മന്ത്രി ഒ.ജെ ജനീഷ്
യൂത്ത് കോൺഗ്രസ് സംസ്ഥാന അധ്യക്ഷനും കായിക മന്ത്രിയുമായ ഒ.ജെ. ജനീഷിനെതിരെ സിപിഎം പ്രവർത്തകർ നടത്തിയ ആക്രമണം അപലപനീയമാണെന്ന് കെപിസിസി പ്രസിഡന്റ് സണ്ണി ജോസഫ്.
മന്ത്രിയെ അപായപ്പെടുത്തുക എന്ന ലക്ഷ്യത്തോടെയാണ് സിപിഎം-ഡിവൈഎഫ്ഐ പ്രവർത്തകർ ആക്രമണം നടത്തിയതെന്ന് സണ്ണി ജോസഫ് ആരോപിച്ചു. മന്ത്രിയുടെ വാഹനത്തിന് കേടുപാടുകൾ വരുത്തുകയും അകമ്പടി പോയ പൊലീസിന്റെ വാഹനത്തിന്റെ താക്കോൽ ഊരിയെടുക്കുകയും ചെയ്തു. കൃത്യമായ ഗൂഢാലോചനയുടെ ഭാഗമായാണ് ആക്രമണം നടന്നതെന്ന് വ്യക്തമാകുന്നു.
കഴിഞ്ഞ ദിവസം തിരുവനന്തപുരത്ത് യൂത്ത് കോൺഗ്രസ് മാർച്ചിന് നേരെ നടത്തിയ ആക്രമണത്തിന്റെ തുടർച്ചയാണ് ഇന്നത്തെ സംഭവവും. യൂണിവേഴ്സിറ്റി കോളേജ് മുമ്പും എസ്എഫ്ഐ ക്രിമിനലുകളുടെ താവളമായിരുന്നു. സ്വന്തം പ്രവർത്തകർ തമ്മിൽ കത്തിക്കുത്ത് വരെ ഉണ്ടായതിനെ തുടർന്നാണ് കോളേജിലെ യൂണിറ്റ് പിരിച്ചുവിടാൻ സിപിഎം നേതൃത്വം നിർബന്ധിതമായത്. ഇത്തരം കുറ്റകൃത്യങ്ങളിൽ ഏർപ്പെടുന്ന പ്രവർത്തകരെ നിയന്ത്രിക്കുന്നതിന് പകരം അവരെ പ്രോത്സാഹിപ്പിക്കുന്ന നിലപാടാണ് സിപിഎം സ്വീകരിക്കുന്നത്. ഇത് ഏറെ ഗൗരവമുള്ള വിഷയമാണ്.
ജനാധിപത്യ പ്രക്രിയയെ അട്ടിമറിക്കാൻ കൂട്ടുനിന്നുവെന്ന് കോൺഗ്രസ് ആരോപിക്കുന്ന മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയും ബിജെപിക്കെതിരെയും കോൺഗ്രസ് പ്രതിഷേധിക്കുമ്പോൾ സിപിഎം എന്തിനാണ് പ്രകോപിതരാകുന്നതെന്നും സണ്ണി ജോസഫ് ചോദിച്ചു.
തിരഞ്ഞെടുപ്പിലെ കനത്ത തോൽവിക്ക് പിന്നാലെ സംസ്ഥാനത്തിന്റെ സമാധാനാന്തരീക്ഷം തകർക്കാനും ജനങ്ങളുടെ സ്വൈര്യജീവിതം ഇല്ലാതാക്കാനുമാണ് സിപിഎം ശ്രമിക്കുന്നത്. സംഘർഷാന്തരീക്ഷം സൃഷ്ടിച്ച് അരാജകത്വം വളർത്തുന്ന അക്രമ രാഷ്ട്രീയമാണ് ബിജെപിയും സിപിഎമ്മും പിന്തുടരുന്നത്. ഗുണ്ടായിസവും അക്രമവുമാണ് ഇരു പാർട്ടികളെയും നയിക്കുന്നതെന്നും അദ്ദേഹം പറഞ്ഞു.
ക്വട്ടേഷൻ സംഘങ്ങളുടെ സഹായത്തോടെ ജനങ്ങളുടെ സ്വൈര്യജീവിതം തകർക്കാനുള്ള ശ്രമം തുടർന്നാൽ ശക്തമായ നിയമനടപടി സ്വീകരിക്കണം. കോൺഗ്രസ് നേതാക്കളെയും മന്ത്രിമാരെയും തെരുവിൽ കൈകാര്യം ചെയ്യാമെന്ന ധാരണയോടെയാണ് മുന്നോട്ടുപോകുന്നതെങ്കിൽ അതിനെ രാഷ്ട്രീയമായി ശക്തമായി നേരിടുമെന്നും സണ്ണി ജോസഫ് പറഞ്ഞു.
