പതിനെട്ടാമത് ഫെഡറൽ ബാങ്ക് കെ പി ഹോർമിസ് അനുസ്മരണ പ്രഭാഷണം നിർവഹിച്ച് വി ഡി സതീശൻ

പുതിയ കേരളം, പുതിയ കാലം; ലോകമെമ്പാടും ‘ഫെസ്റ്റിവൽ കേരളം’ പരിപാടി സംഘടിപ്പിക്കുമെന്നും മുഖ്യമന്ത്രി

റീഇമാജിനിങ് കേരളത്തിലൂടെ ലക്ഷ്യമിടുന്നത് സംസ്ഥാനത്തിന്റെ സമഗ്ര മാറ്റം; മുഖ്യമന്ത്രി വി ഡി സതീശൻ

കൊച്ചി: പതിനെട്ടാമത് കെ പി ഹോർമിസ് അനുസ്മരണ പ്രഭാഷണം മുഖ്യമന്ത്രി വി ഡി സതീശൻ നിർവഹിച്ചു. പുതിയ വികസന കാഴ്ചപ്പാടിന്റെ ഭാഗമായി ‘ഫെസ്റ്റിവൽ കേരള’ സംഘടിപ്പിക്കുമെന്ന് മുഖ്യമന്ത്രി പ്രഖ്യാപിച്ചു. ആദ്യഘട്ടത്തിൽ രാജ്യത്തിന്റെ വിവിധ ഭാഗങ്ങളിലും തുടർന്ന് ലോകത്തിന്റെ വിവിധ കേന്ദ്രങ്ങളിലും ഫെസ്റ്റിവൽ കേരള സംഘടിപ്പിക്കുമെന്നും കേരളത്തിന്റെ പൈതൃകം, കല, സംസ്കാരം, പാരമ്പര്യം എന്നിവ അവതരിപ്പിക്കുന്നതിനൊപ്പം സംരംഭകരെയും നിക്ഷേപ അവസരങ്ങളെയും ഇതിന്റെ ഭാഗമാക്കുമെന്നും മുഖ്യമന്ത്രി പറഞ്ഞു. ഫെസ്റ്റിവൽ കേരളയിലൂടെ നമ്മുടെ പൈതൃകവും കലയും സംസ്കാരവും അവതരിപ്പിക്കുന്നതിനൊപ്പം സംരംഭകരെയും ഉൾപ്പെടുത്തും. കേരളത്തെ ഇന്ത്യയ്ക്കും ലോകത്തിനും മുന്നിൽ അവതരിപ്പിക്കുകയാണ് ലക്ഷ്യമെന്നും മുഖ്യമന്ത്രി പറഞ്ഞു.

കേവലം സാംസ്കാരിക പ്രദർശനമായി ഒതുങ്ങാതെ നിക്ഷേപ പ്രോത്സാഹനം, ടൂറിസം, സംരംഭകത്വം, കേരളത്തിന്റെ പ്രതിഭാസമ്പത്ത് എന്നിവ ലോകത്തിന് മുന്നിൽ അവതരിപ്പിക്കുന്ന വേദിയായി ഫെസ്റ്റിവൽ കേരളയെ മാറ്റുകയാണ് ലക്ഷ്യം.

ആധുനിക കാലത്തിനനുസരിച്ച് അടിസ്ഥാനമേഖലയിലുൾപ്പെടെ സംസ്ഥാനത്തിന്റെ സമഗ്രമായ മാറ്റമാണ് റീഇമാജിനിങ് കേരളത്തിലൂടെ സർക്കാർ ലക്ഷ്യമിടുന്നത്. വിദ്യാഭ്യാസം, ആരോഗ്യം, ടൂറിസം, കായികം, പൊതുജനക്ഷേമം, വയോജനക്ഷേമം, സ്ത്രീ സുരക്ഷാ എന്നീ മേഖലയിൽ കാലോചിതമായ മാറ്റമുണ്ടാകണം. പാശ്ചാത്യ രാജ്യങ്ങളോട് കിടപിടിക്കുന്ന അടിസ്ഥാന, സാമൂഹിക സൗകര്യങ്ങൾ സംസ്ഥാനത്തുണ്ട്. ഇവ കാര്യക്ഷമമായി വിനിയോഗിക്കണം. ഭൗമശാസ്ത്രപരവും ജനസംഖ്യാപരവുമായ വെല്ലുവിളികളെ സംസ്ഥാനത്തിന്റെ വളർച്ചയ്ക്കുള്ള അവസരങ്ങളായി മാറ്റണം. യുവാക്കൾക്ക് കൂടുതൽ അവസരം നൽകുകയും വയോജനങ്ങളെ സംരക്ഷിക്കുകയും ചെയ്യുന്ന നിലപാടാണ് സർക്കാരിനുള്ളത്. പരമ്പരാഗതമായി സംസ്ഥാനം നേടിയ വികസനങ്ങളിൽ മാത്രം ഒതുങ്ങി നിൽക്കാതെ, സമസ്ത മേഖലയെയും പുനർ നിർവചിക്കാൻ പര്യാപ്തമായ വികസനത്തിന്റെ കേരളം മാതൃക സൃഷ്ടിച്ചെടുക്കണമെന്നും അദ്ദേഹം അഭിപ്രായപ്പെട്ടു.

സംസ്ഥാനത്തിൻ്റെ ബാങ്കിങ് മേഖലയിൽ നിസ്തുല സംഭാവനകൾ നൽകുന്ന ഫെഡറൽ ബാങ്കിന്റെ പ്രവർത്തനങ്ങളെ പ്രശംസിച്ച അദ്ദേഹം, സർക്കാരിന്റെ വികസനകാര്യങ്ങളിലുള്ള പങ്കാളിത്തവും ആവശ്യപ്പെട്ടു.

ഫെഡറല്‍ ബാങ്ക് ചെയര്‍മാന്‍ ഏലിയാസ് ജോർജ് ചടങ്ങിന് സ്വാഗതവും ബാങ്കിൻ്റെ എംഡിയും സിഇഒയുമായ കെ വി എസ് മണിയൻ നന്ദിയും പറഞ്ഞു. ബിസിനസ് രംഗത്തെ പ്രമുഖര്‍, വിവിധ ബിസിനസ് സ്‌കൂളുകളിലെ വിദ്യാര്‍ഥികള്‍, ബാങ്കിൻ്റെ ഡയറക്ടര്‍മാര്‍, സീനിയര്‍ എക്സിക്യൂട്ടീവുകള്‍, ഉദ്യോഗസ്ഥര്‍, തുടങ്ങി ആയിരത്തിയഞ്ഞൂറിലധികം പേർ പങ്കെടുത്തു. സോഷ്യല്‍ മീഡിയ മോണിറ്ററിങ് ടൂള്‍ ആയ ഫെഡ് ഹൈവ് ഉൾപ്പെടെ ബാങ്കിൻ്റെ ഏറ്റവും പുതിയ സാങ്കേതികവിദ്യകളും നൂതനാശയങ്ങളും പ്രദര്‍ശിപ്പിക്കുന്ന ഡിജിറ്റല്‍ എക്സിബിഷനും ബാങ്ക് ഒരുക്കിയിരുന്നു.

ബാങ്കിൻ്റെ സ്ഥാപകനായ കെ പി ഹോര്‍മിസിന്റെ സ്മരണാർഥം ഫെഡറൽ ബാങ്ക് ഹോർമിസ് മെമോറിയൽ ഫൗണ്ടേഷൻ സംഘടിപ്പിക്കുന്ന പ്രഭാഷണ പരമ്പരയാണ് കെ പി ഹോർമിസ് അനുസ്‌മരണ പ്രഭാഷണം. ബാങ്കിംഗ്, ധനകാര്യം, സാമ്പത്തിക ശാസ്ത്രം, ഭരണം തുടങ്ങിയ മേഖലകളിലെ പ്രമുഖ വ്യക്തികളാണ് സാധാരണയായി മുഖ്യപ്രഭാഷണം നടത്താറുള്ളത്. കേന്ദ്രമന്ത്രിയായിരുന്ന പി ചിദംബരമാണ് 1996 ൽ പ്രഭാഷണപരമ്പരയ്ക്കു തുടക്കമിട്ടത്. അരുൺ ജെയ്റ്റ്ലി, അരുൺ ഷൂരി, റിസർവ് ബാങ്ക് ഗവർണർമാരായിരുന്ന എസ് വെങ്കിട്ടരാമൻ, രഘുറാം രാജൻ, ശക്തികാന്തദാസ് തുടങ്ങിയവർ കൂടാതെ ശശി തരൂർ, ഐ എസ് ആർ ഒ ചെയർമാൻ ആയിരുന്ന ഡോ. ജി മാധവൻ നായർ, ഇൻഫോസിസ് ചെയർമാൻ ആയിരുന്ന എൻ ആർ നാരായണമൂർത്തി തുടങ്ങി അനേകം വിദഗ്ദ്ധർ വിവിധവിഷയങ്ങളിൽ പ്രഭാഷണം നടത്തിയിട്ടുണ്ട്.

Photo Caption: പതിനെട്ടാമത് കെ പി ഹോർമിസ് അനുസ്മരണ പ്രഭാഷണം നടത്തിയ മുഖ്യമന്ത്രി വി ഡി സതീശന് ഫെഡറൽ ബാങ്ക് എംഡിയും സിഇഒയുമായ കെ വി എസ മണിയനും ചെയർമാൻ ഏലിയാസ് ജോർജും ഉപഹാരം നൽകുന്നു

Athulya Raj K R