കൊച്ചി: രാജ്യത്തിന്റെ സമുദ്രസുരക്ഷ കൂടുതൽ ശക്തിപ്പെടുത്തുന്ന സുപ്രധാന നേട്ടമായി, കൊച്ചിൻ ഷിപ്പ്യാർഡ് ലിമിറ്റഡ് (CSL) ഇന്ത്യൻ നാവികസേനയ്ക്കായി നിർമിച്ച ഏഴാമത് ആന്റി സബ്മറൈൻ വാർഫെയർ ഷാലോ വാട്ടർ ക്രാഫ്റ്റ് (ASW-SWC) ‘മച്ചിലിപട്ടണം’ വിജയകരമായി നീറ്റിലിറക്കി.
കൊച്ചിൻ ഷിപ്പ്യാർഡിൽ നടന്ന ചടങ്ങിൽ നാവികസേന വൈസ് അഡ്മിറൽ അതുൽ ആനന്ദിന്റെ പത്നി ഗൂൽരുഖ് ആനന്ദ് കപ്പലിന്റെ ലോഞ്ചിങ് നിർവഹിച്ചു. വൈസ് അഡ്മിറൽ അതുൽ ആനന്ദ് മുഖ്യാതിഥിയായി ചടങ്ങിൽ പങ്കെടുത്തു.
ഇന്ത്യൻ നാവികസേനയ്ക്കായി കൊച്ചിൻ ഷിപ്പ്യാർഡ് നിർമ്മിക്കുന്ന എട്ട് ആന്റി സബ്മറൈൻ വാർഫെയർ ഷാലോ വാട്ടർ ക്രാഫ്റ്റുകളിൽ ഏഴാമത്തേതാണ് ‘മച്ചിലിപട്ടണം’. പൂർണമായും തദ്ദേശീയ സാങ്കേതികവിദ്യ ഉപയോഗിച്ച് രൂപകൽപ്പന ചെയ്ത് നിർമ്മിച്ച ഈ യുദ്ധക്കപ്പൽ രാജ്യത്തിന്റെ പ്രതിരോധമേഖലയിലെ ആത്മനിർഭർ ഭാരത് ദൗത്യത്തിന്റെ മറ്റൊരു സുപ്രധാന നേട്ടമാണ്.
78 മീറ്റർ നീളവും ഏകദേശം 900 ടൺ ഭാരവുമുള്ള കപ്പലിന് മണിക്കൂറിൽ 25 നോട്ടിക്കൽ മൈൽ വരെ വേഗത്തിൽ സഞ്ചരിക്കാനാകും. പരമാവധി 1,800 നോട്ടിക്കൽ മൈൽ ദൂരം സഞ്ചരിക്കാൻ ശേഷിയുള്ള കപ്പലിൽ സമുദ്രാന്തർ ഭാഗത്തെ നിരീക്ഷണത്തിനും അന്തർവാഹിനികളെ കണ്ടെത്തുന്നതിനുമായി അത്യാധുനിക സോണാർ സംവിധാനങ്ങളും മറ്റ് നൂതന സാങ്കേതിക സംവിധാനങ്ങളും സജ്ജീകരിച്ചിട്ടുണ്ട്.
ആന്ധ്രാപ്രദേശിലെ കൃഷ്ണ ജില്ലയിലുള്ള ചരിത്രപ്രസിദ്ധമായ തുറമുഖ നഗരമായ മച്ചിലിപട്ടണത്തിന്റെ സ്മരണാർത്ഥമാണ് കപ്പലിന് ‘മച്ചിലിപട്ടണം’ എന്ന പേര് നൽകിയിരിക്കുന്നത്.
ചടങ്ങിൽ കൊച്ചിൻ ഷിപ്പ്യാർഡ് ചെയർമാനും മാനേജിംഗ് ഡയറക്ടറുമായ ജോസ് വി. ജെ., ഡയറക്ടർമാരായ ഡോ. ഹരികൃഷ്ണൻ എസ്. (ഓപ്പറേഷൻസ്), രാജേഷ് ഗോപാലകൃഷ്ണൻ (ടെക്നിക്കൽ), റിയർ അഡ്മിറൽ ദീപക് സിംഗാൾ വി.എസ്.എം., സി.എസ്.ഒ., ചീഫ് വിജിലൻസ് ഓഫീസർ ഡോ. സി. പാണ്ടി സെൽവ ദുരൈ (IOFS), കപ്പൽ നിർമാണത്തിന് മേൽനോട്ടം വഹിച്ച അനുപ് മേനോൻ (WPS-കൊച്ചി), ദക്ഷിണ നാവികസേനയിലെ മുതിർന്ന ഉദ്യോഗസ്ഥർ എന്നിവർ പങ്കെടുത്തു.
നേരത്തെ ഐഎൻഎസ് മാഹി, ഐഎൻഎസ് മാൽവൻ, ഐഎൻഎസ് മാംഗ്രോൾ, ഐഎൻഎസ് മാൽപേ, ഐഎൻഎസ് മുൾക്കി, ഐഎൻഎസ് മഗ്ദല എന്നീ ആറ് ആന്റി സബ്മറൈൻ വാർഫെയർ ഷാലോ വാട്ടർ ക്രാഫ്റ്റുകൾ വിജയകരമായി നീറ്റിലിറക്കിയിരുന്നു.
ഇന്ത്യൻ നാവികസേനയുടെയും കൊച്ചിൻ ഷിപ്പ്യാർഡിന്റെയും സഹകരണത്തിലൂടെ നിർമ്മിച്ചുവരുന്ന ഈ ശ്രേണിയിലെ യുദ്ധക്കപ്പലുകൾ സമുദ്രാതിർത്തി സുരക്ഷ ശക്തിപ്പെടുത്തുന്നതിനും സമുദ്രാന്തർ ഭീഷണികളെ ഫലപ്രദമായി പ്രതിരോധിക്കുന്നതിനും നിർണായക പങ്കുവഹിക്കും. ഉയർന്ന നിലവാരവും സമയബന്ധിതമായ നിർമാണ മികവും കൈവരിച്ചുകൊണ്ട് പ്രതിരോധ കപ്പൽനിർമാണ രംഗത്തെ ഇന്ത്യയുടെ ആത്മവിശ്വാസം കൂടുതൽ ശക്തിപ്പെടുത്തുകയാണ് കൊച്ചിൻ ഷിപ്പ്യാർഡ്.
Photocaption: കൊച്ചിൻ ഷിപ്പ്യാർഡ് ലിമിറ്റഡ് (CSL) ഇന്ത്യൻ നാവികസേനയ്ക്കായി നിർമിച്ച ഏഴാമത് ആന്റി സബ്മറൈൻ വാർഫെയർ ഷാലോ വാട്ടർ ക്രാഫ്റ്റ് (ASW-SWC) ‘മച്ചിലിപട്ടണം’ നീറ്റിലിറക്കിയ ചടങ്ങിൽ കൊച്ചിൻ ഷിപ്പ്യാർഡ് ഡയറക്ടർ ഡോ. ഹരികൃഷ്ണൻ എസ്. (ഓപ്പറേഷൻസ്), ശ്രീമതി ജൂലി ജോസ് ( കൊച്ചിൻ ഷിപ്പ്യാർഡ് ചെയർമാനും മാനേജിംഗ് ഡയറക്ടറുമായ ജോസ് വി. ജെ യുടെ പത്നി), ശ്രീമതി ഗൂൽരുഖ് ആനന്ദ് (നാവികസേന വൈസ് അഡ്മിറൽ അതുൽ ആനന്ദിന്റെ പത്നി), നാവികസേന വൈസ് അഡ്മിറൽ അതുൽ ആനന്ദ്, കൊച്ചിൻ ഷിപ്പ്യാർഡ് ചെയർമാനും മാനേജിംഗ് ഡയറക്ടറുമായ ജോസ് വി. ജെ. എന്നിവർ. (വലുത് നിന്ന് ഇടത്തോട്ട് )
Athulya K R
