും, അത് സേക്രത്തിന്റെ താഴ്ഭാഗത്തുള്ള എല്ലിൽ നിന്ന് കൃത്യമായി വേർപെടുത്താനും സാധിക്കുന്നു. എൻഡോസ്കോപ്പിക് ദൃശ്യസഹായത്തോടെ ആവശ്യമായ ഭാഗങ്ങൾ വ്യക്തമായി തിരിച്ചറിയാൻ കഴിയുന്നതിനാൽ ശസ്ത്രക്രിയ കൂടുതൽ കൃത്യതയോടെ പൂർത്തിയാക്കാൻ സാധിക്കും.

Anu Maria Thomas