ചെന്നൈയിൽ ബൈക്കുകൾ കൂട്ടിയിടിച്ച് രണ്ട് മലയാളി വിദ്യാർഥികൾ മരിച്ചു

Spread the love

പന്തളം ∙ ചെന്നൈയിൽ രണ്ട് ബൈക്കുകൾ കൂട്ടിയിടിച്ചുണ്ടായ അപകടത്തിൽ പന്തളം പൂഴിക്കാട് സ്വദേശി ഷെൽഡൻ സിനു (19), എറണാകുളം പറവൂർ സ്വദേശി കെ. ആർ. റോഷിത് (18) എന്നിവർ മരിച്ചു. ചെന്നൈ എസ്‌ആർഎം ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിലെ ഒന്നാം വർഷ എൻജിനീയറിങ് വിദ്യാർഥികളായിരുന്നു ഇരുവരും.

ശനിയാഴ്ച അർധരാത്രിയോടെ കോളേജ് ക്യാമ്പസിനു സമീപം പൊത്തേരിയിലെ ജിഎസ്ടി റോഡിലായിരുന്നു അപകടം. ഷെൽഡന്റെ സഹയാത്രികനായിരുന്ന റോഷിത് സംഭവസ്ഥലത്തുതന്നെ മരിച്ചു. അപകടത്തിൽ പരിക്കേറ്റ ഷെൽഡൻ തിങ്കളാഴ്ച വൈകുന്നേരമാണ് മരിച്ചത്.

പന്തളം പൂഴിക്കാട് സിനീഷ് വില്ലയിൽ (മീനത്തേതിൽ) സിനു മാത്യുവിന്റെയും പരേതയായ നിഷയുടെയും മകനാണ് ഷെൽഡൻ. റോബോട്ടിക് എൻജിനീയറിങ് വിദ്യാർഥിയായിരുന്നു. എയ്‌റോസ്‌പേസ് എൻജിനീയറിങ് വിദ്യാർഥിയായിരുന്ന റോഷിത് എറണാകുളം പറവൂർ സ്റ്റേഡിയം റോഡ് കൈതവളപ്പിൽ രൂപേഷിന്റെ മകനാണ്.

ഷെൽഡന്റെ ഭൗതികശരീരം വ്യാഴാഴ്ച രാവിലെ എട്ടിന് ഭവനത്തിൽ കൊണ്ടുവരും. രാവിലെ 11ന് ഭവനത്തിലെ ശുശ്രൂഷയ്ക്കു ശേഷം കുടശ്ശനാട് സെന്റ് സ്റ്റീഫൻസ് ഓർത്തഡോക്സ് കത്തീഡ്രൽ തീർഥാടന ദേവാലയത്തിൽ സംസ്കാരം നടക്കും.

 

Leave a Reply

Your email address will not be published. Required fields are marked *