ഡാളസ് : ഇന്ത്യയുടെ സ്വാതന്ത്ര്യദിനാഘോഷത്തിന്റെ ഭാഗമായി കേരള അസോസിയേഷൻ ഓഫ് ഡാളസും ഇന്ത്യ കൾച്ചറൽ & എഡ്യൂക്കേഷൻ സെന്ററും ചേർന്ന് വിപുലമായ ആഘോഷപരിപാടികളും സന്നദ്ധ രക്തദാന ക്യാമ്പും കേരള ലിറ്റററി സൊസൈറ്റി ഓഫ് ഡാളസിന്റെ സഹകരണത്തോടെ സാഹിത്യ സമ്മേളനവും സംഘടിപ്പിക്കുന്നു. (ഓഗസ്റ്റ് 15) പരിപാടി നടക്കുന്നത്.
മാതൃരാജ്യത്തിന് സ്വാതന്ത്ര്യം നേടിത്തരാൻ തങ്ങളുടെ ജീവനും രക്തവും നൽകിയ ധീരരായ സ്വാതന്ത്ര്യസമര സേനാനികളുടെ ത്യാഗസ്മരണകളെ പുതുക്കിക്കൊണ്ടാണ് ഇത്തവണത്തെ ആഘോഷങ്ങൾ ക്രമീകരിച്ചിരിക്കുന്നത്. ജന്മഭൂമിയിൽ നിന്നും ആയിരക്കണക്കിന് മൈലുകൾക്ക് അകലെയാണെങ്കിലും, ഭാരതീയരുടെ ത്യാഗമനോഭാവവും കരുണയും ഉയർത്തിപ്പിടിച്ചുകൊണ്ട് ഒരു ജീവൻ രക്ഷിക്കാൻ രക്തം നൽകാം എന്ന ആശയമാണ് അസോസിയേഷൻ പങ്കുവെക്കുന്നത്.
“അന്ന് അവർ സ്വാതന്ത്ര്യത്തിനായി രക്തം നൽകി; ഇന്ന് നമുക്ക് ഒരാളുടെ ജീവനായി രക്തം നൽകാം.”
ദേശീയ പതാക ഉയർത്തുന്നതിനും സ്വാതന്ത്ര്യദിനാഘോഷങ്ങൾക്കും ഒപ്പം സംഘടിപ്പിക്കുന്ന ഈ രക്തദാന ക്യാമ്പിൽ പങ്കാളികളാകാൻ ഡാളസിലെ മുഴുവൻ പ്രവാസികളോടും ഭാരതീയരോടും കേരള അസോസിയേഷൻ ഭാരവാഹികൾ അഭ്യർത്ഥിച്ചു. മനുഷ്യനിർമ്മിതമല്ലാത്ത, ഏറ്റവും വലിയ ജീവദാനമായ രക്തദാനത്തിലൂടെ സ്വാതന്ത്ര്യദിനാഘോഷങ്ങൾക്ക് ഒരു പുതിയ മാനവും ജീവകാരുണ്യത്തിന്റെ തിളക്കവും നൽകുകയാണ് സംഘാടകർ.
