മുഖ്യതിരഞ്ഞെടുപ്പ് കമ്മിഷണർ എന്ന പദവി അന്വേഷണത്തിന് തടസ്സമാകില്ല.
തിരുവനന്തപുരം : വിദേശ എഞ്ചിനീയറുടെ ആത്മഹത്യയിലേക്ക് നയിച്ച അഴിമതി ആരോപണത്തിൽ മുഖ്യതിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരായ അന്വേഷണത്തിന് ഉത്തരവിട്ട് ആഭ്യന്തരമന്ത്രി രമേശ് ചെന്നിത്തല. വിജിലൻസ് അന്വേഷണം നിയമപരമായി മുന്നോട്ടുപോകുമെന്നും വളരെ ഗൗരവമുള്ള വിഷയമായതിനാലാണ് അന്വേഷണത്തിന് ഉത്തരവിട്ടതെന്നും മന്ത്രി പറഞ്ഞു. മുഖ്യതിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരായ വിജിലൻസ് അന്വേഷണവുമായി ബന്ധപ്പെട്ട ചോദ്യങ്ങളോട് തിരുവനന്തപുരത്ത്‌ മാധ്യമങ്ങളോട് പ്രതികരിക്കുകയായിരുന്നു മന്ത്രി.
ഗ്യാനേഷ് കുമാർ 2006ൽ കേരളത്തിലെ പൊതുമരാമത്ത് വകുപ്പ് സെക്രട്ടറിയായിരുന്ന കാലയളവിലെ സംഭവങ്ങളുമായി ബന്ധപ്പെട്ടാണ് അന്വേഷണം. നേരത്തെ പാതിവഴിയിൽ ഉപേക്ഷിക്കപ്പെട്ടിരുന്നു. വിഷയം നിയമപരമായി പൂർണമായും പരിശോധിച്ച ശേഷമാണ് വിജിലൻസിന് നിർദേശം നൽകിയത്.
മലയിൻകീഴ് വേണുഗോപാൽ നൽകിയ പരാതിയിൽ കഴമ്പുണ്ടെന്ന് ബോധ്യപ്പെട്ടതിനെ തുടർന്നാണ് നടപടിയെടുത്തത്. മുഖ്യമന്ത്രിയുമായി സംസാരിച്ച ശേഷമാണ് വിജിലൻസ് ഡയറക്ടർക്ക് അന്വേഷണം നടത്താൻ നിർദേശം നൽകിയത്. കേസെടുക്കുന്നതുമായി ബന്ധപ്പെട്ട് നിയമോപദേശവും തേടിയിരുന്നു. അഴിമതി ഉൾപ്പെടെയുള്ള ആരോപണങ്ങൾ അന്വേഷണവിധേയമാക്കും.
വേൾഡ് ബാങ്കിന്റെ ധനസഹായത്തോടെ കേരളത്തിലെ റോഡുകൾ നവീകരിക്കാൻ കേരള സ്റ്റേറ്റ് ട്രാൻസ്പോർട്ട് പ്രൊജക്ട് രൂപീകരിച്ചതോടെയാണ് സംഭവങ്ങൾ. മലേഷ്യൻ, കൊച്ചി കമ്പനി കൺസോർഷ്യമായ PATI-BEL ആണ് കരാർ ഏറ്റെടുത്തത്. മലേഷ്യൻ സ്വദേശിയും എഞ്ചിനീയറുമായ ലീ സി ബെൻ ആയിരുന്നു പ്രൊജക്ട് മാനേജർ. റോഡ് നിർമ്മാണം മുന്നോട്ടു പോകുന്നതിന് ഇടയിൽ മലേഷ്യയിൽ ക്വാലാലംപൂരിൽ തിരിച്ചെത്തിയ ലീ സി ബെൻ രണ്ട് ആത്മഹത്യ കുറിപ്പുകൾ എഴുതി വച്ച് ആത്മഹത്യ ചെയ്തു. പൊതുമരാമത്ത് വകുപ്പിനും ഉദ്യോഗസ്ഥർക്കും എതിരെ കുറ്റാരോപണങ്ങൾ എഴുതിയതാണ് ആത്മഹത്യ കുറിപ്പ്. ബില്ലുകൾ യഥാസമയം പാസാക്കാതെ തടഞ്ഞു വെച്ചു, കൈക്കൂലി ആവശ്യപ്പെട്ടിട്ട് കൊടുക്കാത്തതിനാൽ ശത്രുതാപരമായി പെരുമാറി- തുടങ്ങി നിരവധി കുറ്റങ്ങൾ അതിലുണ്ടായിരുന്നു.
ഈ ആത്മഹത്യയെ തുടർന്ന് അന്നത്തെ പൊതുമരാമത്ത് സെക്രട്ടറിയായിരുന്ന ഗ്യാനേഷ് കുമാറിനെ സ്ഥാനത്തു നിന്നു മാറ്റി. വിജിലൻസ് അന്വേഷണം നടത്തിയെങ്കിലും അതൊന്നും മുന്നോട്ടു പോയില്ല എന്ന പരാതി ഉണ്ടായി. അന്വേഷണം അട്ടിമറിച്ചു എന്ന ആരോപണങ്ങൾ ശക്തമായി.
ആ സംഭവത്തിൽ മാതൃകാപരമായ ഒരു അന്വേഷണമോ, ശിക്ഷയോ ഉണ്ടായില്ല എന്നത് രാജ്യത്തിന് ഇന്നും ഒരു കളങ്കമാണ്. ഇന്ന്‌ വ്യക്‌തമായ പരാതി വന്നു. ആ സാഹചര്യത്തിലാണ് ഗ്യാനേഷ് കുമാർ സെക്രട്ടറി ആയിരിക്കെ നടന്ന ആ അഴിമതിയെ കുറിച്ച് അന്വേഷണം നടത്താൻ കേരളത്തിലെ വിജിലൻസ് വകുപ്പിന് ഞാൻ നിർദ്ദേശം നൽകിയിരിക്കുന്നത്.
സംഭവവുമായി ബന്ധപ്പെട്ട് ലീ സി ബിന്റെ ആത്മഹത്യാക്കുറിപ്പുകളിൽ ഗ്യാനേഷ് കുമാറിന്റെ പേര് പരാമർശിച്ചിട്ടുണ്ട്‌. നേരത്തെ പാതിവഴിയിൽ ഉപേക്ഷിക്കപ്പെട്ട പരാതിയിലും അന്വേഷണത്തിലുമാണ് ഇപ്പോൾ നിയമപരമായ തുടർനടപടികൾ സ്വീകരിക്കുന്നത്.
മുഖ്യതിരഞ്ഞെടുപ്പ് കമ്മിഷണർ എന്ന പദവിയുടെ സംരക്ഷണം അന്വേഷണത്തിന് തടസ്സമാകില്ല. നിയമപരമായി പരിശോധിച്ച് ആവശ്യമായ നടപടികളുമായി വിജിലൻസ് മുന്നോട്ടുപോകുമെന്നും രമേശ് ചെന്നിത്തല പറഞ്ഞു.
