ഹൂസ്റ്റൺ : ഹ്യൂസ്റ്റണിലെ ഏക്കർ ഹോംസ് ഏരിയയിലെ ഒബ്സർവേറ്ററി തെരുവിൻ്റെ 8500 ബ്ലോക്കിൽ വൈദ്യുതി ലൈനിൽ നിന്ന് ഷോക്കേറ്റ് ഒരു തൊഴിലാളി മരിച്ചു. മറ്റൊരു തൊഴിലാളിയ്ക്ക് പരിക്കേറ്റു.
ഒരു തൊഴിലാളി സംഭവസ്ഥലത്ത് വെച്ച് തന്നെ മരിച്ചു. പരിക്കേറ്റ മറ്റൊരു തൊഴിലാളിയെ ആശുപത്രിയിലേക്ക് മാറ്റി. ഇയാളുടെ പരിക്കിൻ്റെ വ്യാപ്തി വ്യക്തമല്ല.
മരങ്ങളുടെ ഇടയിലേക്ക് ബക്കറ്റ് ട്രക്ക് ഉയർത്തുന്നതിനിടയിലാണ് അപകടമുണ്ടായത്. മരത്തടികൾക്കിടയിൽ വൈദ്യുതി ലൈനുകൾ ഉണ്ടായിരുന്നെങ്കിലും ഇത് പെട്ടെന്ന് കാണാൻ കഴിഞ്ഞിരുന്നില്ല. ട്രക്കിൻ്റെ ബക്കറ്റ് മുകളിലേക്ക് ഉയർത്തിയപ്പോഴാണ് ഷോക്കേറ്റത്.
തൊഴിലാളികൾ എന്ത് ജോലിയാണ് ചെയ്തുകൊണ്ടിരുന്നതെന്നോ ഏത് കമ്പനിയിലെ ജീവനക്കാരാണെന്നോ ഉള്ള വിവരങ്ങൾ ഹൂസ്റ്റൺ ഫയർ ഡിപ്പാർട്ട്മെൻ്റ് (HFD) ഇതുവരെ ഔദ്യോഗികമായി പുറത്തുവിട്ടിട്ടില്ല. ഇവർ സ്വകാര്യ കരാർ തൊഴിലാളികളാകാം എന്നാണ് പ്രാഥമിക നിഗമനം.