തിരുവനന്തപുരം: ഡല്‍ഹിയില്‍ സമാധാനപരമായി പ്രതിഷേധിച്ച ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി,എഐസിസി അധ്യക്ഷന്‍ മല്ലികാര്‍ജുന ഖര്‍ഗെ, പ്രിയങ്ക ഗാന്ധി, കെസി വേണുഗോപാല്‍ ഉള്‍പ്പെടെ എംപിമാരെയും മുഖ്യമന്ത്രി വി.ഡി. സതീശനെയും അറസ്റ്റ് ചെയ്ത കേന്ദ്ര സര്‍ക്കാര്‍ നടപടി അത്യന്തം കിരാതവും ജനാധിപത്യവിരുദ്ധവുമാണെന്ന് കെ.പി.സി.സി. പ്രസിഡന്റ് സണ്ണി ജോസഫ്.
ജനാധിപത്യത്തിന്റെ സംരക്ഷണത്തിനും ഭരണഘടനാ മൂല്യങ്ങള്‍ ഉയര്‍ത്തിപ്പിടിക്കുന്നതിനുമായി സമാധാനപരമായി പ്രതിഷേധിച്ച ജനപ്രതിനിധികളെ പോലീസ് ശക്തി ഉപയോഗിച്ച് തടയുകയും അറസ്റ്റ് ചെയ്യുകയും ചെയ്തത് പ്രതിഷേധിക്കാനുള്ള പൗരന്മാരുടെ അവകാശത്തോടുള്ള വെല്ലുവിളിയാണ്. എം.പിമാരടക്കമുള്ള ജനപ്രതിനിധികളെ പോലീസ് തെരുവില്‍ ആക്രമിച്ച് പരിക്കേല്‍പ്പിച്ച സംഭവം ജനാധിപത്യത്തിന് കളങ്കമാണ്.
ഭയപ്പെടുത്തിയും അടിച്ചമര്‍ത്തിയും ജനാധിപത്യത്തിനായുള്ള പോരാട്ടത്തെ ഇല്ലാതാക്കാനാവില്ല. അധികാരത്തിന്റെ ദുര്‍വിനിയോഗത്തിലൂടെ ശബ്ദങ്ങളെ നിശ്ശബ്ദമാക്കാമെന്ന കേന്ദ്ര സര്‍ക്കാരിന്റെ ധാരണ തെറ്റാണ്. ഭരണകൂട ഭീകരതയ്ക്കും ജനാധിപത്യ ധ്വംസനത്തിനുമെതിരെ രാജ്യം ഒറ്റക്കെട്ടായി പോരാടും.
ഡല്‍ഹിയിലെ ജനാധിപത്യവിരുദ്ധമായ അറസ്റ്റ് നടപടിയില്‍ പ്രതിഷേധിച്ചും ജനാധിപത്യ അവകാശങ്ങള്‍ സംരക്ഷിക്കണമെന്ന ആവശ്യം ഉയര്‍ത്തിയും എഐസിസി ആഹ്വാന പ്രകാരം ഒക്ടോബര്‍ 8ന് കോണ്‍ഗ്രസിന്റെ നേതൃത്തില്‍ സംസ്ഥാന വ്യാപകമായി കരിദിനം ആചരിക്കും.സംസ്ഥാന, ജില്ലാ, ബ്ലോക്ക് തലങ്ങളില്‍ വമ്പിച്ച പ്രതിഷേധങ്ങളും നടത്തും.
