ഫോർട്ട് വർത്ത് (ടെക്സാസ്) : ഏകദേശം മൂന്ന് പതിറ്റാണ്ടായി ഒളിവിൽ കഴിഞ്ഞിരുന്ന 48-കാരിയായ മരിയ നാരസ് (Maria Narez) മെക്സിക്കോയിൽ അറസ്റ്റിലായി. 1996-ൽ മൂന്ന് വയസുകാരിയായ മകൾ കാസാൻഡ്ര എൽ. വൈറ്റിന്റെ (Kasandra L. White) മരണവുമായി ബന്ധപ്പെട്ട് ടെക്സാസിലെ ടാറന്റ് കൗണ്ടിയിൽ രജിസ്റ്റർ ചെയ്ത ക്യാപിറ്റൽ മർഡർ കേസിലാണ് നാരസ് പ്രതിയായിരുന്നത്.
അന്വേഷണ രേഖകൾ പ്രകാരം, കുഞ്ഞിനെ ക്രൂരമായി മർദിച്ചതിനെ തുടർന്നാണ് മരണം സംഭവിച്ചതെന്ന് പ്രോസിക്യൂഷൻ ആരോപിക്കുന്നു. തുടർന്ന് 1997-ൽ ഗ്രാൻഡ് ജൂറി നാരസിനെതിരെ ക്യാപിറ്റൽ മർഡർ കുറ്റം ചുമത്തി കുറ്റപത്രം സമർപ്പിച്ചു. പിന്നീട് ജാമ്യത്തുക 25,000 ഡോളറായി കുറച്ചതിന് ശേഷം കോടതിയിൽ ഹാജരാകാതിരുന്ന നാരസ് രാജ്യം വിട്ട് ഒളിവിൽ പോകുകയായിരുന്നുവെന്ന് അധികൃതർ അറിയിച്ചു.
മെക്സിക്കോ ഇന്റർപോൾ, യു.എസ്. മാർഷൽസ് സർവീസ്, യു.എസ്. ഡിപ്പാർട്മെന്റ് ഓഫ് ഹോംലാൻഡ് സെക്യൂരിറ്റി, യു.എസ്. ഡിപ്പാർട്മെന്റ് ഓഫ് ജസ്റ്റിസ് എന്നിവയുടെ സംയുക്ത അന്തർദേശീയ നീക്കത്തിനൊടുവിലാണ് കഴിഞ്ഞ ശനിയാഴ്ച നാരസിനെ മെക്സിക്കോയിൽ പിടികൂടിയത്. ടാറന്റ് കൗണ്ടിയിൽ വിചാരണ നേരിടുന്നതിനായി അവരെ അമേരിക്കയിലേക്ക് കൈമാറാനുള്ള (Extradition) നടപടികൾ പുരോഗമിക്കുകയാണെന്ന് അധികൃതർ അറിയിച്ചു.