കൊച്ചി: പുനരുപയോഗ സ്രോതസുകളിൽനിന്ന് പരിസ്ഥിതി സൗഹൃദ വിമാന ഇന്ധനത്തിന്റെ ഉത്പാദനം വർധിപ്പിക്കുന്നതിനും വിതരണശൃംഖല ശക്തിപ്പെടുത്തുന്നതിനും രാജ്യത്തെ പൊതുമേഖലാ എണ്ണക്കമ്പനിയായ ഭാരത് പെട്രോളിയം കോർപറേഷൻ ലിമിറ്റഡും (ബിപിസിഎൽ) സ്വകാര്യ വിമാന കമ്പനിയായ ആകാശ എയറും ധാരണയിലെത്തി. അന്തരീക്ഷ മലിനീകരണം, കാർബണിന്റെ അളവ് എന്നിവ പരമാവധി കുറയ്ക്കുന്ന സുസ്ഥിര വ്യോമയാന ഇന്ധന (സാഫ്) മേഖലയെ പ്രോത്സാഹിപ്പിക്കുന്നതിന്റെ ഭാഗമായാണ് സഹകരണം. ഇതുസംബന്ധിച്ച ധാരണാപത്രത്തിൽ ബിപിസിഎൽ മാർക്കറ്റിംഗ് (ഏവിയേഷൻ) വിഭാഗം ചീഫ് ജനറൽ മാനേജർ സുജിത് കുമാറും ആകാശ എയർ ചീഫ് ഫിനാൻഷ്യൽ ഓഫീസർ അങ്കുർ ഗോയലും ഒപ്പുവെച്ചു.
പദ്ധതി പ്രകാരം, രാജ്യത്തെ എയർപോർട്ടുകളിൽ സാഫ് മിശ്രിതം ചേർത്ത ഏവിയേഷൻ ടർബൈൻ ഇന്ധന വിതരണത്തിനുള്ള നടപടികൾ ആരംഭിക്കും. ദീർഘകാലാടിസ്ഥാനത്തിൽ വ്യോമയാന മേഖലയിൽ ഉപയോഗിക്കാൻ സാധ്യതയുള്ള ഇത്തരം ഇന്ധനത്തിന്റെ വൻതോതിലുള്ള ഉത്പാദനത്തിനും ബിപിസിഎൽ തുടക്കമിടും. പ്രതിവർഷം 61 കിലോ ടൺ ഉത്പാദന ശേഷിയുള്ള ഇന്ധന പ്ലാന്റിന്റെ നിർമാണം ബിപിസിഎൽ മുംബൈ റിഫൈനറിയിൽ അന്തിമ ഘട്ടത്തിലാണ്. നയ രൂപീകരണം, വിവര കൈമാറ്റം, സർക്കാരുമായും ഓഹരി ഉടമകളുമായും നടത്തുന്ന പ്രവർത്തനങ്ങൾ എന്നിവയിലൂടെ സുസ്ഥിര ഇന്ധന വികസനത്തിൽ രാജ്യത്ത് സമഗ്രമായ ഇക്കോസിസ്റ്റം രൂപീകരിക്കുകയാണ് പദ്ധതിയിലൂടെ ലക്ഷ്യമിടുന്നത്.
രാജ്യത്തിന്റെ ഹരിതോർജ വികസന പ്രവർത്തനങ്ങൾക്ക് വേഗം നൽകുകയാണ് സഹകരണത്തിലൂടെ ലക്ഷ്യമിടുന്നതെന്ന് ബിപിസിഎൽ മാർക്കറ്റിംഗ് ഡയറക്ടർ ശുഭാങ്കർ സെൻ പറഞ്ഞു. വ്യോമയാന ഇന്ധന ബിസിനസിനെ ശക്തിപ്പെടുത്തുക ലക്ഷ്യമിട്ട് ആരംഭിച്ച അത്യാധുനിക ഓട്ടോമേഷൻ സംവിധാനമായ ബി- വിങ്ഡ് പ്ലാറ്റ്ഫോം പൂർണതോതിൽ പ്രവർത്തനസജ്ജമായതായും ശുഭാങ്കർ സെൻ പറഞ്ഞു. വ്യോമയാന മേഖലയിൽ പരിസ്ഥിതി സൗഹൃദ ഇന്ധന വിതരണത്തിനായുള്ള തന്ത്രപ്രധാന സഹകരണത്തിനാണ് തുടക്കമിടുന്നതെന്നും ഉത്പാദനക്ഷമത വർധിപ്പിച്ച് മേഖലയിൽ സുസ്ഥിര വികസനം സാധ്യമാക്കുകയാണ് ലക്ഷ്യമെന്നും ബിപിസിഎൽ ഏവിയേഷൻ ബിസിനസ് ഹെഡ് സഞ്ജീവ് കുമാർ പറഞ്ഞു. പാരിസ്ഥിതിക ഉത്തരവാദിത്തങ്ങൾ നിറവേറ്റുന്നതിന്റെ ഭാഗമായാണ് സഹകരണമെന്ന് ആകാശ എയർ സിഎഫ്ഒ അങ്കുർ ഗോയൽ അഭിപ്രായപ്പെട്ടു. ബിപിസിഎല്ലിന്റെയും ആകാശ എയറിന്റെയും ഉന്നത ഉദ്യോഗസ്ഥർ ചടങ്ങിൽ പങ്കെടുത്തു.
Anu Maria Thomas
